ເຊື້ອເຫັດມີບົດບາດສຳຄັນໃນລະບົບນິເວດ ໂດຍສະເພາະການຍ່ອຍສະຫຼາຍອິນຊີວັດຖຸ ແລະ ຄືນທາດອາຫານສູ່ພື້ນດິນເພື່ອຊ່ວຍໃຫ້ພືດຈະເລີນເຕີບໂຕ ຊຶ່ງເມື່ອບໍ່ດົນມານີ້ນັກວິໄຈຈາກມະຫາວິທະຍາໄລລີຈໃນແບນຊິກໄດ້ເປີດເຜີຍການພົ້ນພົບຮ່ອງຮອຍດຶກດຳ ບັນ ຫຼື ຟອສຊິລ (fossil) ຂະໜາດນ້ອຍໆເທິງໂງ່ນຫີນທາງພາກໃຕ້ຂອງເກາະວິກຕໍເຣຍໃນແຖບອາຣກຕິກຂອງປະເທດການາ ດາຊຶ່ງໄດ້ລະບຸວ່າ ເປັນຊາກຟອສຊິລເຊື້ອເຫັດທີ່ມີອາຍຸເກົ່າແກ່ທີ່ສຸດໃນໂລກ.
ສຳນັກຂ່າວຕ່າງປະເທດລາຍງານເມື່ອວັນທີ 29 ພຶດສະພາຜ່ານມາວ່າ ທີມນັກວິໄຈໄດ້ທົດສອບຫີນທີ່ປາກົດຮ່ອງຮອຍຟອສຊິລດັ່ງກ່າວຊຶ່ງພົບວ່າເຊື້ອເຫັດຊະນິດນີ້ກໍ່ໂຕຂຶ້ນລະຫວ່າງ 900-1.000 ລ້ານປີກ່ອນໃນດິນແດນຕາເວັນອອກສຽງເໜືອຂອງການາດາ ເຮັດໃຫ້ເຊື້ອເຫັດທີ່ພົບໃນຄັ້ງນີ້ມີອາຍຸເກົ່າແກ່ກວ່າເຊື້ອເຫັດອາຍຸ 450 ລ້ານປີທີ່ຄົ້ນພົບໃນລັດວິສຄອນຊິນຂອງອາເມຣິກາ ທັງນີ້ ຈາກການວິເຄາະໂຄງສ້າງເຊື້ອເຫັດທີ່ພົບໃໝ່ນີ້ສາມາດລະບຸໄດ້ວ່າເປັນເຊື້ອເຫັດ Ourasphaira giraldae ຊຶ່ງເຊລສືບພັນ ຫຼື ສະປໍຂອງມັນມີຄວາມຍາວໜ້ອຍກວ່າ 10 ມິລິແມັດ ເຊື່ອມຕໍ່ກັນເປັນເສັ້ນໃຍຍາວ ແລະ ແຕກແຍກອອກຫຼາຍສາຍ ນອກນີ້ ຍັງພົບຮ່ອງຮອຍຂອງໄຄຕິນ ຊຶ່ງເປັນສານປະກອບອິນຊີທີ່ໃຊ້ສ້າງຜະໜັງເຊລຂອງເຊື້ອເຫັດອີກດ້ວຍ.
ທັງນີ້ Ourasphaira giraldae ຖືກທຳມະຊາດຮັກສາໄວ້ເປັນຢ່າງດີ ໂດຍເກາະຕິດຢູ່ໃນໂງ່ນຫີນແຂງ ຊຶ່ງປ້ອງກັນອົກຊີແຊນ ຊຶມເຂົ້າໄປສະຫຼາຍເຊື້ອເຫັດພາຍໃນ ຂະນະທີ່ນັກວິໄຈເຫັນວ່າ ການຄົ້ນພົບເຊື້ອເຫັດທີ່ກຳເນີດຂຶ້ນເມື່ອ 1.000 ລ້ານປີກ່ອນນີ້ຊີ້ໃຫ້ເຫັນວ່າສິ່ງມີຊີວິດນ້ອຍໆເຫຼົ່ານີ້ໜ້າຈະເປັນໂຕວາງຮາກຖານສຳລັບການກຳເນີດພືດໃນຍຸກທຳອິດໃນພື້ນນັ້ນໆເມື່ອປະມານ 470 ລ້ານປີທີ່ຜ່ານມາ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ:thairath