ປະຊາຊົນຊາວຕວັກກີຫຼາຍສິບຄົນພາກັນດື່ມ ເອທິລແອລກໍຮໍບໍລິສຸດ ທີ່ມີປະລິມານແອລກໍຮໍສູງເຖິງ 95% ເພາະຄິດວ່າຈະຊ່ວຍປ້ອງກັນ ລວມເຖິງຂ້າເຊື້ອໂຄວິດ-19 ໄດ້ ເຮັດໃຫ້ມີຜູ້ເສຍຊີວິດ 30 ຄົນ ແລະ ອີກປະມານ 20 ຄົນຕ້ອງຖືກນຳຕົວສົ່ງໂຮງໝໍ ເນື່ອງຈາກມີອາການສາຫັດ.
ວັນທີ 27 ມີນານີ້ ເວັບໄຊຂ່າວ ເດລີຊາບາ ລາຍງານເຫດການທີ່ເປັນອຸທາຫອນຈາກຄວາມພະຍາຍາມປ້ອງກັນການແຜ່ລະບາດຂອງໄວຣັດສາຍພັນໃໝ່ ໃນປະເທດຕວັກກີ ເຊິ່ງປັດຈຸບັນ ຕວັກກີ ມີຍອດຜູ້ຕິດເຊື້ອໂຄວິດ-19 ສະສົມເພີ່ມຂຶ້ນເປັນ 3,629 ກໍລະນີ ແລະ ເສຍຊີວິດ 75 ກໍລະນີ.
ຜູ້ຊ່ຽວຊານລະບຸວ່າ ເອທານໍອາດຈະເປັນຊະນິດຂອງແອລກໍຮໍທີ່ສາມາດບໍລິໂພກໄດ້ ແຕ່ດ້ວຍປະລິມານຄວາມເຂັ້ມຂຸ້ນແບບບໍລິສຸດເຊິ່ງມີປະລິມານສູງກວ່າທີ່ພົບໃນເຄື່ອງດື່ມແອລກໍຮໍທົ່ວໄປ ຈຶ່ງເຮັດໃຫ້ຜູ້ທີ່ດື່ມມີພາວະແອລກໍຮໍເປັນພິດ ແລະ ອາດເຮັດໃຫ້ຜູ້ທີ່ດື່ມເຖິງຂັ້ນເສຍຊີວິດໄດ້.
ທັງນີ້, ພ້ອມເຕືອນອີກວ່າ ການໃຊ້ແອລກໍຮໍເພື່ອຂ້າເຊື້ອໂຣກ ຫຼື ຂ້າໄວຣັດນັ້ນໃຊ້ໄດ້ພຽງປ້ອງກັນພາຍນອກ ຄືການເຊັດທຳຄວາມສະອາດທີ່ຜິວໜັງເທົ່ານັ້ນ ການຮັບປະທານແອລກໍຮໍ ຈະຕົງເຂົ້າສູ່ລະບົບຍ່ອຍອາຫານ ແລະ ບໍ່ໄດ້ຊ່ວຍໃນການຂ້າເຊື້ອແຕ່ຢ່າງໃດ.
ຮຽບຮຽງຂ່າວ: ພຸດສະດີ