ສະພາບໍລິຫານຂອງທະນາຄານໂລກ ໄດ້ອະນຸມັດເງິນຈຳນວນ 50 ລ້ານໂດລາສະຫະລັດ ຈາກກອງທຶນພິເສດ ເພື່ອການຊ່ວຍເຫລືອເຫດການທີ່ເປັນວິກິດການເພີ່ມໃສ່ສອງໂຄງການ ທີ່ກຳລັງໃຫ້ການຊ່ວຍເຫລືອ ສປປ ລາວ ໃນການພັດທະນາພື້ນຖານໂຄງລ່າງ ໃຫ້ມີຄວາມຄົງທົນ ແລະ ສາມາດຮັບມື ກັບການປ່ຽນແປງຂອງສະພາບດິນຟ້າອາກາດ ໃນເຂດທີ່ຖືກກະທົບຈາກໄພນ້ຳຖ້ວມ.
ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ກ່າວວ່າ: ທຸກພາກຂອງປະເທດຂອງພວກຂ້າພະເຈົ້າ ໄດ້ຮັບຜົນກະທົບຢ່າງໜັກໜ່ວງ ຈາກໄພນ້ຳຖ້ວມໃນປີກາຍນີ້, ເຊິ່ງໄດ້ເຮັດໃຫ້ມີການສູນເສຍຊີວິດ, ຊັບສິນ, ມີຜົນກະທົບຕໍ່ການດຳລົງຊີວິດ ແລະ ສ້າງຄວາມເສຍຫາຍຢ່າງຫລວງຫລາຍ ຕໍ່ພື້ນຖານໂຄງລ່າງຂອງລັດ.
ນອກຈາກນີ້, ການຟຶ້ນຟູຄວາມເສຍຫາຍຈາກໄພພິບັດ ແລະ ການກໍ່ສ້າງຄືນໃໝ່ແມ່ນຕ້ອງການທຶນຫລາຍກວ່າ 520 ລ້ານ ໂດລາສະຫະລັດ. ການສະໜັບສະໜູນດ້ານການເງິນ ເພີ່ມຈາກທະນາຄານໂລກນີ້ ຈະຊ່ວຍພວກຂ້າພະເຈົ້າ ໃນການຟື້ນຟູບັນດາເສັ້ນທາງທີ່ຖືກເປ່ເພ ແລະ ການປັບປຸງຕາຝັ່ງຕາມລຳແມ່ນ້ຳ ເພື່ອປ້ອງກັນນ້ຳຖ້ວມໃຫ້ມີຄວາມທົນທານກວ່າເກົ່າ.
ຝົນຕົກໜັກແບບຜິດປົກກະຕິ ໃນລະດູຝົນປີ 2018 ໄດ້ສ້າງຄວາມເສຍຫາຍ ແລະ ສົ່ງຜົນກະທົບຕໍ່ປະຊາຊົນຫລາຍກວ່າ 616.000 ຄົນ ແລະ ມີຜູ້ເສຍຊີວິດ 56 ຄົນ. ພາຍຸເຂດຮ້ອນໃນເດືອນກໍລະກົດ ທີ່ມີຊື່ວ່າ ພາຍຸເຊິນຕິນ ແລະ ພະຍຸເບບິນກາ ໃນເດືອນສິງຫາ ໄດ້ພາໃຫ້ເກີດນ້ຳຖ້ວມ ໃນຫລາຍພື້ນທີ່ໃນທົ່ວປະເທດ. ພາກໃຕ້ຂອງ ສປປ ລາວ ຍັງໄດ້ຮັບຜົນກະທົບຕື່ມອີກ ຍ້ອນສັນເຂື່ອນໄຟຟ້າເຊປຽນ-ເຊນ້ຳນ້ອຍເພພັງໃນເດືອນກໍລະກົດ. ການປະເມີນຜົນຄວາມຕ້ອງການຫລັງໄພພິບັດທີ່ນຳພາໂດຍລັດຖະບານ ໄດ້ປະເມີນມູນຄ່າຂອງຄວາມເສຍຫາຍ ຄວາມສູນເສຍທາງດ້ານເສດຖະກິດ, ຄວາມຕ້ອງການໃນການຟື້ນຟູຄືນໃໝ່ ແລະ ຜົນກະທົບລວມ ຕໍ່ເສດຖະກິດຂອງ ສປປ ລາວ ປະມານ 520.4 ລ້ານໂດລາສະຫະລັດ.
ທ່ານ ນິໂກລາ ພອນທາຣາ ຫົວໜ້າຫ້ອງການທະນາຄານໂລກປະຈຳ ສປປ ລາວ ໄດ້ກ່າວວ່າ: ກອງທຶນຕອບໂຕ້ວິກິດການຂອງ IDA ແມ່ນກອງທຶນພິເສດອັນໜຶ່ງ ສ້າງຂຶ້ນມາເພືຶ່ອຊ່ວຍເຫລືອ ບັນດາປະເທດທີ່ຖືກເຄາະຮ້າຍ ຈາກໄພພິບັດຢ່າງຮ້າຍແຮງ. ມູນຄ່າຄວາມເສຍຫາຍ ແລະ ຄວາມສູນເສຍທາງດ້ານເສດຖະກິດ ເນື່ອງຈາກໄພນ້ຳຖ້ວມປີກາຍນີ້ ແມ່ນສູງຫລາຍທີ່ສຸດ ທຽບໃສ່ມູນຄ່າເສຍຫາຍໃນປີຜ່ານມາ ລວມທັງພາຍຸໄຮມາ ແລະ ພາຍຸນົກເຕັນ ໃນປີ 2011, ແລະ ພາຍຸໄຊໂຄລນເກດສະນາ ໃນປີ 2009. ການສະໜັບສະໜູນດ້ານການເງິນເພີ່ມເຕີມນີ້ ຈະສາມາດຊ່ວຍຟື້ນຟູໃຫ້ພື້ນຖານໂຄງລ່າງທີ່ຖືກເສຍຫາຍ ແລະ ໃຫ້ມີຄວາມທົນທານຫລາຍຂຶ້ນຕໍ່ໄພພິບັດໃນອະນາຄົດ.
ຂຽນໂດຍ: ແຟນຊິສ ສະຫວັນຄຳ