ທີມນັກວິໄຈຈາກຫ້ອງປະຕິບັດການທາງວິທະຍາສາດແຫ່ງຊາດ ລອສ ອະລາມອສ ໃນລັດແມັກຊິໂກ ສັງກັດກະຊວງພະລັງງານອາເມລິກາພົບວ່າ ໄວຣັດໂຄໂຣນາ ສາຍພັນໃໝ່ ຕົ້ນຕໍຂອງໂຣກໂຄວິດ-19 ມີການກາຍພັນ ແລະ ແຜ່ເຊື້ອໄດ້ໄວກວ່າສາຍພັນດັ້ງເດີມທີ່ພົບການແຜ່ລະບາດເມື່ອທ້າຍປີ 2019.
ທີມນັກວິໄຈຄະນະນີ້ໄດ້ມີການເປີດເຜີຍເມື່ອວັນທີ 5 ພຶດສະພາ ທີ່ຜ່ານມາວ່າ ໄວຣັດໂຄໂຣນາສາຍພັນໃໝ່ ກາຍພັນຈາກໄວຣັດໂຄໂຣນາສາຍພັນດັ້ງເດີມທີ່ຖືກຄົ້ນພົບຄັ້ງທຳອິດເມື່ອສາມເດືອນກ່ອນໃນເອີຣົບ ເຊິ່ງໄວຣັດໂຄໂຣນາທີ່ກາຍພັນຫຼ້າສຸດນີ້ສາມາດແຜ່ກະຈາຍໄດ້ໄວວາຈາກເອີຣົບໄປສູ່ຫຼາຍລັດທາງຕະເວັນອອກຂອງອາເມລິກາ ກ່ອນທີ່ຈະກາຍເປັນພາວະການແຜ່ລະບາດໃຫຍ່ໄປທົ່ວໂລກ ເມື່ອກາງເດືອນມີນາທີ່ຜ່ານມາ.
ຜົນການວິໄຈຍັງເຕືອນອີກວ່າ ອາກາດທີ່ອົບອຸ່ນຂຶ້ນບໍ່ໄດ້ມີຜົນຕໍ່ການຫຼຸດການແຜ່ລະບາດຂອງໄວຣັດໂຄໂຣນາສາຍພັນໃໝ່ ໂດຍສະເພາະຄຸນສົມບັດກາຍພັນໄດ້ຢ່າງຕໍ່ເນື່ອງຂອງໄວຣັດຊະນິດນີ້ ແຕ່ການຄົ້ນພົບຄັ້ງທຳອິດນີ້ກໍ່ເຮັດໃຫ້ຮູ້ວ່າໄວຣັດທີ່ກາຍພັນຕົວໃໝ່ນີ້ບໍ່ມີອັນຕະລາຍຮ້າຍແຮງເທົ່າສາຍພັນດັ້ງເດີມ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: bangkokbiznews