ທາງການອີຕາລີຕັດສິນໃຈລະເບີດຊາກທີ່ເຫຼືອຂອງຂົວເຈນົວໂມແຣນດີທີ່ມີອາຍຸ 51 ປີໃນເມືອງເຈນົວ ຊຶ່ງຂົວແຫ່ງນີ້ເກີດເຫດພັງຖະຫຼົ່ມເມື່ອເດືອນສິງຫາປີ 2018 ເຫດການດັ່ງກ່າວເຮັດໃຫ້ມີຄົນເສຍຊີວິດເຖິງ 43 ລາຍ.

ລາຍງານຂ່າວຕ່າງປະເທດເມື່ອວັນທີ 28 ມິຖຸນາຜ່ານມາໃຫ້ຮູ້ວ່າ ຊາກທີ່ເຫຼືອຂອງຂົວທີ່ພັງຖະຫຼົ່ມຊຶ່ງມີສະພາບຊຸດໂຊມ ແລະ ບໍ່ສາມາດບູລະນະສ້ອມແປງຄືນໃໝ່ໄດ້ ດັ່ງນັ້ນ ທາງການຈຶ່ງຕັດສິນໃຈລະເບີດຂົວດັ່ງກ່າວຖິ້ມ ໂດຍມີຮອງນາຍົກລັດຖະມົນຕີກະຊວງປ້ອງກັນປະເທດຂອງອີຕາລີຮ່ວມສັງເກດການຮື້ຖອນໃນຄັ້ງນີ້.

ລາຍງານຂ່າວດຽວກັນລະບຸອີກວ່າ ປະຊາຊົນປະມານ 4.000 ຄົນທີ່ອາໄສຢູ່ໃນຊຸມຊົນໃກ້ຄຽງຖືກສັ່ງໃຫ້ອົບພະຍົບອອກມາໃນລະຫວ່າງການລະເບີດ ຊຶ່ງໃຊ້ເວລາໃນການລະເບີດພຽງ 7 ວິນາທີເທົ່ານັ້ນ.

ທັງນີ້ ລັດຖະບານຂອງອີຕາລີມີແຜນຈະສ້າງຂົວແຫ່ງໃໝ່ທົດແທນຂົວແຫ່ງນີ້ ຊຶ່ງໄດ້ເປີດນຳໃຊ້ມາແຕ່ປີ 1967 ຫຼື ປະມານ 51 ປີ ຂົວດັ່ງກ່າວມີຄວາມຍາວ 210 ແມັດ ແລະ ສູງ 45 ແມັດ ແລະ ເປັນສ່ວນໜຶ່ງຂອງທາງຫຼວງສາຍ A10 ຂອງອີຕາລີ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: posttoday