ໂຄງການທາງລົດໄຟລາວ-ຈີນ ມີແຜນໃຫ້ບໍລິການເຖິງ 23 ປີຈິ່ງຈະສາມາດຈ່າຍຄ່າຕົ້ນທຶນການກໍ່ສ້າງໄດ້ ກ່ອນຈະສ້າງຜົນກຳໄລຫຼັງຈາກປີທີ 24 ເປັນຕົ້ນໄປ ເນື່ອງຈາກວ່າໂຄງການດັ່ງກ່າວມີມູນຄ່າການລົງທຶນສູງ ແລະການເກັບກູ້ທຶນຄືນຈິ່ງໃຊ້ເວລາຍາວນານ
ທ່ານ ອຸຕະແກ້ວ ແກ້ວດວງສິນ, ຫົວໜ້າກົມສົ່ງເສີມການລົງທຶນ, ກະຊວງແຜນການ ແລະການລົງທຶນ ກ່າວໃນອາທິດຜ່ານມາວ່າ ມູນຄ່າການລົງທຶນຂອງໂຄງການທາງລົດໄຟ ລາວ-ຈີນ ທັງໝົດ ປະມານ 5.986 ລ້ານໂດລາ ເຊິ່ງມີອາຍຸສຳປະທານ 50 ປີ. ໃນນີ້, 40% ຂອງມູນຄ່າການລົງທຶນທັງໝົດເປັນເງິນຕົ້ນທຶນ, ສ່ວນອີກ 60% ແມ່ນກູ້ຢືມຈາກ ທະນາຄານຂາເຂົ້າ-ຂາອອກ ສປ ຈີນ. ສໍາລັບຕົ້ນທຶນຂອງຝ່າຍລາວ ແມ່ນ 730 ລ້ານໂດລາ, ລັດຖະບານອອກເງິນ 250 ລ້ານໂດລາ, ສ່ວນອີກ 480 ລ້ານໂດລາ ແມ່ນກູ້ຢືມຈາກທະນາຄານຂາເຂົ້າ-ຂາອອກ ສປ ຈີນ ເຊິ່ງບໍລິສັດ ທາງລົດໄຟ ລາວ-ຈີນ ແມ່ນເປັນຜູ້ຮັບຜິດຊອບຄ່າໃຊ້ຈ່າຍໃນການບໍາລຸງຮັກສາ ລວມທັງຄວາມສ່ຽງຕ່າງໆ ເມື່ອໝົດອາຍຸສຳປະທານ 50 ປີແມ່ນຕ້ອງໄດ້ສົ່ງມອບໂຄງການຄືນໃຫ້ແກ່ລັດຖະບານລາວ ແຕ່ບໍລິສັດສາມາດສະເໜີລັດຖະບານລາວເປັນຜູ້ພິຈາລະນາໃນການຂໍຕໍ່ອາຍຸສໍາປະທານ.
ທ່ານກ່າວຕື່ມວ່າ ລັດຖະບານ ຈະບໍ່ມີການຈັດຫາທີ່ດິນເພີ່ມສຳລັບການລົງທຶນໃສ່ບັນດາທຸລະກິດທີ່ປິ່ນອ້ອມໂຄງການທາງລົດໄຟ ລາວ-ຈີນ ເຊິ່ງການພັດທະນາພື້ນຖານໂຄງລ່າງປິ່ນອ້ອມສະຖານີ ທີ່ໄດ້ກຳນົດໄວ້ 4 ຈຸດ ຄື: ຈຸດເມືອງໄຊ ແຂວງ ອຸດົມໄຊ ແລະ ສະຖານີ ນະຄອນຫຼວງວຽງຈັນ ມີ 1.000 ເຮັກຕາຕໍ່ຈຸດ ສ່ວນຈຸດສະຖານີ ວັງວຽງ ແຂວງວຽງຈັນ ແລະ ສະຖານີຫຼວງພະບາງ 500 ເຮັກຕາຕໍ່ຈຸດ.
ບໍລິສັດທາງລົດໄຟ ລາວ-ຈີນ ເປັນຜູ້ຮັບຜິດຊອບຄ່າເວນຄືນເນື້ອທີ່ດິນ, ລວມທັງສິ່ງປຸກສ້າງ ແລະ ເສຍຄ່າເຊົ່າ ແລະຮັບຜິດຊອບຕໍ່ຄ່າຊົດເຊີຍ ຫຼື ຍົກຍ້າຍຈັດສັນຕາມລະບຽບກົດໝາຍ ເຊິ່ງບໍ່ໄດ້ລວມໃນມູນຄ່າຂອງໂຄງການກໍ່ສ້າງທາງລົດໄຟ.
ຂໍ້ມູນຈາກ: Lao National Radio