ບັນດາຜູ້ນຳຈາກປະເທດຕ່າງໆໃນອາຊຽນໄດ້ພົບປະກັບນາຍພົນລະດັບສູງຂອງມຽນມາທີ່ນະຄອນຫຼວງຈາກາຕາສຳລັບຈັດກອງປະຊຸມສຸດຍອດສຸກເສີນໃນວັນເສົາເພື່ອປຶກສາຫາລືກ່ຽວກັບການຢຸດຕິການໃຊ້ຄວາມຮຸນແຮງໃນປະເທດ.
ພົນເອກ ມິນ ອອງ ຫຼ່າຍ ຂອງມຽນມາໄດ້ເດີນທາງຮອດສິງກະໂປໃນຕອນເຊົ້າວັນເສົາເພື່ອປຶກສາຫາລືກັບປະທານາທິບໍດີແລະນາຍົກລັດຖະມົນຕີຈາກ 6 ປະເທດອາຊຽນອື່ນໆ.
ທ່ານ ສະເຫຼີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ເຊິ່ງຖືກມອບ ໝາຍເປັນຜູ້ຕາງ ໜ້າພິເສດຂອງ ພະນະທ່ານ ພັນຄໍາ ວິພາວັນ ນາຍົກລັດຖະ ມົນຕີແຫ່ງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມຜູ້ນໍາອາຊຽນ ເຊິ່ງໄດ້ຈັດຂຶ້ນໃນວັນທີ 24 ເມສາ 2021 ທີ່ສໍານັກງານກອງເລຂາ ອາຊຽນ ນະຄອນຫຼວງຈາກາຕາ ສາທາລະນະລັດອິນໂດເນເຊຍ ພາຍໃຕ້ການເປັນປະທານ ຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມໃນຖານະ ປະທານໝູນວຽນອາຊຽນ ປີ 2021.
ບັນດາຜູ້ນຳອາຊຽນຮຽກຮ້ອງໃຫ້ຢຸດຕິການສັງຫານໂດຍກົດດັນໃຫ້ນາຍພົນມິນ ອອງ ຫຼ່າຍ ຍອມຮັບເອົາຄວາມເຫັນດີເຫັນພ້ອມ 5 ຂໍ້ ເພື່ອຢຸດຕິການໃຊ້ຄວາມຮຸນແຮງ ແລະ ລິເລີ່ມການສົນທະນາແບບສ້າງສັນພ້ອມທັງຍອມຮັບການຊ່ວຍເຫຼືອດ້ານມະນຸດສະທຳ.
ມະຕິຕົກລົງທັງ 5 ຂໍ້ປະກອບມີດັ່ງນີ້:
ອີງຕາມຄວາມເຫັນດີເຫັນພ້ອມ, ຄວາມຮຸນແຮງໃນມຽນມາຈະຢຸດເຊົາໃນທັນທີ ແລະ ທຸກຝ່າຍຈະໃຊ້ຄວາມອົດທົນຢ່າງເຕັມທີ່.
ລະຫວ່າງທຸກຝ່າຍທີ່ກ່ຽວຂ້ອງຕ້ອງເລີ່ມຊອກຫາມາດຕະການແກ້ໄຂໂດຍສັນຕິວິທີເພື່ອຜົນປະໂຫຍດຂອງປະຊາຊົນ.
ທູດພິເສດຂອງປະທານອາຊຽນຈະອຳນວຍຄວາມສະດວກໃຫ້ແກ່ການໄກ່ເກ່ຍຂອງຂະບວນການເຈລະຈາໂດຍການຊ່ວຍເຫຼືອຂອງເລຂາທິການໃຫຍ່ອາຊຽນ.
ອາຊຽນຈະໃຫ້ການຊ່ວຍເຫຼືອດ້ານມະນຸດສະທຳໂດຍຜ່ານສູນປະສານງານອາຊຽນ ສຳລັບການຄຸ້ມຄອງໄພພິບັດ (AHA), ເຊິ່ງເປັນອົງການລັດຖະບານທີ່ ອຳນວຍຄວາມສະດວກໃຫ້ແກ່ການຮ່ວມມືລະຫວ່າງສະມາຊິກອາຊຽນ ແລະ ສະຫະປະຊາຊາດກ່ຽວກັບການຄຸ້ມຄອງແລະຫຼຸດຜ່ອນໄພພິບັດ.
ທູດພິເສດ ແລະ ຄະນະຜູ້ແທນຈະໄປຢ້ຽມຢາມມຽນມາເພື່ອພົບປະກັບທຸກຝ່າຍທີ່ກ່ຽວຂ້ອງ.
CNA ລາຍງານວ່າ ຄຳປາໄສຂອງຜູ້ນຳມາເລເຊຍທ່ານ Muhyiddin Yassin ຮຽກຮ້ອງໃຫ້ຢຸດຕິການໃຊ້ຄວາມຮຸນແຮງຕໍ່ພົນລະເຮືອນ, ການປ່ອຍຕົວນັກໂທດການເມືອງ ແລະ ໃຫ້ປະທານອາຊຽນ ແລະ ເລຂາທິ ການໃຫຍ່ອາຊຽນໄດ້ຮັບການເຂົ້າເຖິງມຽນມາລວມເຖິງທຸກຝ່າຍທີ່ກ່ຽວຂ້ອງ. ຈຳນວນຜູ້ເສຍຊີວິດໃນມຽນໄດ້ເພີ່ມຂື້ນເປັນຫຼາຍກ່ວາ 550 ຄົນນັບຕັ້ງແຕ່ການປະທ້ວງໄດ້ເລີ້ມຂຶ້ນຫຼັງຈາກທະຫານໄດ້ເຂົ້າກຳອຳນາດໃນວັນທີ 1 ກຸມພາປີນີ້.
ປະເທດລາວໄດ້ອອກຖະແຫຼງການຢ່າງເປັນທາງການກ່ຽວກັບມຽນມາໂດຍຜ່ານກະຊວງການຕ່າງປະເທດໃນວັນທີ 15 ມີນາ ທີ່ຜ່ານມາ, ໂດຍກ່າວເນັ້ນເຖິງຄວາມສຳຄັນຂອງການຮັກສາສະຖຽນລະພາບທາງການເມືອງໃນທຸກໆປະເທດສະມາຊິກອາຊຽນເພື່ອຮັບປະກັນໃຫ້ປະຊາຄົມອາຊຽນມີຄວາມໝັ້ນຄົງ, ສະຫງົບສຸກ ແລະຈະເລີນຮຸ່ງເຮືອງ.
ຮຽບຮຽງຂ່າວ: ພຸດສະດີ