ເວັບໄຊ CNN ລາຍງານ: ການຮົ່ວໄຫຼຂອງນໍ້າມັນທີ່ເກີດຈາກໂຮງກັ່ນຂະໜາດໃຫຍ່ໃນຊີເຣຍ ກຳລັງແຜ່ກະຈາຍໄປທົ່ວທະເລເມດີເຕຣາເນຍໃນຂະນະນີ້ ເຊິ່ງຄາດວ່າຄາບນໍ້າມັນຈະໄຫຼໄປຮອດເກາະໄຊປຣັສແລ້ວ.

ເຈົ້າໜ້າທີ່ຊີເຣຍກ່າວວ່າ: ຖັງບັນຈຸນໍ້າມັນຂະໜາດ 15.000 ໂຕນ ທີ່ໂຮງໄຟຟ້າພະລັງງານຄວາມຮ້ອນແຫ່ງໜຶ່ງໃນເມືອງບານີຢາສ (Baniyas) ປະເທດຊີເຣຍໄດ້ເກີດການຮົ່ວໄຫຼຕັ້ງແຕ່ວັນທີ 23 ສິງຫາຜ່ານມາ ເຖິງແມ່ນທາງການຈະກ່າວອ້າງວ່າ ສາມາດຄວບຄຸມຮອຍຮົ່ວໄດ້ ແຕ່ຄວາມຈິງແລ້ວ ສະພາບການຮົ່ວໄຫຼຂອງນໍ້າມັນແມ່ນມີຂະໜາດໃຫຍ່ ແລະ ຄວບຄຸມພື້ນທີ່ປະມານ 800 ຕາຕະລາງກິໂລແມັດ. ເຊິ່ງໃນວັນທີ 31 ສິງຫາ, ຄາບນໍ້າມັນດັ່ງກ່າວຫ່າງຈາກແຄມຝັ່ງໄຊປຣັສປະມານ 7 ກິໂລແມັດເທົ່ານັ້ນ.

ໂຮງກັ່ນບານີຢາສ ເປັນແຫຼ່ງຜະລິດເຊື້ອໄຟຫຼັກຂອງຊີເຣຍ ແລະ ມີຄວາມສຳຄັນເປັນຢ່າງຍິ່ງຕໍ່ບັນດາປະເທດທີ່ຂາດພະລັງງານເຊື້ອໄຟ.