ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ມີຄຳສັ່ງໃຫ້ພາກສ່ວນກ່ຽວຂ້ອງກວດສອບມູນຄ່າໂຄງການກໍ່ສ້າງຖະໜົນທຸກໂຄງການໃນທົ່ວປະເທດ ເນື່ອງຈາກພົບຫຼາຍໂຄງການມີມູນຄ່າສູງເກີນຄວາມເປັນຈິງ.
ທ່ານ ບຸນຈັນ ສິນທະວົງ ຖະມົນຕີກະຊວງໂຍທາທິການ ແລະ ຂົນສົ່ງ ຖະແຫຼງຢືນຢັນວ່າ ການດຳເນີນມາດຕາການກວດສອບໂຄງການກໍ່ສ້າງຖະໜົນໃນຫຼາຍແຂວງເມື່ອບໍ່ດົນມານີ້ພົບວ່າ ມີການກຳນົດມູນຄ່າການກໍ່ສ້າງເກີນຄວາມເປັນຈິງໃນທຸກໂຄງການທີ່ໄດ້ດຳເນີນການກວດສອບ ດັ່ງນັ້ນ ທ່ານນາຍົກລັດຖະມົນຕີຈິ່ງໄດ້ມີຄຳສັ່ງເຖິງກະຊວງໂຍທາທິການ ແລະ ຂົນສົ່ງໃຫ້ດຳເນີນການກວດສອບທຸກໂຄງການກໍ່ສ້າງຖະໜົນໃນທົ່ວປະເທດ ທັງທີ່ພວມກໍ່ສ້າງ ແລະ ໂຄງການທີ່ໄດ້ຮັບອະນຸມັດກໍ່ສ້າງຢ່າງລະອຽດ.
ນອກນັ້ນ ບັນດາໂຄງການພັດທະນາຕ່າງໆທີ່ພາກເອກະຊົນລົງທຶນໃຫ້ກ່ອນກໍເປັນອີກພາກສ່ວນໜຶ່ງທີ່ມີການປະເມີນມູນຄ່າສູງເກີນເປັນຈິງ ໂດຍຊ່ຽວຊານທາງດ້ານການເງິນຂອງທະນາຄານໂລກປະຈຳ ສປປ ລາວ ໄດ້ເປີດເຜີຍວ່າ ລັດຖະບານ ສປປ ລາວ ເປັນໜີ້ຈາກການກູ້ຢືມເງິນທຶນທັງພາຍໃນ ແລະ ຕ່າງປະເທດເພື່ອນຳມາໃຊ້ສຳລັບການດຸນດ່ຽງງົບປະມານດ້ານລາຍຈ່າຍ.
ໂດຍ: ສະຫະລັດ ວອນທິວົງໄຊ