ບຸນຫໍ່ເຂົ້າປະດັບດິນໃນປີ 2020 ນີ້ ກົງກັບວັນທີ 18 ສິງຫາ ນັ້ນກໍ່ຄືມື້ອື່ນ ເຊິ່ງມັນເປັນວັນໜຶ່ງທີ່ສຳຄັນທາງພດທະສາດສະໜາ ເຊິ່ງຈັດຢູ່ໃນຮີດທີ 9 ຂອງ ຮີດ 12 ປະເພນີບຸນຫໍ່ເຂົ້າປະດັບດິນ ກຳນົດຂຶ້ນຜ່ານມາຫຼາຍຮ້ອຍປີ ຫຼາຍຊົ່ວອາຍຸຄົນ ປະເພນີ້ກໍມີການປັບປ່ຽນ ແລະ ວິວັດທະນາການເພື່ອໃຫ້ແທດເໝາະກັບສັງຄົມຍຸກປັດຈຸບັນທີ່ຕ້ອງການຄວາມສະດວກສະບາຍ. ນອກຈາກນີ້ແລ້ວ ວິຖີການຢາດນໍ້າຫຼັງຈາກໃສ່ບາດກໍ່ມີການປະຕິບັດຕາມກະແສ ຈົນກາຍເປັນອີກໜຶ່ງຄວາມເຊື່ອທີ່ສົ່ງຜົນກະທົບຕໍ່ສະພາບແວດລ້ອມ ແລະ ກໍ່ໃຫ້ເກີດຂີ້ເຫຍື້ອຫຼັງທຳບຸນ.
ປະເດັນຫຼັກທີ່ລາວໂພສຈະຍົກຂຶ້ນມາກ່າວໃນວັນນີ້ມີຢູ່ 2 ປະເດັນຄັນຄື: ຫໍ່ເຂົ້າຍາຍດ້ວຍພລາສຕິກ ແລະ ວາງເຂົ້າ-ເຂົ້າຕົ້ມເຂົ້າໜົມລົງພື້ນໃນເວລາຍາດນໍ້າລວມເຖິງການນໍາຄຳເຂົ້າຕິດໃສ່ພຣະພຸດທະ ຮູບ.
ວ່າດ້ວຍເລື່ອງຫໍ່ເຂົ້າຍາຍ ຈາກເມື່ອກ່ອນທີ່ຫໍ່ເຂົ້າໃຊ້ພຽງແຕ່ໃບຕອງກ້ວຍ ແລະ ໃບບົວໃນການຫໍ່ ປັດຈຸບັນກໍເກີດມີການນຳໃຊ້ພລາສຕິກ “ກ່ອງໂຟມ” ຫຼື “ຖ້ວຍໂຟມ” ເພື່ອບັນຈຸອາຫານຫວານຄາວ ທີ່ໃຊ້ໃນການບູຊາ, ຄືກັບຫຼາຍຄົນຮູ້ກັນດີແລ້ວວ່າ ໃນປັດຈຸບັນ, ປະເທດລາວ ແລະ ຫຼາຍປະເທດທົ່ວ ໂລກ ແມ່ນໃຫ້ຄວາມສຳຄັນໃນການລົນນະລົງ ຫຼດຜ່ອນການໃຊ້ພລາສຕິກ ເພື່ອປ້ອງກັນຂີ້ເຫຍື້ອລົ້ນໂລກຈາກພລາສຕິກ ແຕ່ກໍ່ຍັງມີຄົນກຸ່ມໜຶ່ງທີ່ຍັງຖືເບົາບໍ່ເຫັນຄວາມສຳຄັນໃນການຮັກສາສິ່ງ ແວດ ລ້ອມ ແລະ ຍັງນຳໃຊ້-ສົ່ງເສີມການໃຊ້ພລາສຕິກກັນຢູ່ ແມ່ຄ້າໃນຕະຫຼາດບາງຄົນຍັງໃຊ້ຖ້ວຍໂຟມຫຸ້ມຫໍ່ ລູກຄ້າບາງຄົນກໍ່ຍັງຄົງຊື້ມາໃຊ້ ເຊິ່ງເປັນຂະບວນການແບບຕ່ອງໂສ້ງມີທັງຜູ້ສະເໜີ ແລະ ຜູ້ສະໜອງ ດ້ວຍປັດໄຈເຫຼົ່ານີ້ ດັ່ງນັ້ນ, ຈຶ່ງເຮັດໃຫ້ແຕ່ລະປີ ຍັງຄົງມີພາບພລາສຕິກຂາວເຕັມສະຖານທີ່ວັດ, ຖະໜົນຫົນທາງ ແລະ ສະຖານທີ່ຕ່າງໆ ໃນວັນຫໍ່ເຂົ້າປະດັບດິນ.
ການວາງເຂົ້າ-ເຂົ້າຕົ້ມເຂົ້າໜົມລົງພື້ນໃນເວລາຍາດນໍ້າລວມເຖິງການນໍາຄຳເຂົ້າຕິດໃສ່ພຣະພຸດທະ ຮູບນັ້ນ ມັນກາຍເປັນພາບລິ້ງຕາຂອງທຸກຄົນໄປແລ້ວ ແລະ ມັນກໍ່ກາຍເປັນພຶດຕິກຳຮຽນແບບທີ່ຂະຫຍາຍເປັນວົງກວ້າງທົ່ວສັງຄົມ ເຊິ່ງພຶດຕິກຳດັ່ງກ່າວມັນເກີດຂຶ້ນຈາກຄວາມເຊື້ອສ່ວນບຸກຄົນ ແຕ່ມັນອາດຂັດກັບແນວທາງແກ່ນແທ້ຂອງສາດສະໜາ ແລະ ອາດເຮັດໃຫ້ຄົນຮຸ້ນຫຼັງເກີດຄວາມເຂົ້າໃຈຜິດໄປຕາມໆກັັນ.
ພຣະໃນວັດແຫ່ງໜຶ່ງ ຢູ່ ສປປ ລາວ ໄດ້ອອກມາໂພສຂໍ້ຄວາມວ່າ “ບໍ່ກ້າບອກ ຈະເຮັດແນວໃດດີ… ຢາກບອກຍາດໂຍມຢູ່ວ່າ: ພາຍຫຼັງທຳບຸນອຸທິດຢາດນໍ້າແຜ່ເມດຕາແລ້ວ ເມື່ອເອົານໍ້າຢາດໄປເທລົງດິນ ບໍ່ຢາກໃຫ້ເພິ່ນເອົາເຂົ້າສຸກ ເຂົ້າຕົ້ມ ເຂົ້າໜົມຢາຍໃສ່ຕາມບ່ອນທີ່ເພິ່ນເທນໍ້າຢາດນັ້ນ ມັນບໍ່ມີຢູ່ໃນລະບຽບພິທີການເຮັດບຸນ, ເສຍດາຍ, ສົກກະປົກສະຖານທີ່, ຜູ້ເກີດໃໝ່ກໍຈະເຮັດຕາມໆກັນ, ແຕ່ບໍ່ກ້າບອກດອກ ຢ້ານຍາດໂຍມຄຽດໃຫ້, ຖືກໃຈ ແຕ່ບໍ່ຖືກຕ້ອງ, ຖືກຕ້ອງ ແຕ່ບໍ່ຖືກໃຈ.
ການບູຊາຫໍ່ເຂົ້າປະດັບດິນ ມີມາແຕ່ບູຮານ (ເຮັດເປັນຫໍ່ດີງາມ) ການຢາດນໍ້າ ມີມາແຕ່ບູຮານ (ມີພາຊະນະທີ່ສະອາດຮອງຮັບ ຫຼື ດິນບ່ອນສະອາດດີ) ແຕ່ການເອົາເຂົ້າສຸກ ເຂົ້າຕົ້ມ ເຂົ້າໜົມ ໄປວາງລົງດິນ ບ່ອນທີ່ຈະເທນໍ້າທີ່ຢາດແລ້ວ ຫຼື ແມ່ນແຕ່ການນຳເຂົ້າສຸກໄປຕິດຕາມພຣະພຸດທະຮູບ ເປັນຄ່ານິຍົມໃໝ່ ເຫັນປາກົດມາບໍ່ພໍເທົ່າໃດປີນີ້ເອງ, ທີ່ກ່າວມານັ້ນກໍບໍ່ໄດ້ຕຳໜິວ່າຜິດ ແລະ ບໍ່ໄດ້ຍ້ອງວ່າຖືກ ເປັນພຽງແຕ່ນຳສະເໜີ ເພື່ອຜູ້ມີສັດທາບວກດ້ວຍປັນຍາ ຈະນຳໄປພິຈາລະນາຫາເຫດຜົນ ຄົ້ນຄວ້າຫາສິ່ງທີ່ດີງາມ ແລະສົມຄວນປະຕິບັດສືບຕໍ່ໄປ.
ບົດໂດຍ: ພຸດສະດີ