ຄວາມຄຽດ ຫຼື ທີ່ຄົນສ່ວນໃຫຍ່ມັກເອີ້ນວ່າຄາຕະກອນງຽບ ເນື່ອງຈາກສົ່ງຜົນກະທົບຕໍ່ທຸກສ່ວນໃນຮ່າງກາຍບໍ່ວ່າຈະເປັນລະບົບຫົວໃຈ ສຸຂະພາບຈິດ ແລະ ອື່ນໆ ຊຶ່ງໃນໄລຍະ 2-3 ປີຜ່ານມາປະເດັນເລື່ອງຄວາມຄຽດກໍຖືເປັນຄວາມກັງວົນທີ່ຖືກຍົກຂຶ້ນມາເວົ້າ ແລະ ຫຼາຍອົງກອນທົ່ວໂລກກໍຮ່ວມຄົ້ນຫາວິທີທາງແກ້ໄຂຢ່າງຮີບດ່ວນ.
ໂດຍນັກວິໄຈຈາກມະຫາວິທະຍາໄລຊິນຊິນເນຕິໃນອາເມຣິກາໄດ້ເປີດເຜີຍວ່າ ອາການເຈັບປ່ວຍທາງຮ່າງກາຍຫຼາຍຢ່າງບໍ່ວ່າຈະເປັນພະຍາດເບົາຫວານ ຄວາມດັນເລືອດສູງ ແລະ ເກີດຄວາມຜິດປົກກະຕິທາງລະບົບປະສາດ ຫຼື ທາງຈິດໃຈ ສ່ວນໃຫຍ່ເກີດມາຈາກ ຄວາມຄຽດຂອງຜູ້ປ່ວຍ ດັ່ງນັ້ນ ການເຮັດຄວາມເຂົ້າໃຈວ່າຄວາມຄຽດສົ່ງຜົນກະທົບຕໍ່ຄົນເຮົາດ້ານໃດແດ່ນັ້ນຈິ່ງເປັນເລື່ອງທີ່ຄວນຮຽນຮູ້ ແລະ ຕິດຕາມຢ່າງໃກ້ຊິດ.
ຫຼ້າສຸດ ນັກວິໄຈຈາກມະຫາວິທະຍາໄລດັ່ງກ່າວໄດ້ພັດທະນາເຄື່ອງທົດສອບແບບໃໝ່ທີ່ມີປະສິດທິພາບສາມາດກວດຈັບຮໍໂມຄວາມຄຽດ ຊຶ່ງຈະໃຊ້ທົດສອບເຫື່ອ ປັດສະວະ ຫຼື ນ້ຳລາຍໄດ້ຢ່າງຕໍ່ເນື່ອງ ໂດຍອຸປະກອນແມ່ນໃຊ້ແສງອັລຕຣາໄວໂອເລຕໃນການວັດແທກຮໍໂມນຄວາມຄຽດ ແຕ່ບໍ່ໄດ້ໝາຍຄວາມວ່າອຸປະກອນນີ້ຈະເຂົ້າມາແທນທີ່ການກວດເລືອດທີ່ມີຄວາມລະອຽດກວ່າໃນຫ້ອງປະຕິບັດການຕາມໂຮງໝໍ ຫຼື ຄລີນິກ ແຕ່ມັນເໝາະສົມສຳລັບການທົດສອບດ້ວຍຕົນເອງທີ່ເຮືອນຖ້າຫາກຮູ້ສຶກບໍ່ສະບາຍ ຊຶ່ງຖ້າຫາກຮູ້ວ່າຮໍໂມນຄວາມຄຽດຂອງເຮົາຢູ່ໃນລະດັບໃດ? ປ່ຽນຈາກເລັກນ້ອຍ ຫຼື ເພີ່ມຂຶ້ນກໍຈະຊ່ວຍໃຫ້ເຮົາໆທ່ານໆແກ້ໄຂ ແລະ ປ້ອງກັນໄດ້ຖືກຈຸດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thairath