ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ຕອບຄຳຊັກຖາມຂອງສະມາຊິກສະພາແຫ່ງຊາດຫຼາຍໆບັນຫາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ແລະ ຢືນຢັນວ່າລັດຖະບານໄດ້ເອົາໃຈໃສ່ການສະກັດກັ້ນໄພເງິນເຟີ້ ແລະ ປັບປຸງນະໂຍບາຍເງິນຕາໃຫ້ສອດຄ່ອງຕາມທິດຊີ້ນໍາຂອງຂັ້ນເທິງວາງອອກ.
ທ່ານນາຍົກລັດຖະມົນຕີໄດ້ກ່າວວ່າ ກ່ຽວກັບການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ ຊຶ່ງເປັນໜຶ່ງໃນວຽກຈຸດສຸມຕົ້ນຕໍທາງດ້ານເສດຖະກິດຂອງລັດຖະບານປະຈຳປີ 2019 ແລະ ລັດຖະບານກໍໄດ້ກຳນົດໃນດຳລັດ 560/ນຍ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດປະຈຳປີ 2019 ໂດຍລວມ ລັດຖະບານກໍໄດ້ເອົາໃຈໃສ່ຈັດຕັ້ງປະຕິບັດທັງໝົດ 8 ມາດຕະການ ແຕ່ເນື່ອງຈາກຄຳຖາມທີ່ສະມາຊິສະພາເຈາະຈົງໃສ່ກ່ຽວຂ້ອງສະເພາະມາດຕະການທີ 1 ດັ່ງນີ້ ການຈັດຕັ້ງປະຕິບັດມາດຕະການທີ 1 ການສະກັດກັ້ນໄພເງິນເຟີ້ ແລະ ປັບປຸງນະໂຍບາຍເງິນຕາ.
ໄລຍະຜ່ານມາການຈັດຕັ້ງປະຕິບັດມາດຕະການນີ້ ຖືວ່າໄດ້ຮັບໝາກຜົນໃນລະດັບໜຶ່ງ ເພາະວ່າໂດຍລວມພວກເຮົາຍັງສາມາດຄຸ້ມຄອງເສດຖະກິດມະຫາພາກເພື່ອບໍ່ຕົກເຂົ້າໃນວິກິດ ແລະ ຍັງສາມາດຮັກສາການເຕີບໂຕຂອງເສດຖະກິດໃນລະດັບ 6,5% ຕົວຊີ້ວັດຂອງໝາກຜົນໃນການຈັດຕັ້ງປະຕິບັດມາດຕະການນີ້ກໍສະແດງອອກໃນບົດລາຍງານທີ່ຂ້າພະເຈົ້າໄດ້ສະເໜີຕໍ່ກອງປະຊຸມໃນມື້ກ່ອນເປັນຕົ້ນແມ່ນ
- ຮັກສາອັດຕາເງິນເຟີ້ສະເລ່ຍໃນລະດັບ 1,5% ເຊິ່ງຢູ່ໃນຂອບ ສະພາແຫ່ງຊາດຮັບຮອງໝົດປີບໍ່ເກີນ 5%
- ຮັກສາ ປະລິມານເງິນ M2 ຢູ່ໃນລະດັບ 9% ເຊິ່ງສະພາແຫ່ງຊາດຮັບຮອງ ສະເລ່ຍບໍ່ເກີນ 20%
- ຮັກສາຄ່າເງິນກີບ ຢູ່ໃນກອບເໜັງຕີງ ບໍ່ເກີນ ±5% ຕາມມະຕິສະພາແຫ່ງຊາດກຳນົດ ໃນນີ້ ເງິນກີບທຽບໃສ່ເງິນໂດລາສະຫະລັດ ສະເລ່ຍອ່ອນຄ່າ 0,4% ແລະ ທຽບໃສ່ເງິນບາດອ່ອນຄ່າ 3,4%
- ຄຸ້ມຄອງສ່ວນຕ່າງລະຫວ່າງອັດຕາແລກປ່ຽນທະນາຄານທຸລະກິດ ແລະ ຕະຫຼາດສຳລັບເງິນກີບ ທຽບໃສ່ເງິນໂດລາສະຫະລັດ ສະເລ່ຍຢູ່ໃນລະດັບ 1,7% ແລະ ເງິນກີບ ທຽບໃສ່ເງິນບາດ ສະເລ່ຍຢູ່ໃນລະດັບ 0,4% ຊຶ່ງເປັນອັດຕາທີ່ບໍ່ຕ່າງກັນຫຼາຍ
ນອກຈາກນີ້ ລັດຖະບານກໍມີຄວາມຄືບໜ້າໃນການຈັດຕັ້ງປະຕິບັດວຽກງານທີ່ກຳນົດໃນມາດຕະການນີ້ ເປັນຕົ້ນແມ່ນການສົ່ງເສີມການຊຳລະສະສາງຜ່ານລະບົບທະນາຄານ ການປັບປຸງໂຄງສ້າງລາຄານໍ້າມັນ (ຕັດຕົ້ນທຶນທີ່ພາໃຫ້ລາຄານໍ້າມັນສູງຂຶ້ນ) ການສົ່ງເສີມການໃຊ້ພະລັງງານທົດແທນ ສົ່ງເສີມການນຳໃຊ້ລົດໄຟຟ້າ ໂດຍກຳນົດນະໂຍບາຍຫຼຸດຜ່ອນພາສີນຳເຂົ້າ ສົ່ງເສີມການຜະລິດເປັນສິນຄ້າເພື່ອຫຼຸດຜ່ອນການນຳເຂົ້າ ແລະ ອື່ນໆ.
ເຖິງຢ່າງໃດກໍ່ຕາມ ລັດຖະບານກໍຍັງຈະໄດ້ເພີ່ມຄວາມເອົາໃຈໃສ່ໃນການຈັດຕັ້ງປະຕິບັດບາງວຽກທີ່ກຳນົດໃນມາດຕະການທີ 1 ເປັນຕົ້ນແມ່ນ
- ການເພີ່ມຄັງສຳຮອງເງິນຕາຕ່າງປະເທດ ເພື່ອອຳນວຍຄວາມສະດວກ ຊຸກຍູ້ ແລະ ຊ່ວຍເຫຼືອ ເພື່ອການຊຳລະສະສາງ ເພາະເຫັນວ່າວຽກດັ່ງກ່າວຍັງມີຄວາມທ້າທາຍຫຼາຍຍ້ອນຖານການຜະລິດ ແລະ ຖານລາຍຮັບພາຍໃນຂອງພວກເຮົາຍັງບໍ່ເຂັ້ມແຂງ
- ການພັດທະນາຕະຫຼາດທຶນ ແລະ ຊຸກຍູ້ຕະຫຼາດຫຼັກຊັບລາວກໍຍັງບໍ່ທັນບໍ່ທັນມີຄວາມຄືບໜ້າດີເທົ່າທີ່ຄວນຍ້ອນຄວາມເຊື່ອໝັ້ນຂອງຜູ້ລົງທຶນໃນຕະຫຼາດຫຼັກຊັບຂອງລາວຍັງບໍ່ຫຼາຍ ແລະ ດຶງດູດໃຈກ່ຽວກັບຜົນຕອບແທນຍັງບໍ່ສູງ ເມື່ອທຽບກັບຕະຫຼາດຫລັກຊັບຂອງປະເທດໃກ້ຄຽງ
- ການຊຸກຍູ້ ສົ່ງເສີມ ແລະ ອຳນວຍຄວາມສະດວກໃນການຜະລິດສິນຄ້າ ເຖິງວ່າມີຄວາມພະຍາຍາມ ແຕ່ກໍ່ຍັງຂະຫຍາຍຕົວຊ້າ ໂດຍສະເພາະແມ່ນພາກການຜະລິດ ເພື່ອສົ່ງອອກຍ້ອນພື້ນຖານການຜະລິດຂອງພວກເຮົາຍັງອ່ອນນ້ອຍ ຕະຫຼາດພາຍໃນກໍນ້ອຍ ຄ່າຂົນສົ່ງ ແລະ ຕົ້ນທຶນການຜະລິດພັດສູງ ຄວາມອາດສາມາດແຂ່ງຂັນຂອງພວກເຮົາຍັງຕໍ່າ ນັກທຸລະກິດພາຍໃນທີ່ມີພື້ນຖານແດ່ ສ່ວນໃຫຍ່ລົງທຶນໃນຂະແໜງຊັບພະຍາກອນ ກໍ່ສ້າງ ແລະ ບໍລິການບໍ່ທັນທຸ່ມເທທຶນຮອດ ແລະ ສະຕິປັນຍາໃສ່ການຜະລິດເພື່ອສົ່ງອອກ ດັ່ງນັ້ນ ການແກ້ໄຂບັນຫານີ້ຕ້ອງໄດ້ໃຊ້ເວລາ ແຕ່ໃນໄລຍະຜ່ານມາພັກ ແລະ ລັດກໍໄດ້ມີນະໂຍບາຍ ແລະ ລົງທຶນໃສ່ການຊຸກຍູ້ສົ່ງເສີມການຜະລິດເປັນສິນຄ້າຫຼາຍສົມຄວນ ແລະ ລັດຖະບານຊຸດນີ້ກໍພະຍາຍາມຫຼຸດຜ່ອນການພັດທະນາເສດຖະກິດ ໂດຍອິງໃສ່ຂະແໜງຊັບພະຍາກອນທຳມະຊາດເປັນຕົ້ນຕໍ ດັ່ງນັ້ນ ຂ້າພະເຈົ້າເຊື່ອວ່າໃນຕໍ່ຊຸມປີຕໍ່ໜ້າ ພວກເຮົາຈະແກ້ໄຂຄວາມຫຍຸ້ງຍາກນີ້ໄດ້ແນ່ນອນ.
ໂດຍ: ສະຫະລັດ ວອນທິວົງໄຊ