ທ່ອງທ່ຽວໄທມີແຜນເລື່ອນງານກິດຈະກຳມ່ວນຊື່ນໃນຊ່ວງສົງການອອກໄປຈັດໃນເດືອນກໍລະກົດແທນ ເພື່ອໜີວິກິດໂຄວິດ-19, ໜີໄພແລ້ງເດືອນເມສາ ແລະ ຜູ້ປະກອບການຫຼາຍຈັງຫວັດບໍ່ຢາກໃຫ້ມີການຍົກເລີກຈັດກິດຈະກຳ.
ສຳນັກ ຂ່າວສົດ ແຫ່ງປະເທດໄທ ລາຍງານເມື່ອວັນທີ 11 ມີນາ 2020 ວ່າ ທ່ານ ຍຸດທະສັກ ສຸພະສອນ ຫົວໜ້າວ່າການອົງການທ່ອງທ່ຽວແຫ່ງປະເທດໄທ ເປີດເຜີຍວ່າ ມີແຜນທີ່ຈະເລື່ອນການຈັດກິດຈະກຳເທດສະການເຢັນທົ່ວລ້າ ມະຫາສົງການ ຈາກເດືອນເມສານີ້ ອອກໄປຈັດໃນວັນທີ 4-7 ເດືອນກໍລະກົດ 2020 ເຊິ່ງກົງກັບວັນພັກຍາວໃນຊ່ວງວັນເຂົ້າພັນສາ ເຊິ່ງເປັນການຕົກລົງເຫັນດີຈາກທາງລັດຖະມົນຕີກະຊວງການທ່ອງທ່ຽວ ແລະ ກິລາ ສ່ວນທີ່ເຫຼືອແມ່ນຈະຂໍຄວາມເຫັນຈາກທາງພາກເອກະຊົນວ່າຈະເຫັນດີນຳ ຫຼື ບໍ່.
ທັງນີ້ແມ່ນໄດ້ມອບໝາຍໃຫ້ຮອງຜູ້ວ່າອົງການທ່ອງທ່ຽວທີ່ດູແລກິດຈະກຳໄປສອບຖາມພາກເອກະຊົນວ່າການເລື່ອນກິດຈະກຳຫຼິ້ນນໍ້າອອກໄປ ເພື່ອເປັນການຮອງຮັບນັກທ່ອງທ່ຽວຕ່າງປະເທດ ທີ່ປົກກະຕິໃນແຕ່ລະປີກໍ່ຈະມີນັກທ່ອງທ່ຽວເຂົ້າມາທ່ຽວຊົມກິດຈະກຳຫົດນໍ້າດຳຫົວ ແລະ ສາດນໍ້າອອກໄປເພື່ອໃຫ້ເກີດຄວາມມ່ວນຊື່ນ.
ການຈັດເທສະການສົງການ ຫຼື ປີໃໝ່ ທາງດ້ານປະເພນີມັນບໍ່ສາມາດເລື່ອນໄດ້ ແຕ່ໃນສ່ວນທີ່ເລື່ອນຄືກິດຈະກຳການຫຼິ້ນນໍ້າ ກິດຈະກຳທີ່ສ້າງຄວາມມ່ວນຊື່ນໃຫ້ກັບນັກທ່ອງທ່ຽວເທົ່ານັ້ນ.
ທ່ານ ຍຸດທະສັກ ໄດ້ກ່າວວ່າ: ເທົ່າທີ່ສອບຖາມແຕ່ລະຈັງຫວັດສ່ວນໃຫຍ່ແມ່ນບໍ່ຢາກຍົກເລີກກິດຈະກຳໃນງານສົງການ ແຕ່ເພື່ອຄວາມປອດໄພຈຳເປັນຕ້ອງເລື່ອນກິດຈະກຳອອກໄປ.
ຮຽບຮຽງຂ່າວ: ພຸດສະດີ