ເມື່ອວັນທີ 6 ພຶດສະພາ ທີ່ຜ່ານມາ ເວັບໄຊຟອບ Forbes ລາຍງານວ່າ ບໍລິສັດ Airbnb ເຊິ່ງດຳເນີນທຸລະກິດການຈັດຫາບ້ານພັກອອນລາຍ ເປັນອີກໜຶ່ງໃນຫຼາຍທຸລະກິດທົ່ວໂລກ ທີ່ໄດ້ຮັບຜົນກະທົບຢ່າງໜັກຈາກວິກິດການລະບາດໂຄວິດ-19 ຈຶ່ງຈຳເປັນຕ້ອງປົດພະນັກງານປະມານ 1,900 ຄົນ ແຕ່ທາງບໍລິສັດໄດ້ມີການຊີ້ແຈງເຖິງເຫດຜົນ ພ້ອມໃຫ້ການຊົດເຊີຍຢ່າງເຫັນອົກເຫັນໃຈ ແລະ ຮອບຄອບຈົນກາຍເປັນການໄດ້ຮັບຄຳຍ້ອງຍໍຈາກຫຼາຍພາກສ່ວນ.
ທ່ານ ໄບຣອັນ ເອຊກີ CEO ຂອງ Air bnb ໄດ້ໃຫ້ຄຳໝັ້ນວ່າ ຈະດູແລ ແລະ ສະແດງນໍ້າໃຈຕໍ່ພະນັກງານທີ່ຖືກປົດທຸກຄົນຢ່າງເຕັມທີ່ ໂດຍຂໍ້ຄວາມໃນຈົດໝາຍໄດ້ລະບຸວ່າ ພະນັກງານໃນອາເມລິກາຈະໄດ້ຮັບເງິນຊົດເຊີຍພື້ນຖານເປັນໄລຍະເວລາ 14 ອາທິດ ແລະ ບວກເພີ່ມ 1 ອາທິດຕໍ່ອາຍຸງານ 1 ປີ, ສ່ວນເສດເດືອນຈະປັດຂຶ້ນເປັນປີທີ່ໃກ້ທີ່ສຸດເຊັ່ນ: ຫາກພະນັກງານເຮັດວຽກມາເປັນເວລາ 3 ປີ 7 ເດືອນ ກໍ່ຈະຄິດເປັນ 4 ປີ 18 ອາທິດ. ນອກຈາກນີ້, ພະນັກງານທີ່ຖືກປົດຈະໄດ້ຮັບຫຸ້ນຂອງບໍລິສັດບໍ່ວ່າໄລຍະເວລາການເຮັດວຽກຈະດົນເທົ່າໃດກໍ່ຕາມ ກໍ່ຈະໄດ້ຮັບທຸກຄົນ ແລະ ບໍ່ພຽງແຕ່ເທົ່ານັ້ນ ເຖິງແມ່ນວ່າຈະພົ້ນຈາກການເປັນພະນັກງານຂອງບໍລິສັດໄປແລ້ວ ແຕ່ທາງບໍລິສັດກໍ່ຍັງຈະດູແລເລື່ອງຄ່າໃຊ້ຈ່າຍດ້ານສຸຂະພາບ ໂດຍສະເພາະພະນັກງານໃນອາເມລິກາ ຈະໄດ້ຮັບຄວາມຄຸ້ມຄອງສຸຂະພາບຂອງ COBRA ເປັນເວລາ 12 ເດືອນ ສ່ວນພະນັກງານໃນປະເທດອື່ນໆ ທາງບໍລິສັດຈະຮັບຜິດຊອບຈ່າຍຄ່າປະກັນສຸຂະພາບໄປຈົນໝົດປີນີ້ ລວມເຖິງຈັດຫາບໍລິການທີ່ປຶກສາດ້ານສຸຂະພາບຈິດໃຫ້ຜູ້ທີ່ຕ້ອງການເປັນເວລາ 4 ເດືອນ.
ສ່ວນເລື່ອງການວຽກໃໝ່ ທາງບໍລິສັດຕັ້ງເປົ້າໝາຍທີ່ຈະຊ່ວຍເຫຼືອໃຫ້ພະນັກງານທຸກຄົນໄດ້ມີອະນາຄົດ ໂດຍມີຫຼາຍວິທີທີ່ຈະດຳເນີນການຄື: ເລີ່ມເຮັດໜ້າເວັບໄຊສາທາລະນະໃຫ້ພະນັກງານສາມາດໃສ່ຂໍ້ມູນ ແລະ ປະຫວັດ ສຳລັບໃຫ້ນາຍຈ້າງມາເລືອກເຂົ້າເຮັດວຽກໄດ້ ໂດຍຈະໄດ້ຮັບການສະໜັບສະໜນຢ່າງເຕັມທີ່ຈາກທີມງານບໍລິສັດ ລວມທັງຈະຈ້າງບໍລິສັດຜູ້ຊ່ຽວຊານດ້ານການຈັດຫາງານເຂົ້າມາຊ່ວຍເຫຼືອເປັນເວລາ 4 ເດືອນ ແລະ ສຸດທ້າຍ ອຸປະກອນຄອມພິວເຕີເປັນສິ່ງຈຳເປັນສຳລັບພະນັກງານ ບໍລິສັດຈຶ່ງໄດ້ມອບຄອມພິວເຕີຂອງ Apple ໃຫ້ກັບທຸກຄົນ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: hilight.kapook.com