ສະຖານະການການແຜ່ລະບາດເຊື້ອໄວຮັດໂຄວິດ-19 ໃນປະເທດຈີນເລີ່ມດີຂຶ້ນ ເກືອບຈະບໍ່ມີການແຜ່ລະບາດເຊື້ອໃນປະເທດ ລັດຖະບານຈີນໄດ້ຫຼຸດຜ່ອນຄວາມເຂັ້ມງວດຂອງມາດຕະການປິດເມືອງຕ່າງໆລົງ ແຕ່ກັບພົບວ່າເຮັດໃຫ້ຜູ້ຄ້າຂາຍບາງຄົນເລີ່ມນຳສັດລ້ຽງ ແລະ ສັດປ່າມາຂາຍເປັນອາຫານອີກຄັ້ງ.
ສຳນັກຂ່າວເດລີເມລເປີດເຜີຍວ່າ ຈາກການສຳຫຼວດຕະຫຼາດສົດແບບປິດແຫ່ງໜຶ່ງໃນເມືອງກຸ້ຍຫຼິນ ທາງຕະເວັນຕົກສຽງໃຕ້ຂອງຈີນ ກໍ່ພົບວ່າມີຄົນນຳໝາ ແລະ ແມວທີ່ຂັງໄວ້ໃນຄອກນ້ອຍໆ ເພື່ອລໍຖ້າປາດຄໍ ສ່ວນຕະຫຼາດອີກແຫ່ງໜຶ່ງໃນເມືອງ ຕົງກ່ວນ ທາງຕະເວັນອອກສຽງໃຕ້ຂອງປະເທດ ເລີ່ມມີປ້າຍຮ້ານຂາຍຢາແຜນບູຮານທີ່ມີສ່ວນປະສົມຂອງສັດປ່າລວມເຖິງ ເຈຍ ມາວາງຕັ້ງໄວ້ ເພື່ອສົ່ງສັນຍານວ່າເລີ່ມເປີດກິດຈະການແລ້ວ.
ນັກຂ່າວຂອງເດລີເມລກ່າວວ່າ: ຄົນໃນທ້ອງຖິ່ນເຊື່ອວ່າໂຣກລະບາດຄັ້ງນີ້ໄດ້ຈົບລົງແລ້ວ ແລະ ບໍ່ມີຫຍັງຕ້ອງເປັນຫ່ວງອີກ ຕອນນີ້ໂຣກໂຄວິດ-19 ເປັນບັນຫາຂອງຕ່າງປະເທດໄປແລ້ວ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.dailymail.co.uk