ສຳນັກຂ່າວຕ່າງປະເທດລາຍງານວ່າ ລາຄານໍ້າມັນຫຼຸດລົງຕໍ່າສຸດໃນຮອບ 20 ປີ ເນື່ອງຈາກຄວາມກັງວົນວ່າໂລກກຳລັງຈະບໍ່ມີສະຖານທີ່ເກັບມ້ຽນນໍ້າມັນດິບອີກຕໍ່ໄປ ເຖິງແມ່ນວ່າຈະຫຼຸດການຜະລິດລົງແລ້ວກໍ່ຕາມ ເນື່ອງຈາກຄວາມຕ້ອງການທີ່ຫຼຸດລົງຂອງຫຼາຍປະເທດ ຫຼັງຈາກໃຊ້ມາດຕະການປິດເມືອງ-ປິດປະເທດ ຢຸດການເຄື່ອນໄຫວທາງເສດຖະກິດໃນຊ່ວງການລະບາດຂອງໂຄວິດ-19.
ສັນຍານຄວາມຕ້ອງການນໍ້າມັນຫຼຸດລົງຢ່າງຈະແຈ້ງ ຫຼັງຈາກທີ່ຈີນລາຍງານການຫົດຕົວທາງເສດຖະກິດຄັ້ງທຳອິດໃນຮອບຫຼາຍທົດສະວັດ ເມື່ອວັນສຸກທີ່ຜ່ານມາ ເຊິ່ງເປັນສິ່ງບົ່ງບອກວ່າ ໃນເອີຣົບ ແລະ ອາເມລິກາເໜືອຈະປະເຊີນໜ້າກັບສະຖານະການດຽວກັນ.
ລາຄານໍ້າມັນ West Texas Intermediate (WTI) ເຊິ່ງເປັນລາຄາມາດຕະຖານຂອງສະຫະລັດຫຼຸດລົງຫຼາຍກວ່າ 19% ມີການຊື້ຂາຍໃນຕະຫຼາດອາຊີໃນໄລຍະທີ່ຜ່ານມາລາຄາພຽງ 14.73 ຫຼຽນສະຫະລັດຕໍ່ບາຣ໌ເຣລ ແຕ່ປັດຈຸບັນມີການປັບລາຄາຂຶ້ນເລັກໜ້ອຍຢູ່ທີ່ 15.78 ໂດລາສະຫະລັດຕໍ່ບາຣ໌ເຣລ.
ລາຄານໍ້າມັນຟິວເຈີນິວຢອກຫຼຸດລົງ 16% ມາຢູ່ທີ່ປະມານ 15 ໂດລາສະຫະລັດຕໍ່ບາຣ໌ເຣລ ຫຼັງຈາກອາທິດທີ່ຜ່ານມາແລ້ວ ລາຄາຫຼຸດລົງເກືອບ 1 ໃນ 5 ເຊິ່ງການປັບລາຄາຫຼຸດລົງໃນຄັ້ງນີ້ສືບເນື່ອງມາຈາກຂໍ້ຕົກລົງຂອງ OPEC+ ແລະ ຜູ້ຜະລິດລາຍອື່ນທີ່ຈະຫຼຸດການຜະລິດລົງ 9.7 ລ້ານບາຣ໌ເຣລຕໍ່ວັນ ຍັງບໍ່ສາມາດຊ່ວຍໃຫ້ລາຄານໍ້າມັນດີຂຶ້ນຈາກພາວະລາຄານໍ້າມັນທີ່ຫຼຸດລົງຢ່າງຕໍ່ເນື່ອງໄດ້.
ທະນາຄານ ANZ ຊີ້ໃຫ້ເຫັນວ່າ: ລາຄານໍ້າມັນດິບຍັງຄົງຢູ່ພາຍໃຕ້ແຮງກົດດັນ ເນື່ອງຈາກການຄາດການວ່າຄວາມຕ້ອງການຂອງນໍ້າມັນນັ້ນຫຼຸດລົງ ເຊິ່ງມັນສົ່ງຜົນຕໍ່ຄວາມເຊື່ອໝັ້ນ ເຖິງແມ່ນວ່າກຸ່ມ OPEC+ ຈະຍອມຫຼຸດກຳລັງການຜະລິດນໍ້າມັນລົງຢ່າງບໍ່ເຄີຍມີມາກ່ອນກໍ່ຕາມ ແຕ່ຕະຫຼາດຍັງມີນໍ້າມັນລົ້ນເກີນຄວາມຕ້ອງການ ແລະ ຄວາມກັງວົນກໍ່ຍັງເພີ່ມຂຶ້ນຕໍ່ເນື່ອງກ່ຽວກັບຄັງເກັບມ້ຽນນໍ້າມັນຂອງສະຫະລັດທີ່ກຳລັງຈະໝົດແລ້ວ.
ຮຽບຮຽງຂ່າວ: ພຸດສະດີ