ຫຼັງຈາກເຈົ້າໜ້າທີ່ຈາກອົງການອະນາໄມໂລກກ່າວໃນວັນທີ 10 ພຶດສະພາ 2021 ວ່າການລະບາດຂອງໂຄວິດ-19 ສາຍພັນ B.1.617 ໄດ້ຖືກກວດພົບເປັນຄັ້ງທຳອິດໃນປະເທດອິນເດຍເມື່ອເດືອນຕຸລາ 2020, ເປັນສາຍພັນທີ່ “ໜັ້າກັງວົນລະດັບໂລກ” ເນືື່ອງຈາກວ່າປັດຈຸບັນພົບການແຜ່ລະບາດຂອງສາຍພັນນີ້ໃນ 44 ປະເທດທົ່ວໂລກ.
ຜົນຂອງການສຶກສາເບື້ອງຕົ້ນໄດ້ສະແດງໃຫ້ເຫັນວ່າເຊື້ອໄວຣັດດັ່ງກາວແຜ່ລະບາດໄດ້ຫຼາຍກ່ວາເຊື້ອໄວຣັດດັ່ງເດີມ ແລະ ມີຫຼັກຖານທີ່ບົ່ງບອກວ່າອາດຫຼົບລ້ຽງພູມຄຸ້ມກັນຂອງຮ່າງກາຍທີ່ເກີດຈາກໄວຣັດ ຫຼື ການຕິດເຊື້ອມາກ່ອນໄດ້ອີກດ້ວຍ. ແນວໃດກໍ່ຕາມກໍ່ຍັງຕ້ອງມີການສຶກສາເພີ່ມເຕີມ ແລະ ຂໍ້ມູນປັດຈຸບັນຍັງຖືວ່າວັກຊີນຍັງຄົງມີປະສິດທິພາບໃນການປ້ອງກັນໂຣກ ແລະ ການເສຍຊີວິດໄດ້.
ນອກຈາກນີ້, ຍັງມີໄວຣັດກາຍພັນອີກສາຍພັນໜຶ່ງທີ່ພົບໃນອິນເດຍຄື: B.1.618 ເຊິ່ງມີການກາຍພັນເຖິງ 3 ຕຳແໜ່ງ E484K ແລະ D614G ແລະ ກົດອະມິໂນ H146 ແລະ Y145 ໄດ້ຫາຍໄປ ເຊິ່ງເຮັດໃຫ້ໄວຣັດສາມາດແຜ່ລະບາດໄດ້ໄວຂຶ້ນ ແລະ ຫຼົບຫຼີກພູມຄຸ້ມກັນຂອງມະນຸດໄດ້ດີຂຶ້ນກວ່າເກົ່າ.
ຫຼ້າສຸດ, ອົງການອານາໄມໂລກປະກາດວ່າ ພົບເຊື້ອກາຍພັນ B.1.617 ຫຼາຍກ່ວາ 4,500 ກໍລະນີ ໄດ້ຖືກພົບເຫັນຢູ່ໃນ 44 ປະເທດຈາກ 6 ຂົງເຂດຂອງອົງການອະນາໄມໂລກ. ອັງກິດແມ່ນປະເທດທີ່ມີການສົ່ງເຊື້ອໄວຣັດສູງທີ່ສຸດຮອງລົງມາຈາກອິນເດຍ.
ຮຽບຮຽງຂ່າວ: ພຸດສະດີ