ທາງສະມາຄົມຜູ້ປະກອບການ ແລະ ສົ່ງອອກໝາກໄມ້ໄທ ໄດ້ໃຫ້ສໍາພາດກັບສໍານັກຂ່າວ WorkpointTODAY ໃນວັນທີ 18 ທັນວາ 2021 ວ່າ ໄດ້ສົ່ງອອກທຸລຽນຈໍານວນ 1 ຕູ້ ໄປທີ່ປະເທດຈີນ ໂດຍໃຊ້ເວລາທັງໝົດ 28 ມື້ ເຊິ່ງເຮັດໃຫ້ທຸລຽນທັງໝົດໄດ້ຮັບຄວາມເສຍຫາຍ ແລະ ຕົກໂໝກທຸກໜ່ວຍ, ໂດຍທຸລຽນຕູ້ໜຶ່ງ ມີມູນຄ່າສູງເຖິງ 4 ລ້ານບາດ ແຕ່ເອົາໄປຂາຍໄດ້ພຽງ 3 ແສນບາດ. ຖ້າຫາກວ່າອີກ 3 ເດືອນຂ້າງໜ້າສະຖານະການຍັງຄົງເປັນແບບນີ້ຢູ່ ຄາດວ່າອຸດສາຫະກໍາພືດຜັກ ແລະ ໝາກໄມ້ ໃນພາກຕາເວັນອອກຂອງໄທແມ່ນຈະຕົກຕໍ່າທັງລະບົບ.
ຈາກບັນຫາການສົ່ງອອກໝາກໄມ້ເຂົ້າຈີນລ່າຊ້າ ແລະ ບໍ່ເປັນໄປຕາມເປົ້າ ປັດໃຈຫຼັກມາຈາກມາດຕະການ ການກວດໂຄວິດ-19 ທີ່ເຂັ້ມງວດ ຕາມນະໂຍບາຍຂອງລັດຖະບານຈີນ. ເພື່ອຫາທາງອອກສໍາລັບບັນຫານີ້ ທາງດ້ານທີ່ປຶກສາລັດຖະມົນຕີວ່າການກະຊວງການກະເສດ ແລະ ສະຫະກອນກ່າວ່າ ບັນຫານີ້ລັດຖະບານໄທກໍາລັງແກ້ໄຂຢ່າງຈິງຈັງ ແລະ ຄາດວ່າຈະໃຊ້ເວລາພາຍໃນ 2-3 ອາທິດຂ້າງໜ້າໃນການຫາທາງອອກທີ່ເໝາະສົມ ແຕ່ກໍບໍ່ສາມາດຮັບປະກັນໄດ້ວ່າຈະໄດ້ຜົນ ເພາະບັນຫານີ້ແມ່ນຂຶ້ນກັບທາງຈີນເປັນຫຼັກ, ຍ້ອນວ່າຊາຍແດນທີ່ໃຊ້ໃນການສົ່ງອອກສິນຄ້ານັ້ນ ບໍ່ແມ່ນຊາຍແດນທີ່ຕິດກັບໄທເລີຍ ແລະ ມັນກໍຂຶ້ນກັບລະບົບການກວດໂຄວິດ-19 ຂອງທາງຈີນ.
ສ່ວນປະເດັນອີກເລື່ອງໜຶ່ງ ທີ່ວ່າມີສິນຄ້າຈາກຈີນເຂົ້າໄທເປັນຈໍານວນຫຼາຍ ຜ່ານທາງລົດໄຟ ລາວ-ໄຟ ແມ່ນແທ້ ຫຼື ບໍ່? ທາງທີ່ປຶກສາລັດຖະມົນຕີວ່າການກະຊວງກະເສດ ແລະ ສະຫະກອນໄທໄດ້ຊີ້ແຈງວ່າ ບໍ່ມີໝາກໄມ້ຈາກຈີນເຂົ້າມາໃນໄທຢ່າງແນ່ນອນ ຍ້ອນໄທຍັງບໍ່ໄດ້ອະນຸຍາດໃຫ້ນໍາເຂົ້າຜ່ານດ່ານໜອງຄາຍ, ແຕ່ສິນຄ້າກະເສດທີ່ເຂົ້າມານັ້ນແມ່ນພືດຜັກ ເຊິ່ງເປັນການທົດລອງສົ່ງທີ່ຜູ້ປະກອບການຈາກຈີນບໍ່ໄດ້ກໍາໄລ ແລະ ຍັງຂາດທຶນນໍາອີກ. ເພາະວ່າການຂົນສົ່ງພຽງແຕ່ຂາດຽວບໍ່ສາມາດສ້າງກໍາໄລໄດ້ ແລະ ລາຄາຜັກຍັງຕໍ່າອີກດ້ວຍ.