ເວັບໄຊ ເດລີນິວສ໌ ລາຍງານເມື່ອວັນທີ 6 ກຸມພາ 2020 ວ່າ ສະມາຊິກສະພາສູງສຸດອາເມຣິກາໄດ້ມີການປະຊຸມວາລະສຳຄັນເມື່ອວັນພຸດທີ່ຜ່ານມາ ເປັນການໂຕ້ວາທີຄັ້ງສຸດທ້າຍກ່ຽວກັບບົດບັນຍັດ 2 ຂໍ້ວ່າດ້ວຍ: ການຖອດຖອນປະທານາທິບໍດີ ໂດນັລ ທຣັມ ອອກຈາກຕຳແໜ່ງຜູ້ນຳປະເທດໃນໂທດຖານໃຊ້ອຳນາດບໍ່ຊອບທຳ ແລະ ຂັດຂວາງຂະບວນການທຳງານຂອງສະພາຄອງເກຣສ ຈາກກໍລະນີລະງັບງົບປະມານສະໜັບສະໜູນທາງການທະຫານໃຫ້ແກ່ກອງທັບຢູເຄນ ເພື່ອກົດດັນໃຫ້ອີກຝ່າຍຮື້ຟື້ນການສອບສວນຂໍ້ຫາການສໍ້ໂກງຂອງ ທ້າວ ຮັບເຕີ ໄບເດນ ລູກຊາຍຂອງອະດີດປະທານາທິບໍດີ ໂຈ ໄບເດນ ຊຶ່ງລົງທຶນດ້ານພະລັງງານໃນຢູເຄນ.
ໃນທີ່ປະຊຸມມີມະຕິ 25 ຕໍ່ 48 ສຽງປະຕິເສດຮັບຮອງຂໍ້ກ່າວຫາ ເຮັດໃຫ້ ໂດນັລ ທຣັມ ພົ້ນຈາກຂໍ້ກ່າວຫາຕາມບົດບັນຍັດຂໍ້ທີສອງ ວ່າດ້ວຍການຂັດຂວາງຂະບວນການທຳງານຂອງສະພາຄອງເກຣສ ຊຶ່ງຜົນອອກມາທີ່ 53 ຕໍ່ 47 ສຽງ ເທົ່າກັບຈຳນວນສະມາຊິກຂອງທັງສອງຝ່າຍ.
ຫຼັງຈາກນັ້ນ, ທ່ານ ຈອນ ໂຣເບີດ ປະທານສານດີກາ ໃນຖານະປະທານການພິຈາລະນາບົດບັນຍັດ ຈຶ່ງປະກາດຕໍ່ສະມາຊິກສະພາສູງສຸດ ໂດຍຖືເອົາມະຕິສຽງສ່ວນຫຼາຍວ່າ ທຣັມ ບໍ່ມີຄວາມຜິດ ດັ່ງນັ້ນຂໍ້ກ່າວຫາທັງສອງຂໍ້ທີ່ສະມາຊິກສະພາຜູ້ແທນປະຊາຊົນສະເໜີນັ້ນໄດ້ຮັບຄະແນນສຽງບໍ່ເຖິງ 2 ໃນ 3 ແລະ ຖືວ່າຕົກໄປ.
ຮຽບຮຽງຂ່າວ: ພຸດສະດີ