ວັນທີ 9 ເມສາ ສຳນັກຂ່າວ BBC ລາຍງານຂໍ້ມູນຈາກອົງການອົກແຟັມ (Oxfam) ວ່າການແຜ່ລະບາດຂອງພະຍາດໄວຣັສໂຄວິດ-19 ສົ່ງຜົນໃຫ້ເສດຖະກິດໄດ້ຮັບຜົນກະທົບ ແລະ ເຮັດໃຫ້ຈຳນວນຄົນທຸກທົ່ວໂລກເພີ່ມຂຶ້ນປະມານ 500 ລ້ານຄົນ.
ອົງການ ອົກແຟັມອ້າງອີງການວິໄຈຈາກ ມະຫາວິທະຍາໄລແຫ່ງຊາດອົດສະຕາລີ ແລະ ວິທະຍາໄລ King’s College ໃນລອນດອນ ລະບຸວ່າ ຈະເປັນເທື່ອທຳອິດທີ່ຈຳນວນຄົນທຸກຈະເພີ່ມສູງຂຶ້ນໃນຮອບ 30 ປີ ພ້ອມໃຫ້ຄຳຄິດເຫັນວ່າວິກິດເສດຖະກິດອາດຮຸນແຮງກວ່າຍິ່ງກວ່າວິກິດສຸຂະພາບ. ລາຍງານລະບຸວ່າ ຜົນກະທົບທີ່ເກີດຂຶ້ນຈາກໄວຣັສ ໄດ້ກໍ່ເກີດຄວາມທ້າທາຍຕໍ່ເປົ້າໝາຍການພັດທະນາຢ່າງຢັ້ງຢືນຂອງສະຫະປະຊາຊາດ ໃນສ່ວນຂອງການກຳຈັດຄວາມທຸກຍາກພາຍໃນປີ 2030.
ອາຈານແຫ່ງວິທະຍາໄລ King’s College ທ່ານ ແອນດີ ຊຳເນີ (Andy Sumner) ລະບຸວ່າ ການຄົ້ນຄວ້າຂອງທາງວິທະຍາໄລຊີ້ເຖິງຄວາມສຳຄັນຂອງການຂະຫຍາຍເຄືອຂ່າຍຄວາມປອດໄພຂອງສັງຄົນຢ່າງໄວວາ ໃນປະເທດທີ່ກຳລັງພັດທະນາ ແລະ ສິ່ງທີ່ປະຊາຄົມນາໆຊາດສາມາດເຮັດໄດ້ຄືການໃຫ້ຄວາມຊ່ວຍເຫຼືອ.
ໃນຊ່ວງຂອງການລະບາດ ເກີນເຄິ່ງຂອງປະຊາກອນໂລກ 7.8 ພັນລ້ານຄົນ ອາດມີຊີວິດໃນຄວາມທຸກຍາກ ຄົນທຸກເກີດໃໝ່ຮ້ອຍລະ 40 ໃນອາຊີຕາເວັນອອກ ແລະ ປາຊິຟິກ, ອີກປະມານ 1 ໃນ 3 ແມ່ນຢູ່ໃນ ຊະຮະຣາ, ອາຟິກາ ແລະ ອາຊີໃຕ້.
ທ່ານ ແດນນີ ສຣີສະກັນດາລາຊາ (Danny Sriskandarajah) ຜູ້ບໍລິຫານໃຫຍ່ອົງການອົກແຟັມ ປະຈຳອັງກິດກ່າວວ່າ ຄົນງານຫຼາຍພັນລ້ານຄົນໃນປະເທດທຸກຍາກທີ່ມີເງິນບໍ່ພໍ ບໍ່ມີຫຼັກປະກັນຢ່າງຄ່າໃຊ້ຈ່າຍໃນຊ່ວງລາໄຂ້ ຫຼື ເງິນຊ່ວຍຈາກລັດຖະບານ. ຜູ້ບໍລິຫານກໍ່ໄດ້ກ່າວເພີ່ມເຕີມວ່າ ການປະຊຸມທະນາຄານໂລກ ແລະ ກຸ່ມ G20 ອາທິດໜ້າເປັນໂອກາດສຳຄັນສຳຫຼັບບັນດາຜູ້ນຳໂລກ ທີ່ຈະຊ່ວຍເຫຼືອເສດຖະກິດຮ່ວມກັນ ເພື່ອປົກປ້ອງຄົນອ່ອນແອທີ່ສຸດໃນສັງຄົມ.
ຕົ້ນອາທິດທີ່ຜ່ານມາ ອົງການນາໆຊາດຫຼາຍກວ່າ 100 ອົງການໄດ້ຂໍໃຫ້ລະເວັ້ນການຊຳລະໜີ້ໃນປີນີ້ ໂດຍສະເພາະສຳຫຼັບປະເທດທີ່ກຳລັງພັດທະນາ, ເຮັດໃຫ້ມີຈຳນວນເງິນ 25 ພັນລ້ານດອນລາໄວ້ສະໜັບສະໜຸນເສດຖະກິດໃນປະເທດ.
ຮຽບຮຽງໂດຍ: ວະນິດາ