ກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ ຮ່ວມກັບ ໂຮງໝໍມິດຕະພາບ 150 ຕຽງ ກະຊວງສາທາລະນະສຸກ ໄດ້ເປີດສູນກວດສຸຂະພາບແຮງງານພາຍໃນ ແລະ ຕ່າງປະເທດ ຢູ່ທີ່ໂຮງໝໍ 150 ຕຽງ .ໃນວັນທີ 26 ເມສາ 2019 ໂດຍມີ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທັງນີ້ ກໍເພື່ອເຮັດໃຫ້ຊາວຜູ້ອອກແຮງງານຢູ່ ສປປ ລາວ ໄດ້ມີການກວດສຸຂະພາບ ຢ່າງສະໝໍ່າສະເໝີ ຫລື ຢ່າງໜ້ອຍ 1 ຄັ້ງ/ປີ ເພື່ອຮັບປະກັນໃຫ້ເຂົາເຈົ້າມີສຸຂະພາບແຂງແຮງ ສາມາດເຄື່ອນໄຫວເຮັດວຽກໄດ້ຢ່າງມີປະສິດທິຜົນ ໂດຍປາສະຈາກການເປັນພະຍາດ. ທ່ານ ສະໜອງ ທອງຊະນະ ຜູ້ອຳນວຍການໂຮງໝໍມິດຕະພບ ໄດ້ໃຫ້ຮູ້ວ່າ: ສູນກວດສຸຂະພາບແຮງງານ ແຫ່ງນີ້ ແມ່ນຮັບຜິດຊອບກວດສຸຂະພາບໃຫ້ແກ່ຊາວຜູ້ອອກແຮງງານໂດຍສະເພາະ ຈະບໍ່ໄດ້ປິ່ນປົວຄົນເຈັບຄືໂຮງໝໍທົ່ວໄປ ເຊິ່ງຈະເປັນທັງບ່ອນໃຫ້ບໍລິການກວດສຸຂະພາບປະຈຳປີຂອງຜູ້ອອກແຮງງານ, ກວດສຸຂະພາບແຮງງານຕ່າງປະເທດທີ່ເຂົ້າມາເຮັດວຽກຢູ່ ສປປ ລາວ ແລະ ຈະເປັນຖານຂໍ້ມູນຂ່າວສານດ້ານສຸຂະພາບຂອງຜູ້ອອກແຮງງານທົ່ວປະເທດ, ການກວດສຸຂະພາບຂອງຮງງານປີລະຄັ້ງ ກໍເພື່ອເປັນການຕິດຕາມຄວາມພ້ອມດ້ານສຸຂະພາບຂອງຜູ້ອອກແຮງງານໃນການເຮັດວຽກ, ປ້ອງກັນ ແລະ ຮັກສາໃຫ້ທັນຕໍ່ພະຍາດຕ່າງໆທີ່ເກີດຂຶ້ນຈາກການເຮັດວຽກ.
ພ້ອມນີ້ສູນກວດສຸຂະພາບດັ່ງກ່າວ ຍັງມີລົດບໍລິການກວດສຸຂະພາບເຄື່ອນທີ່ ເພື່ອເຄື່ອນໄຫວໃຫ້ບໍລິການກວດສຸຂະພາບຢູ່ຕາມໂຮງຈັກໂຮງງານ ແລະ ສະຖານທີ່ຕ່າງໆ ທີ່ບໍສາມາດເຂົ້າກວດສຸຂະພາບຢູ່ສູນໄດ້. ໂອກາດດຽວກັນ, ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກໍໄດ້ໃຫ້ຮູ້ວ່າ: ສູນກວດກາສຸຂະພາບດັ່ງກ່າວ ໄດ້ຮັບການສ້າງຕັ້ງຂຶ້ນພາຍໃຕ້ເງື່ອນໄຂ ແລະ ສະພາບຄວາມຮຽກຮ້ອງຕ້ອງການຂອງວຽກງານປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານທາງດ້ານຄວາມປອດໄພ ແລະ ສຸຂະພາບແຮງງານ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍແຮງງານ ແລະ ລະບຽບການທີ່ກ່ຽວຂ້ອງ ກັບການປ້ອງກັນການເກີດພະຍາດຕ່າງໆ ຈາກການເຮັດວຽກຂອງຜູ້ອອກແຮງງານ ແລະ ທີ່ສຳຄັນຂໍ້ມູນສຸຂະພາບຂອງຜູ້ອອກແຮງງານສາມາດນຳມາວິເຄາະ ແລະ ກຳນົດເປັນນະໂຍບາຍຕ່າງໆ ເພື່ອປ້ອງກັນ ແລະ ແກ້ໄຂບັນຫາດ້ານສຸຂະພາບໄດ້.
ຂຽນໂດຍ: ສະຫະລັດ ວອນທິວົງໄຊ