ໃນວັນທີ 17 ມີນາ 2020 ສຳນັກຂ່າວຕ່າງປະເທດລາຍງານວ່າ ສະຫະພາບເອີຣົບປະກາດຫ້າມໃຫ້ຊາວຕ່າງຊາດນອກທະວີບທີ່ບໍ່ມີຄວາມຈຳເປັນ ເດີນທາງເຂົ້າທະວີບເອີຣົບເປັນເວລາ 30 ວັນ ເພື່ອປ້ອງກັນການແຜ່ລະບາດຂອງໄວຣັດໂຄວິດ-19 ທີ່ກຳລັງຂະຫຍາຍຕົວເປັນວົງກວ້າງໃນເອີຣົບຕອນນີ້.
ທັງນີ້, ອົວຊູລາ ຟອນ ແດຣ໌ ໄລເອິນ ປະທານຄະນະກຳມະທິການເອີຣົບ ຖະແຫຼງການວ່າ ເປັນເລື່ອງທີ່ບໍ່ເຄີຍຄາດຄິດມາກ່ອນວ່າຈະເກີດເລື່ອງແບບນີ້ຂຶ້ນ ແຕ່ມີຄວາມຈຳເປັນຢ່າງຍິ່ງທີ່ຕ້ອງປະກາດໃຫ້ຍົກເລີກການເດີນທາງເຂົ້າມາທີ່ເອີຣົບ ເພື່ອຫຼຸດຜ່ອນການແຜ່ລະບາດຂອງເຊື້ອໄວຣັສໂຄວິດ-19.
ເຖິງຈະມີການປະກາດຫ້າມໃຫ້ຄົນນອກທະວີບເຂົ້າ ແຕ່ກໍ່ຍັງກໍລະນີພິເສດ ເພາະຍັງອະນຸຍາດໃຫ້ເຈົ້າໜ້າທີ່, ບຸກຄະລາກອນທາງການແພດ ແລະ ຜູ້ທີ່ອາໄສຢ່າງຖືກຕ້ອງຕາມກົດໝາຍໃນສະຫະພາບເອີຣົບເທົ່ານັ້ນທີ່ສາມາດເດີນທາງເຂົ້າມາໄດ້.
ຮຽບຮຽງຂ່າວ: ພຸດສະດີ