ສຳນັກຂ່າວ BBC ລາຍງານວ່າ ນັກວິທະຍາສາດດ້ານສັດຕະວະແພດກຸ່ມໜຶ່ງ ໄດ້ອອກມາເຕືອນໃຫ້ບັນດາຄົນທີ່ລ້ຽງແມວໃຫ້ກັກບໍລິເວນສັດລ້ຽງຂອງຕົນເອງ ໃຫ້ຢູ່ບ້ານ ຫຼື ອາຄານທີ່ປິດມິດຊິດ ຢ່າຟ້າວປ່ອຍໃຫ້ອອກມາຫຼິ້ນທາງນອກໃນຊ່ວງເວລານີ້ ຫຼັງຈາກມີງານວິໄຈຫຼາຍອັນພົບຫຼັກຖານເພີ່ມຫຼາຍຂຶ້ນເລື້ອຍໆວ່າ ແມວສາມາດຕິດເຊື້ອພະຍາດໄວຣັສໂຄວິດ-19 ແລະ ແຜ່ເຊື້ອຕໍ່ໃຫ້ແມວນຳກັນເອງໄດ້.
ກ່ອນໜ້ານີ້ມີລາຍງານວ່າ ແມວໂຕໜຶ່ງໃນເກາະຮົງກົງຕິດເຊື້ອໄວຣັສນຳເຈົ້າຂອງ ໂດຍມີຜົນກວດອອກມາເປັນບວກ ແລະ ມີເສືອພັນມະລາຍູໂຕໜຶ່ງໃນສວນສັດ Bronx Zoo ທີ່ລັດນິວຍອກ ຕິດເຊື້ອໄວຣັສຈາກຜູ້ດູແລ ເຊັ່ນດຽວກັນ.
ເຫດການເຫຼົ່ານີ້ ສອດຄ້ອງກັບຜົນການສຶກສາຫຼ້າສຸດທີ່ຈັດໂດຍຄະນະວິທະຍາສາດຈີນ ຈາກສະຖາບັນວິໄຈ ສັດຕະວະແພດເມືອງ ຮາບິນ (HVRI) ເຊິ່ງງານວິໄຈນີ້ໄດ້ເຜີຍແຜ່ທາງອອນລາຍໃນເວັບໄຊ bioRxiv.org ເມື່ອຊ່ວງປາຍເດືອນມີນາທີ່ຜ່ານມາ. ຜົນວິໄຈປຽບທຽບຄວາມສ່ຽງໃນການຕິດເຊື້ອໄວຣັສ SARS-CoV-2 ເຊິ່ງກໍ່ໃຫ້ເກີດພະຍາດອັກເສບປອດ ໂຄວິດ-19 ໃນໝູ່ສັດລ້ຽງຊະນິດຕ່າງໆ ຊີ້ວ່າໝູ, ໝາ, ເປັດ ແລະ ໄກ່ ບໍ່ຕອບສະໜອງຕໍ່ເຊື້ອໄວຣັສຊະນິດນີ້ ແລະ ເກີດການຕິດເຊື້ອໄດ້ຍາກ; ໃນຂະນະທີ່ແມວ ແລະ ເຟີເຣັດ (ferret) ກັບຕິດເຊື້ອໄດ້ງ່າຍ. ໃນກໍລະນີຂອງແມວນັ້ນສາມາດຕິດເຊື້ອຈາກຄົນ ແລະ ແມວນຳກັນໄດ້ ຜ່ານລະອອງຝອຍທີ່ອອກມາຈາກທາງເດີນຫາຍໃຈ ໂດຍອະນຸພາບຂອງໄວຣັດຈະຢູ່ໃນອາກາດໄດ້ຊ່ວງໜຶ່ງເມື່ອມີການໄອ, ຈາມ, ອອກສຽງເວົ້າ ຫຼື ຫາຍໃຈອອກມາ.
ທ່ານ ດຣ ແອນເຈິລ ອາລເມນດຼອສ (Dr Angel Almendros) ຜູ້ຊ່ຽວຊານດ້ານສັດຕະວະແພດສາດ ຈາກມະຫາວິທະຍາໄລ City University of Hong Kong ໜຶ່ງໃນຜູ້ຂຽນບົດຄວາມລົງວາລະສານ Vet Record ເຊິ່ງແນະນຳໃຫ້ກັກບໍລິເວນໄວ້ໃນບ້ານ ບອກວ່າ ມາດຕະການນີ້ສົມເຫດສົມຜົນຫາກເຈົ້າຂອງແມວສາມາດເຮັດໄດ້ ແຕ່ຢ່າງໃດກໍ່ຕາມ ຄົນຮັກແມວ ແລະ ສັດລ້ຽງຊະນິດອື່ນໆ ບໍ່ຕ້ອງກັງວົນວ່າເຊື້ອໄວຣັສຈາກສັດທີ່ຢູ່ໃກ້ຊິດຈະແຜ່ເຊື້ອກັບມາຄືນ. ດ້ານສະມາຄົມສັດຕະວະແພດແຫ່ງອັງກິດ (BVA) ທີ່ສະໜັບສະໜຸນຄຳແນະນຳໃຫ້ກັກບໍລິເວນແມວດັ່ງກ່າວ ອອກມາຖະແຫຼງທ້ວງຕື່ມວ່າເຈົ້າຂອງແມວບໍ່ຄວນຈະກັງວົນເລື່ອງການຕິດເຊື້ອຈາກສັດສູ່ຄົນ ແລະແນະນຳໃຫ້ກັກບໍລິເວນແມວທີ່ລ້ຽງໄວ້ ໂດຍສະເພາະໃນກໍລະນີທີ່ມີຜູ້ສົງໄສຕິດເຊື້ອໃນບ້ານເທົ່ານັ້ນ.
ຮຽບຮຽງໂດຍ: ວະນິດາ