ຕະຫຼາດໜອງຈັນກັບແນວຄິດລິເລີ່ມການຢຸດໃຊ້ພລາສຕິກແຫ່ງທຳອິດໃນ ສປປ ລາວ ໂດຍສະເພາະປະເພດຖົງຢາງ ເພື່ອຮັກສາສິ່ງແວດລ້ອມ ແລະ ຫຼຸດຜ່ອນພາວະໂລກຮ້ອນ ໂດຍການໃຫ້ແມ່ຄ້າຊາວຂາຍຫັນມາໃຊ້ຖົງເຈ້ຍໃນການຫຸ້ມຫໍ່ສິນຄ້າແທນ ແລະ ຮຽກຮ້ອງໃຫ້ລູກຄ້າຜູ້ທີ່ມາຈັບຈ່າຍຊື້ເຄື່ອງ ຖືຖົງຜ້າ ຫຼື ກະຕ່າມາພ້ອມທຸກຄັ້ງ.
ທ່ານ ໄພທອງ ວົງລາຕີ ຄະນະປະສານງານຕະຫຼາດໜອງຈັນ ໃຫ້ສຳພາດກັບນັກຂ່າວລາວໂພສ ເມື່ອວັນທີ 20 ພຶດສະພາ ນີ້ວ່າ ການລົນນະລົງຢຸດໃຊ້ພລາສຕິກທີ່ຕະຫຼາດໜອງຈັນໄດ້ເລີ່ມມີການປະຊາສຳພັນ ເພື່ອໃຫ້ຂໍ້ມູນກ່ຽວຜົນເສຍຂອງການໃຊ້ພລາສຕິກຕໍ່ສິ່ງແວດລ້ອມ ແລະ ສ້າງຄວາມເຂົ້າໃຫ້ກັບແມ່ຄ້າຊາວຂາຍ ພ້ອມຜູ້ທີ່ມາຈັບຈ່າຍໃນຕະຫຼາດໃຫ້ເຫັນຄວາມສຳຄັນໃນການຮັກສາສິ່ງແວດລ້ອມ, ມົນລະຜິດ, ຄວາມຈົບງາມຂອງບ້ານເມືອງ ແລະ ພາວະໂລກຮ້ອນ, ເຊິ່ງເລີ່ມມາຕັ້ງແຕ່ວັນທີ 16 ມັງກອນ ຈົນເຖິງ 16 ພຶດສະພາ 2020 ລວມເປັນເວລາ 4 ເດືອນ ກ່ອນຈະມີການປະຕິບັດນຳໃຊ້ມາດຕະການຢຸດໃຊ້ພລາສຕິກຢ່າງຈິງຈັງໃນວັນທີ 17 ພຶດສະພາທີ່ຜ່ານມາ. ໃນນັ້ນ, ໄດ້ແບ່ງອອກເປັນ 2 ໝວດຄື: ສິນຄ້າທີ່ຈຳເປັນຕ້ອງໃຊ້ພລາສຕິກເປັນສິ່ງຫຸ້ມຫໍ່ເຊັ່ນ: ສິນຄ້າປະເພດຊີ້ນ, ອາຫານປະເພດປຽກຊຸ່ມ ຫຼື ອາຫານບາງຊະນິດຕ້ອງຫຸ້ມຫໍ່ດ້ວຍຖົງຢາງ ແລະ ສິນຄ້າທີ່ຫ້າມໃຊ້ຖົງຢາງພລາສຕິກເຊັ່ນ: ປະເພດເສື້ອຜ້າ, ເຄື່ອງແຫ້ງ, ໝາກໄມ້ ແລະ ຜັກ.
ທາງຕະຫຼາດໜອງຈັນໄດ້ມີຄະນະສະເພາະຂອງຕະຫຼາດລົງກວດກາ ພ້ອມໃຊ້ຄຳແນະນຳຕໍ່ແມ່ຄ້າຊາວຂາຍເປັນປະຈຳທຸກມື້ ໃນໄລຍະ 3 ວັນ ນັບຕັ້ງແຕ່ເລີ່ມປະຕິບັດກໍ່ມີບາງພາກສ່ວນທີ່ບໍ່ເຂົ້າໃຈ ແລະ ບໍ່ເຫັນດີຕໍ່ມາດຕະການດັ່ງກ່າວ ເຊິ່ງທາງຕະຫຼາດໜອງຈັນກໍ່ໄດ້ຊີ້ແຈງຕໍ່ພວກກ່ຽວ ແຕ່ຫຼາຍພາກສ່ວນກໍ່ໃຫ້ການຮ່ວມມື. ສຳລັບຜູ້ທີ່ຝ່າຝືນມາດຕະການຢຸດໃຊ້ພລາສຕິກ ຄັ້ງທຳອິດຈະຖືກເອີ້ນຂຶ້ນຫ້ອງການເຈົ້າໜ້າທີ່ຈະກ່າວຕັກເຕືອນ ພ້ອມເຮັດບົດບັນທຶກ, ຖ້າຜູ້ກ່ຽວຍັງເຮັດຜິດຄັ້ງທີສອງແມ່ນຈະຖືກປັບໄໝ ແຕ່ຖ້າມີຄັ້ງທີສາມ ຈະໄດ້ຮັບການລົງໂທດຂັ້ນສູງສຸດແມ່ນໃຫ້ຢຸດຕິການຂາຍ ເຊິ່ງມາດຕະການດັ່ງກ່າວນີ້, ແມ່ນຈະປະຕິບັດໃນໄລຍະຍາວແບບບໍ່ມີກຳນົດ ແຕ່ຈະມີການປັບປຸງໃຫ້ເໝາະສົມກັບຄວາມເປັນຈິງ.
ອີງຕາມການໃຫ້ສຳພາດຂອງແມ່ຄ້າຜູ້ໜຶ່ງໃນຕະຫຼາດໜອງຈັນໃຫ້ຮູ້ວ່າ ມາດຕະການດັ່ງກ່າວເປັນເລື່ອງທີ່ດີເພາະມັນຈະຊ່ວຍຮັກສາສິ່ງແວດລ້ອມ ແຕ່ມັນກໍ່ກະທົບກັບພໍ່ຄ້າຊາວຂາຍໃນດ້ານຕົ້ນທຶນ ເນື່ອງຈາກວ່າຖົງເຈ້ຍແມ່ນມີລາຄາແພງ 1 ຖົງ/2.000 ກີບ ເມື່ອຕົ້ນທຶນແພງຂຶ້ນກໍ່ເຮັດໃຫ້ກຳໄລຫຼຸດລົງ. ດັ່ງນັ້ນ, ໃນໄລຍະເລີ່ມຕົ້ນກໍ່ຍັງເຫັນວ່າ ຍັງມີການໃຊ້ຖົງພລາສຕິກຄວບຄູ່ກັບຖົງເຈ້ຍຢູ່.
ຂ່າວໂດຍ: ພຸດສະດີ