ເວັບໄຊ ນິວຢອກທາມ ລາຍງານເມື່ອວັນທີ 3 ເມສາ ທີ່ຜ່ານມາວ່າ ທ່ານ ໝໍ ໂຣເບີດ ເຣດຟິລ ຜູ້ອຳນວຍການສູນຄວບຄຸມ ແລະ ປ້ອງກັນໂຣກຕິດຕໍ່ແຫ່ງຊາດ ຫຼື CDC ຂອງອາເມລິກາ ເປີດເຜີຍຂໍ້ມູນພົບວ່າ: ຜູ້ຕິດເຊື້ອໄວຣັສໂຄວິດ-19 ປະມານ 25% ອາດບໍ່ສະແດງອາການຂອງໂຣກອອກມາ ແລະ ສິ່ງນີ້ບົ່ງບອກໄດ້ວ່ານີ້ເປັນ ສາເຫດທີ່ເຮັດໃຫ້ມີການແຜ່ລະບາດຂອງເຊື້ອໄວຣັດໂຄວິດ-19 ໄປທົ່ວອາເມລິກາ.
ຂໍ້ມູນໃໝ່ນີ້, ເຮັດໃຫ້ທາງ CDC ຕ້ອງທົບທວນຄຳແນະນຳທີ່ເຄີຍບອກປະຊາຊົນວ່າ ຖ້າບໍ່ມີອາການປ່ວຍຈາກໄຂ້ຫວັດ ບໍ່ຈຳເປັນຕ້ອງໃສ່ຜ້າປິດປາກ.
ຕາມການລາຍງານການວິເຄາະເລື່ອງນີ້ ຂອງທີມນັກວິໄຈໃນຮົງກົງໃຫ້ຮູ້ວ່າ ຜູ້ຕິດເຊື້ອປະມານ 20-40% ໃນຈີນ ທີ່ເປັນຜູ້ແຜ່ກະຈາຍເຊື້ອກ່ອນທີ່ຈະມີອາການປ່ວຍສະແດງອອກມາ ດ້ວຍເຫດຜົນນີ້ ຜູ້ຕິດເຊື້ອທີ່ບໍ່ສະແດງອາການ ຈຶ່ງສາມາດອະທິບາຍໃນເບື້ອງຕົ້ນໄດ້ວ່າເປັນຫຍັງເຊື້ອໄວຣັດດັ່ງກ່າວຈຶ່ງແຜ່ກະຈາຍຕິດຕໍ່ໄປທົ່ວໂລກໄດ້ຢ່າງໄວວາ.
ຮຽບຮຽງຂ່າວ: ພຸດສະດີ