ເປັນກະແສຮືຮາໄປທົ່ວໂລກອີກຄັ້ງສຳລັບການພັດທະນາທີ່ບໍ່ມີຂີດຈຳກັດໃນຍຸກເຕັກໂນໂລຊີ ເມື່ອ AI ຫຼື ປັນຍາປະດິດຂອງ Google ສາມາດແປພາສາຕ່າງປະເທດໄດ້ ພ້ອມທັງສາມາດປັບລະດັບສຽງໃຫ້ຄ້າຍຄືກັບເຈົ້າຂອງພາສາ.
ຂ່າວດັ່ງກ່າວແມ່ນສັ່ນສະເທືອນເຖິງຫຼາຍໆອາຊີບ ໂດຍສະເພາະອາຊີບແປພາສາ (ລ່າມແປ) ຊຶ່ງ AI ຂອງ Google ໂດຍທີມວິໄຈຂອງ Google ໄດ້ຕັ້ງຊື່ໂຄງການນີ້ວ່າ Translatotron ຊຶ່ງໄດ້ອະທິບາຍ ແລະ ສະຫຼຸບຮູບແບບລວມໆວ່າ ສິ່ງທີ່ເຂົາເຈົ້າກຳລັງຝຶກໃຫ້ AI ມັນບໍ່ເປັນພຽງແຕ່ການແປຈາກສຽງສູ່ຂໍ້ຄວາມ ຫຼື ແປຈາກຂໍ້ຄວາມມາເປັນສຽງຕາມແບບທີ່ເຄີຍມີມາ ແຕ່ມັນຄືການແປພາສາໜຶ່ງໄປສູ່ອີກພາສາໜ່ຶງ ໂດຍທີ່ຍັງຄົງຮູບແບບສຽງຂອງເຈົ້າຂອງພາສາຕົ້ນແບບໄວ້.
ທັງນີ້ ການເຮັດວຽກແມ່ນມີ 3 ຂັ້ນຕອນຫຼັກໆຄື 1. ກ໋ອບປີ້ speech ຕົ້ນສະບັບ 2. ແປ speech ຕົ້ນສະບັບເປັນພາສາທີ່ຕ້ອງການ ແລະ 3. ສ້າງສຽງແບບທີ່ຕ້ອງການໃນ speech ທີ່ຖືກແປຮຽບຮ້ອຍແລ້ວ ໂດຍທີມນັກວິໄຈຢັ້ງຢືນວ່າ ການແປພາສາພ້ອມກັບການເກັບຮັກສາສຳນຽງຕົ້ນສະບັບຍັງບໍ່ເຂົ້າສູ່ລະບົບທີ່ສົມບູນໃນໄວໆນີ້ ເພາະຍັງມີຄວາມສະຖຽນກັບຕົ້ນສະບັບເຕັມ 100%.
ຢ່າງໃດກໍຕາມ ເຖິງແມ່ນວ່າ AI ຈະຍັງຮຽນແບບສຳນຽງໄດ້ບໍ່ເຕັມ 100% ແຕ່ຄວາມພະຍາຍາມໃນການປັບປຸງ ແລະ ພັດທະນາລະບົບກໍຖືເປັນສັນຍານທີ່ດີທີ່ການແປພາສາຈາກ Google ຈະມີມິຕິໃໝ່ໆມາໃຫ້ຊົມໃຊ້ໃນອະນາຄົດ ຊຶ່ງຄາດຄະເນວ່າຖ້າຫາກການວິໄຈສຳເລັດສົມບູນ ແລະ AI ສາມາດເຮັດວຽກໄດ້ດີກວ່ານີ້ ແນ່ນອນວ່າເຕັກໂນໂລຊີດັ່ງກ່າວກໍຈະກາຍເປັນປະໂຫຍດໃຫ້ກັບຜູ້ຊົມໃຊ້ທົ່ວໂລກໂດຍສະເພາະການແປພາສາ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: www.facebook.com/thematterco/posts