ສຳນັກຂ່າວ ຣອຍເຕີ ລາຍງານວ່າ ຢາເຣມເດຊີເວຍ (remdesivir) ຂອງບໍລິສັດ ກີລຽດ ໄຊແອນເຊສ (Gilead Sciences) ເປັນໜຶ່ງໃນຢາທີ່ເຊື່ອວ່າສາມາດຮັກສາຜູ້ປ່ວຍຕິດເຊື້ອໂຄວິດ-19 ໄດ້ປະສົບຄວາມລົ້ມເຫຼວໃນການທົດລອງໃຊ້ກັບຜູ້ປ່ວຍອາການໜັກໃນປະເທດຈີນ ແຕ່ຜູ້ຜະລິດຢາດັ່ງກ່າວນີ້ ກ່າວວ່າ ຜົນການທົດລອງຄັ້ງນີ້ຍັງບໍ່ແມ່ນຂໍ້ສະຫຼຸບເທື່ອ ເນື່ອງຈາກການທົດລອງຖືກຍົກເລີກກ່ອນກຳນົດ.
ການທົດສອບຢາ ເຣມເດຊີເວຍ ໄດ້ຮັບຄວາມສົນໃຈຫຼາຍ ເນື່ອງຈາກວ່າໃນປັດຈຸບັນຍັງບໍ່ມີຢາ ຫຼື ວັກຊີນທີ່ໃຊ້ຮັກສາໂຄວິດ-19 ຢ່າງເປັນທາງການ ແຕ່ການທົດສອບຢາຕົວນີ້ໃນຈີນ ເປັນການໃຫ້ຢາທົດລອງທາງເລືອດດຳ ບໍ່ສາມາດເຮັດໃຫ້ຜູ້ປ່ວຍຫຼາຍກໍລະນີມີອາການດີຂຶ້ນ ຫຼື ຫຼຸດຈຳນວນໄວຣັດໃນກະແສເລືອດຂອງພວກເຂົາໄດ້ ເຖິງແນວໃດກໍ່ຕາມ ຕອນນີ້ລາຍລະອຽດຂອງການທົດລອງຍັງບໍ່ມີ ແລະ ຊີ້ໃຫ້ເຫັນຂໍ້ຈຳກັດຕ່າງໆເທື່ອ.
ໃນຂະນະດຽວກັນ ມີແພດຫຼາຍຄົນເຊື່ອວ່າ ຢາຕ້ານໄວຣັດຢ່າງ ເຣມເດຊີເວຍ ໜ້າຈະມີປະສິດທິພາບທີ່ສຸດເມື່ອໃຊ້ກັບຜູ້ປ່ວຍຕິດເຊື້ອໃນຂັ້ນເລີ່ມຕົ້ນ ເນື່ອງຈາກມັນຖືກອອກແບບມາເພື່ອຢັບຢັ້ງໄວຣັດບໍ່ໃຫ້ຮຽນແບບຕົວເອງຂຶ້ນມາໃນກະແສເລືອດຂອງຜູ້ປ່ວຍ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.thairath.co.th