ນັບແຕ່ຕົ້ນເດືອນມິຖຸນາ 2020 ອັດຕາແລກປ່ຽນລະຫວ່າງເງິນກີບກັບສະກຸນເງິນບາດ ແລະ ໂດລາສະຫະລັດ ໄດ້ເໜັງຕີງແຮງຂຶ້ນ ເຮັດໃຫ້ເງິນກີບອ່ອນຄ່າແຮງ ໃນວັນທີ 17 ມິຖຸນານີ້ ອີງຕາມອັດຕາແລກປ່ຽນ ຈາກທະນາຄານການຄ້າຕ່າງປະເທດລາວ ມະຫາຊົນ ອັດຕາແລກປ່ຽນເງິນໂດລາປ່ຽນເປັນກີບ 9,006 ສ່ວນກີບປ່ຽນເປັນໂດລາ 9,026, ອັດຕາແລກປ່ຽນເງິນບາດປ່ຽນເປັນກີບ 310.39 ສ່ວນກີບປ່ຽນເປັນໂດລາ 312.73.
ໜັງສືພິມເສດຖະກິດ-ການຄ້າ ໃຫ້ຮູ້ວ່າ ທ່ານ ປອ. ພູເພັດ ກ້ຽວພິລາວົງ ຮອງຄະນະບໍດີ ຄະນະເສດຖະສາດ–ບໍລິຫານທຸລະກິດ ມະຫາວິທະຍາໄລແຫ່ງຊາດ ໃຫ້ທັດສະນະວ່າ: ສາເຫດທີ່ເຮັດໃຫ້ເງິນເກີບອ່ອນຄ່າດັ່ງທີ່ເຫັນຢູ່ໃນປັດຈຸບັນ ປັດໄຈໜຶ່ງກໍຍ້ອນການໃຊ້ເງິນຫຼາຍສະກຸນໃນປະເທດສົ່ງຜົນໃຫ້ເງິນກີບອ່ອນຄ່າທີ່ບໍ່ເປັນໄປຕາມກົນໄກຕະຫຼາດເທົ່າທີ່ຄວນ ໂດຍສະເພາະແມ່ນການເກງກໍາໄລ; ການເກງກຳໄລນີ້ບໍ່ແມ່ນທະນາຄານທຸລະກິດ ແຕ່ແມ່ນພໍ່ຄ້າ–ແມ່ຄ້າລາຍຍ່ອຍ ຫຼື ຮ້ານແລກປ່ຽນຕ່າງໆທີ່ມີຄວາມສາມາດໃນການຊື້ເງິນຕາຈຳນວນຫຼວງຫຼາຍ ແລະ ຂາຍເງິນຕາອອກໄດ້ຫຼາຍ ເຮັດໃຫ້ມີການປັ່ນປ່ວນໃນອັດຕາແລກປ່ຽນຢູ່ນອກລະບົບ.
ເຖິງແມ່ນວ່າລັດຖະບານຈະພະຍາຍາມຄວບຄຸມແຕ່ກໍສາມາດຄວບຄຸມໄດ້ພາຍໃນທະນາຄານທຸລະກິດເທົ່ານັ້ນ, ແຕ່ສຳລັບຢູ່ນອກລະບົບແມ່ນຄວບຄຸມໄດ້ຍາກ ເຊິ່ງກົນໄກທີ່ຈະຊ່ວຍປັບອັດຕາແລກປ່ຽນໄດ້ ແມ່ນຕ້ອງໃຫ້ໄປຕາມກົນໄກເສດຖະກິດຕະຫຼາດ ເພື່ອສ້າງຄວາມສາມາດຂອງການແຂ່ງຂັນໃນລາວເຮົາໃນອະນາຄົດ.
ດ້ານນັກເສດຖະສາດປະຈໍາທະນາຄານແຫ່ງໜຶ່ງ ໃຫ້ຄຳຄິດເຫັນວ່າ: ປົກກະຕິເງິນກີບເຮົາກໍມີການອ່ອນຄ່າຢູ່ແລ້ວ ຕ່າງແຕ່ວ່າຈະອ່ອນຄ່າຫຼາຍປານໃດນັ້ນກໍຂຶ້ນກັບສະພາບເສດຖະກິດ ແລະ ກົນໄກຕະຫຼາດ. ໃນກໍລະນີການລະບາດຂອງພະຍາດໂຄວິດ–19 ກໍມີສ່ວນເຮັດໃຫ້ຄ່າເງິນຫຼຸດລົງຍ້ອນເສດຖະກິດຢຸດສະງັກ. ຂະນະດຽວກັນ, ການຊົມໃຊ້ແມ່ນເພີ່ມຂຶ້ນເຮັດໃຫ້ມີ ຄວາມຕ້ອງການນໍາເຂົ້າຫຼາຍກວ່າການສົ່ງອອກ ຈຶ່ງເປັນທີ່ມາຂອງການຂາດດຸນການຄ້າ ເພາະການນໍາເຂົ້າສິນຄ້າແມ່ນຈ່າຍເປັນສະກຸນເງິນຕາຕ່າງປະເທດ, ສ່ວນທາງອອກທີ່ດີທີ່ສຸດແມ່ນສົ່ງເສີມການຜະລິດພາຍໃນໃຫ້ຫຼາຍ ເພື່ອຫຼຸດຜ່ອນການນໍາເຂົ້າສິນຄ້າທີ່ບໍ່ຈໍາເປັນ.
ຮຽບຮຽງຂ່າວ: ພຸດສະດີ