ສຳນັກຂ່າວຕ່າງປະເທດລາຍງານຈາກນະຄອນຫຼວງເນປີດໍ ປະເທດມຽນມາ ໃນວັນທີ 18 ກຸມພານີ້ວ່າທ່ານ ທ່ານ ຂິ່ນ ໜ່ອງ ຈໍ ທະນາຍຄວາມຂອງທ່ານນາງອອງຊານຊູຈີ ແລະ ອະດີດປະທານາທິບໍດີ ວິນ ມະຢິນ ກ່າວວ່າທັງສອງໄດ້ຖືກກັກຂັງຢູ່ສະຖານທີ່ແຫ່ງໜຶ່ງ. ໃນຂະນະໃຫ້ປາກຄຳຄັ້ງທຳອິດຜ່ານລະບົບການໂທດ້ວຍວິດີໂອ ເມື່ອວັນອັງຄານທີ່ຜ່ານມາ ໂດຍທ່ານນາງ ອອງ ຊານ ຊູຈີຕົກເປັນຈຳເລີຍ 2 ຄະດີ ຄື: ການລັກລອບນຳເຂົ້າ ແລະ ຄອບຄອງວິທະຍຸສື່ສານ ແລະ ການລະເມີດກົດໝາຍບໍລິຫານຈັດການໄພພິບັດ.
ທ່ານ ທ່ານ ຂິ່ນ ໜ່ອງ ຈໍ ໄດ້ກ່າວວ່າຕົວເຂົາ ແລະ ທີມງານບໍ່ສາມາດເຂົ້າຮ່ວມຮັບຟັງການໄຕ່ສວນ ແລະ ໃຫ້ການແກ້ຕ່າງຕໍ່ສານໄດ້ດ້ວຍເຫດວ່າ ຝ່າຍຈຳເລີຍແຕ່ງຕັ້ງທະນາຍຄວາມບໍທັນພາຍໃນເວລາທີ່ກຳນົດ ແຕ່ໄດ້ຍື່ນຄຳຮ້ອງຕໍ່ສານ ເພື່ອຂໍອະນຸຍາດພົບກັບລູກຄວາມທັງສອງ ແລະ ສົນທະນາກັນແບບສ່ວນຕົວບໍ່ແມ່ນຜ່ານທາງໂທລະສັບ ເນື່ອງຈາກມີຄວາມກັງວົນໃນເລື່ອງຄວາມປອດໄພ ທີ່ລວມເຖິງການຖືກດັງຟັງ ແລະ ໄດ້ຮັບແຈ້ງກັບມາພຽງວ່າ ທ່ານ ນາງ ຊູຈີ ແລະ ທ່ານ ວິນ ມະຢິນ ຈະຖືກຄຸມຕົວຕໍ່ໄປຈົນເຖິງກຳນົດວັນຂຶ້ນສານຄັ້ງຕໍ່ໄປຄືວັນທີ 1 ມີນານີ້.
ທີ່ຜ່ານມາກອງທັບມຽນມາໄດ້ເພີ່ມທະວີຄວາມພະຍາຍາມເພື່ອການຢຸດຕິການລົນນະລົງພັກວຽກຂອງປະຊາຊົນຫຼາຍສາຂາອາຊີບເພື່ອຮຽກຮ້ອງໃຫ້ປ່ອຍຕົວຜູ້ທີ່ຖືກກອງທັບທະຫານມຽນມາຈັບກຸມຕົວ ລວມເຖິງທ່ານ ນາງ ອອງ ຊານ ຊູຈີ ຫຼັງຈາກເກີດລັດຖະປະຫານ.
ຕາມຂ່າວຈາກ ນະຄອນຢ່າງກຸ້ງ, ເມື່ອບໍ່ດົນມານີ້, ຜູ້ປະທ້ວງ ຕໍ່ຕ້ານ ກອງທັບ ມຽນມາ ໄດ້ຂັດຂວາງ ການໃຫ້ບໍລິການ ຂອງຂະບວນ ລົດໄຟ ຈາກນະຄອນ ຢ່າງກຸ້ງ ໄປສູ່ ເມືອງມະລະແໝ່ງ ເຊິ່ງເປັນໜຶ່ງ ໃນເມືອງໃຫຍ່ ທາງຕາເວັນອອກ ສ່ຽງໃຕ້ ເພື່ອສືບຕໍ່ ສະແດງ ຈຸດຢືນ ຂອງການບໍ່ເຊື່ອຟັງ ຂອງພົນລະເຮືອນ ບໍ່ຍອມຮັບເອົາ ລັດຖະບານ ທີ່ມາຈາກ ທະຫານ ເຮັດລັດຖະປະຫານ. ການຊຸມນຸມຄັ້ງນີ້ ໄດ້ເພີ່ມ ຄວາມຮຸນແຮງຂຶ້ນ ເປັນວົງກວ້າງ ໃນຫລາຍພື້ນທີ່ ທົ່ວປະເທດ ມຽນມາ.ຂະນະນີ້ ເຈົ້າໜ້າທີ່ ກ່ຽວຂ້ອງ ຂອງທະຫານ ມຽນມາ ໄດ້ຈັບກຸມ ຜູ້ປະທ້ວງໄປແລ້ວ 400 ກວ່າຄົນ ເພື່ອຄວບຄຸມ ສະຖານະການ ປະທ້ວງ ທີ່ນັບມື້ ຮຸນແຮງຂຶ້ນ ຢ່າງຕໍ່ເນື່ອງ ກາຍເປັນບັນຫາທ້າທາຍ ໃນການປົກຄອງ ພາຍໃນປະເທດ ມຽນມາ.
ເມື່ອວັນທີ 17 ກຸມພາ 2021 ສື່ທ້ອງຖິ່ນຫຼາຍສຳນັກຂອງມຽນມາລາຍງານວ່າ ກອງທັບມຽນມາອອກໝາຍຈັບສະມາຊິກສະພາຜູ້ແທນປະຊາຊົນ 15 ຄົນ ສັງກັດພັກສັນນິບາດແຫ່ງຊາດເພື່ອປະຊາທິປະໄຕ ແລະ ພັກການເມືອງຂອງຊົນເຜົ່າໃນລັດກະຍາ ແລະ ລັດສານ ພັກລະ 1 ຄົນ ເຊິ່ງລວມຕົວກັນສາບານຕົນນອກສະພາ ແລະ ສ້າງຕັ້ງຄະນະກຳມະການບໍລິຫານຂອງບັນດາສະມາຊິກສະພາ, ທັງໝົດ 17 ຄົນທີ່ມີຄວາມຜິດ “ກະບົດ”.
ຮຽບຮຽງຂ່າວ: ພຸດສະດີ