ວັນຈັນຜ່ານມານີ້ຜູ້ຂຽນມີ ໂອກາດຂັບຂີ່ລົດຜ່ານໄປໃນສາຍທາງຖະໜົນເຈົ້າຟ້າງຸ່ມນະຄອນຫຼວງໄດ້ພົບເຫັນກຸ່ມຜະລິດກະສິກຳອິນຊີປອດສານພິດທີ່ນຳສິນຄ້າກະສິກຳມາວາງຂາຍຢູ່ເດີ່ນເຈົ້າຟ້າງຸ່ມໂອກາດດຽວກັນນີ້ຜູ້ຂຽນໄດ້ສຳພາດທ່ານ ນາງ ແມ້ງ ມະນີວັນ ປະຊາຊົນຢູ່ບ້ານບຸ້ງພ້າວ ເມືອງທຸລະຄົມ ແຂວງວຽງຈັນ ຊຶ່ງເພິ່ນໄດ້ເວົ້າເຖິງການດຳລົງຊີວິດຂອງຕົນເອງກໍທີ່ຈະມາຢຶດເອົາອາຊີບ ເຮັດກະສິກຳປອດສານພິດດັ່ງກ່າວນີ້.
ຄອບຄົວຂອງເພິ່ນໃຫ້ຮູ້ວ່າ: ໃນເມື່ອກ່ອນແມ່ນມີອາຊີບເປັນແມ່ຄ້າ (ຂາຍຜັກ) ຮັບຊື້ຜັກຈາກຊາວກະສິກຳເຂົ້າມາສົ່ງຕາມຕະຫຼາດ ໃນນະຄອນຫຼວງວຽງຈັນ ຊຶ່ງໄດແກ່ຕະຫຼາດທາດຫຼວງຂົວດິນເປັນຕົ້ນຜ່ານການເຮັດອາຊີບຄ້າຂາຍ (ຜັກ) ມາກໍເຫັນ ວ່າລາຍຮັບແມ່ນຍັງບໍ່ໄດ້ຕາມຄາດໜາຍເທົ່າທີ່ຄວນ ແລະ ກໍຈະມັກພົບກັບອຸປະສັກຫຼາຍໆຢ່າງ ເປັນຕົ້ນແມ່ນການຂົນສົ່ງສິນຄ້າ ແມ່ນຕ້ອງໄດ້ໃຊ້ໄລຍະທາງໄກພໍສົມຄວນ ແລະ ໃນການເອົາໄປຂາຍແຕ່ລະຄັ້ງນັ້ນບາງທີ່ກໍໝົດ ຫຼື ກໍບໍ່ໝົດຖ້າວ່າບໍ່ໝົດແລ້ວເຮົາເອງກໍຕ້ອງໄດ້ຂາຍສິນຄ້ານັ້ນໆໃນລາຄາສິນຖືກອອກບໍ່ ດັ່ງນັ້ນ ຜັກສົດນີ້ມັນບໍ່ສາມາດຢູ່ໄດ້ຫຼາຍມື້ສະນັ້ນບາງເທື່ອເຮົາເອງກໍຂາດທຶນ ແລະ ຜູ້ປະກອບການລາຍອື່ນກໍເຊັ່ນກັນປີ 2009 ໂຄງການໄຊມ້ອນເດີ້ໄດ້ລົງໄປຊຸກຍູ້ປະຊາຊົນປູກພືດກະສິກຳອິນຊີຕົນເອງ ຈິ່ງໄດ້ລົ້ມກັນກັບຄອບຄົວວ່າຢາກຢຸດເຊົາກັບອາຊີບທີ່ເຮັດມາກ່ອນໜ້ານີ້ແລ້ວລອງຫັນມາເຮັດອາຊີບໃໝ່ເບິ່ງບາງທີມັນອາດຈະສ້າງລາຍຮັບໃຫ້ກັບຄອບຄົວ ຫຼາຍກໍເປັນໄດ້ມາຮອດປີ 2010 ຕົນເອງຈິ່ງຕັດສິນໃຈເຂົ້າຮ່ວມ ໂຄງການປູກພືດກະສິກຳປອດສານພິດຜ່ານການເຂົ້າຮ່ວມໂຄງການນີ້ມາໄດ້ 4 ປີແມ່ນເຫັນໄດ້ຄວາມແຕກຕ່າງຂອງຊີວິດການເປັນຢູ່ຈາກເມື່ອກ່ອນກັບມື້ນີ້ຕ່າງກັນຫຼາຍສຳລັບລາຍໄດ້ຈາກການຂາຍພືດຜັກໃນແຕ່ລະເດືອນຈະໄດ້ຢູ່ 4 ຫາ 6 ລ້ານກີບຕໍ່ເດືອນຕໍ່ຄອບຄົວ (ລວມທັງທຶນ ແລະ ກຳໄລ) ໂດຍສ່ວນຕົວແລ້ວເຫັນວ່າ ການປູກພືດຜັກກະສິກຳປອດສານພິດນີ້ສາມາດສ້າງລາຍຮັບໃຫ້ແກ່ຄອບຄົວໄດ້ດີຫຼາຍເກີນຄາດ ແລະ ຢູ່ໃນກຸ່ມຜະລິດກະສິກຳຂອງເພິ່ນປະກອບມີ 18 ຄອບຄົວສ່ວນໜ້າ ວຽກແມ່ນຈະຊ່ວຍກັນເຮັດສ່ວນ ຜັກທີ່ກຸ່ມຂອງເພິ່ນເຮັດໄດ້ປະ ກອບມີຜັກຫອມປ້ອມຫອມລາບ ຜັກຫົ້ມຜັກສະລັດ ຜັກກາດຊອມ ແລະ ຜັກອື່ນໆອີກຫຼາຍຢ່າງ.
ສຳລັບວິທີການບົວລະບັດຮັກສາແມ່ນທຸກຄອບຄົວພາຍໃນກຸ່ມ ພ້ອມກັນເອົາໃຈໃສ່ປະຕິບັດຕາມຫຼັກວິຊາການແນະນຳເປັນຕົ້ນການຫຼົກຫຍ້າໃຫ້ນ້ຳ ແລະ ໃສ່ຝຸ່ນ ພ້ອມດຽວກັນນີ້ກໍຍັງຕິດຕາມການເກີດເຊື້ອລາຂອງພືດໃນການໃສ່ຢາຊີວະພາບສີດ ເພື່ອຂັບໄລ່ສັດຕູພືດສ່ວນຝຸ່ນທີ່ນຳມາໃຊ້ນັ້ນ ກໍໃຊ້ຝຸ່ນຄອກຂີ້ແກບ ແລະ ຝຸ່ນຊີວະພາບທີ່ຜະລິດຂຶ້ນເອງ.
ຖ້າຖາມເຖິງຊີວິດການເປັນຢູ່ ຂອງຄອບຄົວໃນ ເມື່ອກ່ອນ ທ່ານ ນາງ ແມ້ງ ໄດ້ເວົ້າດ້ວຍສີໜ້າທີ່ຍິ້ມ ແຍ້ມວ່າໃນການຕັດສິນໃຈເຂົ້າມາເຮັດອາຊີບນີ້ແມ່ນບໍ່ເສຍໃຈເລີຍ ຊຶ່ງມັນຊ່ວຍໃຫ້ຊີວິດການເປັນຢູ່ຂອງຄອບຄົວດີຂຶ້ນມາ ເລື້ອຍໆໃນທຸກໆມື້ ແລະ ໃນອະນາຄົດຄອບຄົວຂອງເພິ່ນເອງແມ່ນຍັງຈະສືບຕໍ່ຜະລິດກະສິກຳປອດສານພິດນີ້ຕະຫຼອດໄປ ເພື່ອຕອບສະໜອງກັບຄວາມຕ້ອງການຂອງຕະຫຼາດໃຫ້ຖ່ວງທັນສ່ວນລູກຄ້າທ່ານໃດທີ່ໄດ້ອ່ານໜັງສືພີມນີ້ແລ້ວຢາກໄປອຸດໜູນກຸ່ມຜະລິດກະສິກຳຂອງເພິ່ນກໍສາມາດໄປຊື້ໄດ້ຢູ່ທີ່ສວນເຈົ້າຟ້າງຸ່ມໃນຕອນບ່າຍຂອງວັນຈັນ ແລະ ຢູ່ເດີນທາດຫຼວງວັນພຸດຕອນບ່າຍກັບວັນເສົາຕອນເຊົ້າຂອງທຸກໆອາທິດ.
ຂອບໃຈບົດຄວາມຈາກ: ໜັງສືພິມ ເສດຖະກິດ-ສັງຄົມ