ມື້ນີ້ (8 ເມສາ) ສຳນັກຂ່າວ Thai PBS ລາຍງານວ່າຍອດຜູ້ເສຍຊີວິດໃນຝຣັ່ງຈາກພະຍາດໂຄວິດ-19 ເພີ່ມຂຶ້ນຢ່າງຕໍ່ເນື່ອງ ເປັນຈຳນວນ 10,343 ກໍລະນີ. ໃນຈຳນວນນີ້ 3,237 ກໍລະນີເສຍຊີວິດໃນບ້ານພັກຄົນສູງອາຍຸ ເຮັດໃຫ້ປະເທດຝຣັ່ງກາຍເປັນປະເທດຕໍ່ຈາກອິຕາລີ, ສະເປນ, ແລະ ສ.ອາເມລິກາ ທີ່ມີຍອດຜູ້ເສຍຊີວິດແຕະຫຼັກໝື່ນຄົນ.
ໃນຂະນະທີ່ ຍອດກໍລະນີຕິດເຊື້ອທົ່ວປະເທດເພີ່ມຂຶ້ນເປັນ 110,049 ກໍລະນີ. ທາງການຝຣັ່ງເລັງເຫັນວ່າ ສະຖານະການບໍ່ມີແນວໂນ້ມວ່າຈະດີຂຶ້ນ ເຖິງວ່າຈະໃຊ້ມາດຕະການປິດປະເທດ (Lockdown) ຕັ້ງແຕ່ວັນທີ 15 ມີນາ ທີຜ່ານມາແລ້ວກໍ່ຕາມ. ນະຄອນປາຣີສ ກໍ່ໄດ້ຍົກລະດັບມາດຕະການ ໂດຍການຫ້າມໃຫ້ປະຊາຊົນອອກກຳລັງກາຍນອກບ້ານ ໃນເວລາ 10.00 – 19.00, ໃນຂະນະທີ່ເມືອງນີສ (Nice) ກໍ່ອອກມາດຕະການອານຸຍາດໃຫ້ອອກກຳລັງກາຍທາງນອກພາຍໃນ 06.00 – 12.00 ແລະ 18.00 – 20.00 ພ້ອມກຳນົດໃຫ້ໃສ່ໜ້າກາກອະນາໄມລະຫວ່າງອອກຈາກທີ່ພັກ ແລະ ເລັ່ງການຜະລິດໜ້າກາກທີ່ສາມາດຊັກທຳຄວາມສະອາດໄດ້.
ຮຽບຮຽງໂດຍ: ວະນິດາ