ອີງຕາມການລາຍງານ ຂອງ Channel News Asia ກອງທັບມຽນມາ ໄດ້ລົບລ້າງລັດຖະບານທີ່ມາຈາກການເລືອກຕັ້ງ ຂອງ ທ່ານ ນາງ ອອງຊານ ຊູຈີ ຜູ້ນຳພັກລັດຖະບານຂອງພັກສັນນິບາດແຫ່ງຊາດເພື່ອປະຊາທິປະໄຕ (NLD) ຫຼັງກໍການລັດຖະປະຫານໄດ້ເຂົ້າກຳອຳນາດ ໂດຍການປົດລັດຖະມົນຕີວ່າການກັບລັດຖະມົນຕີຊ່ວຍ 24 ທ່ານ ອອກຈາກຕຳແໜ່ງ ແລະແຕ່ງຕັ້ງໃໝ່ 11 ທ່ານ ເຂົ້າມາແທນ.
ເຫດການຄັ້ງນີ້ ໄດ້ປະກາດຜ່ານໂທລະພາບ Myawadday ໂທລະພາບຂອງກອງທັບມຽນມາ ໂດຍຜູ້ທີ່ໄດ້ຮັບການແຕ່ງຕັ້ງໃໝ່ຈະເປັນຜູ້ຄວມຄຸມກະຊວງການເງິນ, ສາທາລະນະສຸກ, ຂໍ້ມູນຂ່າວສານ, ການຕ່າງປະເທດ, ປ້ອງກັນປະເທດ, ຊາຍແດນ ແລະ ພາຍໃນ.
ການກໍ່ລັດຖະປະຫານ ໃນມຽນມາ ເກີດຂື້ນໃນຂະນະທີ່ລັດຖະບານຊຸດໃໝ່ ຂອງ ພັກ NLD ໄດ້ຮັບໄຊຊະນະໃນການເລືອກຕັ້ງ ເມື່ອເດືອນພະຈິກຜ່ານມາ ດ້ວຍຄະແນນສຽງ 83%, ກຳລັງຈະເປີດກອງປະຊຸມສະພາຄັ້ງທຳອິດ ໂດຍຖະແຫຼງການຂອງກອງທັບກ່າວວ່າ ພົບເຫັນການສໍ້ໂກງໃນບັນຊີລາຍຊື່ຂອງຜູ້ມີສິດເລືອກຕັ້ງ ແລະ ລັດຖະບານໄດ້ປະຕິເສດຄຳຮຽກຮ້ອງຂອງພວກເຂົາ ທີ່ຈະໃຫ້ເລື່ອນການເປີດກອງປະຊຸມໄປກ່ອນ ສະນັ້ນຈຶ່ງໄດ້ຍຶດອຳນາດ ແລະ ປະກາດພາວະສຸກເສີນພາຍໃຕ້ມາດຕາທີ່ 417-418 ເປັນເວລາ 1 ປີ.
ທ່ານ ນາງ ອອງຊານຊູຈີ ຜູ້ນຳພັກສັນນິບາດແຫ່ງຊາດເພື່ອປະຊາທິປະໄຕ (NLD) ແລະທີ່ປຶກສາແຫ່ງລັດ ລວມທັງປະທານາທິບໍດີ ອູ ວິນ ມິນ ແລະຜູ້ນຳພັກ NLD ທີ່ສຳຄັນຫຼາຍຄົນໄດ້ຖືກທະຫານຈັບກຸມ ເຮືອນພັກຮັບຮອງຂອງລັດຖະບານ ເຊິ່ງເປັນທີ່ພັກຂອງຊະມາຊິກພັກນິຕິບັນຍັດໃນ Nay Pyi Taw ກໍ່ໄດ້ຖືກກອງທັບປີດລ້ອມ ແລະ ຕັດສັນຍານອິນເຕີເນັດໃນຕອນເຊົ້າ ກ່ອນຈະກັບມາໃຊ້ໄດ້ເປັນປົກກະຕິຢູ່ບາງພື້ນທີ່ໃນຕອນທ່ຽງ ແຕ່ການໃຫ້ບໍລິການໂທລະສັບເຄື່ອນທີ່ແມ່ນຍັງບໍ່ສາມາດນໍາໃຊ້ໄດ້.