ນັກວິທະຍາສາດຕາມສຶກສາເຊື້ອໂຄວິດ-19 ພົບການພັນແລ້ວເຖິງ 7 ສາຍພັນ ຫຼັງເກີດການລະບາດຂ້າມປີ, ທົ່ວໂລກມີຍອດຕິດເຊື້ອທົ່ວໂລກ 73,760,333 ຄົນ ແລະ ເສຍຊີວິດ 1,640,046 ຄົນ, ຕອນນີ້ສາຍພັນ G ກຳລັງລະບາດທົ່ວໂລກ.
ເມື່ອວັນທີ 10 ທັນວາ ທີ່ຜ່ານມາ ສຳນັກຂ່າວຣອຍເຕີ ລາຍງານ ການພັດທະນາການຂອງເຊື້ອໄວຣັສໂຄໂຣນາສາຍພັນໃໝ່ 2019 ຫຼື ໂຄວິດ-19 ທີ່ລະບາດໃຫຍ່ທົ່ວໂລກ ຫຼັງຈາກເລີ່ມແຜ່ລະບາດທີ່ເມືອງອູ່ຮັ່ນ ມົນທົນຫູເປີ່ຍ ຂອງຈີນ ຕັ້ງແຕ່ທ້າຍປີ 2019 ເຮັດໃຫ້ທົ່ວໂລກມີຍອດຜູ້ເສຍຊີວິດ 1.5 ລ້ານຄົນ ເຊື້ອໂຄວິດ-19 ມີການກາຍພັນແລ້ວເຖິງ 7 ສາຍພັນ ເພື່ອມັນຕ້ອງປັບຕົວໃຫ້ເຂົ້າກັບສະພາບຮ່າງກາຍຂອງມະນຸດ.
ການຕິດຕາມ ແລະ ທຳຄວາມເຂົ້າໃຈໃນການປ່ຽນແປງເຫຼົ່ານີ້ຂອງໄວຣັສ ຖືເປັນເລື່ອງສຳຄັນໃນການພັດທະນາກົນລະຍຸດເພື່ອຕໍ່ສູ້ກັບໂຣກໂຄວິດ-19.
ຣອຍເຕີໄດ້ວິເຄາະຕົວຢ່າງຂອງຢີນກວ່າ 185,000 ຢືນຈາກ Initiative on Sharing All Influenza Data (GISAID) ເຊິ່ງເປັນຖານຂໍ້ມູນຂອງຢີນເຊື້ອໂຄວິດ-19 ທີ່ໃຫຍ່ທີ່ສຸດໃນໂລກ ໄດ້ສະແດງໃຫ້ເຫັນເຖິງວິທີການທີ່ສາຍພັນສຳຄັນຂອງເຊື້ອໂຄວິດ-19 ໄດ້ປ່ຽນແປງໄປຕາມເວລາ.
ສາຍພັນດັ່ງເດີມຂອງເຊື້ອໂຄວິດ-1 ທີ່ພົບການລະບາດຄັ້ງທຳອິດໃນເມືອງອູ່ຮັ່ນ ເມື່ອເດືອນທັນວາ 2019 ເປັນສາຍພັນ L ຈາກນັ້ນ ເຊື້ອໄດ້ກາຍພັນເປັນສາຍພັນ S ເມື່ອຕົ້ນປີ 2020 ຕໍ່ມາໄດ້ກາຍພັນເປັນສາຍພັນ V ແລະ G ເຊິ່ງສາຍພັນ G ຍັງກາຍພັນໄປເປັນສາຍພັນ GR, GH ແລະ GV ສ່ວນການກາຍພັນທີ່ບໍ່ພົບເຫັນຫຼາຍແມ່ນຖືກຈັດລວມເຂົ້າກັນເປັນສາຍພັນ O.
ປັດຈຸບັນ, ໂຄວິດ-19 ສາຍພັນ G ໄດ້ລະບາດທົ່ວໂລກ ເຊິ່ງກາຍພັນທີ່ສະເພາະຄັ້ງໜຶ່ງທີ່ຮຽກວ່າ D614G ໄດ້ກາຍເປັນສາຍພັນແຕກຕ່າງທີ່ພົບຫຼາຍທີ່ສຸດ ໃນຂະນະທີ່ນັກວິທະຍາສາດຍັງມີຄວາມເຫັນບໍ່ຕົງກັນວ່າເຊື້ອໂຄວິດສາຍພັນ D614G ສາມາດລະບາດໄດ້ງ່າຍຂຶ້ນ ເພາະຜົນຈາກການສຶກສາອື່ນໆ ຍັງມີຄວາມຂັດແຍ້ງໃນເລື່ອງນີ້ຢູ່ ສ່ວນການກາຍພັນຂອງເຊື້ອໂຄວິດ-19 ເມື່ອມໍ່ໆນີ້ ຄື: ສາຍພັນ GV ເຊິ່ງປັດຈຸບັນໄດ້ເປັນສາຍພັນທີ່ຖືກແຍກໄປລະບາດໃນເອີຣົບ ເຊິ່ງຜູ້ຊ່ຽວຊານຍັງບໍ່ແນ່ໃຈວ່າເຊື້ອໂຄວິດສາຍພັນ GV ເຂົ້າມາລະບາດໃນເອີຣົບໄດ້ແນວໃດ.
ເຖິງຢ່າງໃດກໍ່ຕາມ, ການປ່ຽນແປງຂອງເຊື້ອໂຄວິດ-19 ທຸກສາຍພັນຍັງບໍ່ສາມາດຕໍ່ຕ້ານລິດຢາວັກຊີນທີ່ກຳລັງພັດທະນາໄດ້ເທື່ອ ສິ່ງທີ່ນັກວິທະຍາສາດຢາກເຮັດຄືການພະຍາຍາມເຮັດໃຫ້ການລະບາດຂອງ ໂຄວິດ-19 ຊ້າລົງ, ເພາະວ່າຖ້າສາຍພັນຂອງ ໂຄວິດ-19 ມີ ມີການປ່ຽນແປງເລື້ອຍໆ ໂດຍສະເພາະແມ່ນບໍລິເວນ ໜາມໂປຣຕິນຮອບເຊລ ໂຄວິດ-19 ອາດຈະຕໍ່ຕ້ານກັບວັກຊີນໄດ້.
ຮຽບຮຽງຂ່າວ: ພຸດສະດີ