ຫລັງຈາກມີຂ່າວກ່ຽວກັບຊາຍຄົນອັງກິດຄົນໜຶ່ງທີ່ີຫາຍຂາດຈາດພະຍາດໂລກເອດ ຕັ້ງແຕ່ລາວເຂົ້າຮັບການຮັກສາ ແລະ ໄດ້ຮັບການລາຍງານຈາກນັກຄົ້ນຄວ້າທີ່ຮັກສາຜູ້ປ່ວຍໃນປະເທດເຢຍລະມັນດ້ວຍເຊັ່ນກັນ. ຈາກການລວບລວມທັງສອງກໍລະນີນີ້ອາດຈະເປັນຫລັກຖານທີ່ມີຄວາມເປັນໄປໄດ້ວ່າໂລກເອດອາດສາມາດຮັກສາໃຫ້ຫາຍຂາດໄດ້.
ເຊື້ອໄວຣັດທີ່ຕິດເຊື້ອໃນຈຸລັງຂອງລະບົບພູມຕ້ານທານຂອງຮ່າງກາຍແມ່ນສ້າງຂຶ້ນມາຈາກໄຂກະດູກ. ຊາຍຄົນໜຶ່ງເຊິ່ງເປັນທີ່ຮູ້ຈັກໃນຊື່ “ຜູ້ປ່ວຍເບີລີນ” ເປັນບຸກຄົນທຳອິດຂອງໂລກທີ່ຫາຍຂາດຈາກໂລກເອດ ຫລັງຈາກທີ່ເຂົ້າຮັບການຮັກສາໃນປີ 2007 ເປັນການຮັກສາມະເລັງເມັດເລືອດຂາວ ເຊິ່ງເປັນມະເລັງໃນລະບົບພູມຕ້ານທານຂອງຮ່າງກາຍ. ລາວໄດ້ຮັບການຮັກສາໂດຍການບຳບັດດ້ວຍລັງສີ ຫລືຢາ ເຊິ່ງເກືອບຈະເປັນການຂ້າຈຸລັງໃນລະບົບພູມຕ້ານທານຮ່າງກາຍຂອງລາວທັງໝົດ ແລ້ວປ່ຽນແທນດ້ວຍຈຸລັງໄຂກະດູກຈາກຜູ້ບໍລິຈາກ. ເຊິ່ງຈຸລັງທີ່ໄດ້ຮັບການບໍລິຈາກນັ້ນເປັນຈຸລັງທີ່ຕໍ່ຕ້ານໂລກເອດໂດຍທຳມະຊາດຢູ່ແລ້ວ, ແຕ່ນັບວ່າເປັນແຊນ (ພັນທຸກຳ) ຊະນິດໜຶ່ງທີ່ຫາຍາກທີ່ມີຊື່ເອີ້ນວ່າ CCR5.
ນັບຕັ້ງແຕ່ນັ້ນເປັນຕົ້ນມາ, ກໍຍັງບໍ່ພົບຜູ້ປ່ວຍກໍລະນີໃດທີ່ສາມາດກຳຈັດໂລກເອດອອກຈາກຮ່າງກາຍໄດ້ສຳເລັດໂດຍການນຳໃຊ້ວິທີການດັ່ງກ່າວອີກເລີຍ, ຈົນຮອດວັນຈັນທີ່ຜ່ານມາໄດ້ມີການປະກາດພົບກໍລະນີທີສອງ. ເຊິ່ງກໍລະນີດັ່ງກ່າວນີ້ເປັນທີ່ຮູ້ຈັກກັນດີໃນຊື່ທີ່ເອີ້ນວ່າ “ຜູ້ປ່ວຍລອນດອນ” ເຊິ່ງໄດ້ຮັບການຮັກສາໂດຍການປູກຖ່າຍໄຂກະດູກຈາກຜູ້ບໍລິຈາກທີ່ແຊນ (ພັນທຸກຳ) ມີຊື່ເອີ້ນວ່າ CCR5 ເພື່ອເປັນການຮັກສາພະຍາດມະເລັງຕ່ອມນໍ້າເຫລືອງເຊິ່ງເປັນມະເລັງທີ່ທຳລາຍລະບົບພູມຕ້ານທານໃນຮ່າງກາຍອີກຊະນິດໜຶ່ງ. ເຊິ່ງຫລັງຈາກນັ້ນຜູ້ປ່ວຍໄດ້ຮັບການແນະນຳໃຫ້ຢຸດໃຊ້ຢາຕ້ານໄວຣັດ ເຊິ່ງເປັນຕົວຢາທີ່ຢັບຢັ້ງໄວຣັດເປັນເວລາ 1ປີ. ຫລັງຈາກ 18ເດືອນຕໍ່ມາພົບວ່າກວດບໍ່ພົບເຊື້ອໄວຣັດໂລກເອດອີກເລີຍ.
ແລະກໍລະນີທີສາມທີ່ອາດຈະຢູ່ໃນລັກສະນະແບບດຽວກັນ ໄດ້ຮັບການປະກາດໃນມືີ້ນີ້ ທີ່ກອງປະຊຸມທາງວິຊາການກ່ຽວກັບ ການຕິດເຊື້ອໄວຣັດ ຊະນິດພິເສດທີ່ເມືອງ ຊີແອັດເທິ້ລ ສະຫະລັດອາເມລິກາ. ຕາມການລາຍງານຂອງທ່ານນາງ ແອນມາຣີ ເວນຊິງ ຈາກມະຫາວິທະຍາໄລສູນກາງດ້ານການເເພດ ຢູເທຣັກ ໃນປະເທດເນເທີແລນ ກ່າວວ່າ: ຈາກການຕັດເອົາຊິ້ນເນື້ອຈາກລຳໃສ້ ແລະຕ່ອມນໍ້າເຫລືອງຂອງຜູ້ປ່ວຍທີ່ມີຊື່ເອີ້ນວ່າ “ຜູ້ປ່ວຍດັດເຊລດອັບ” ໄປວິເຄາະສະແດງໃຫ້ເຫັນວ່າບໍ່ມີການຕິດເຊື້ອຂອງ HIV ອີກເລີຍຫລັງຈາກການຢຸດເຊົາຮັບຢາຕ້ານໄວຣັດເປັນເວລາ ສາມເດືອນຕິດຕໍ່ກັນແລ້ວ. ມີພຽງແຊນເກົ່າໆຫລົງເຫລືອທີ່ຈະບໍ່ສາມາດຈະຂະຫຍາຍຕົວໄດ້ອີກ. ເຊິ່ງກໍລະນີດັ່ງກ່າວນີ້ແມ່ນມີຄວາມຄ້າຍຄືກັນກັບກໍລະນີຂອງຜູ້ປ່ວຍເບີລີນ ແລະ ລອນດອນ ທ່ານນາງ ແອນເມຣີກ່າວ.
ປັດຈຸບັນ, ນັກຄົ້ນຄວ້າກຳລັງຕິດຕາມຜູ້ທີ່ຕິດເຊື້ອ HIV ອີກຈຳນວນສອງສາມຄົນ ທີ່ໄດ້ຮັບການຮັກສາໂດຍການປູກຖ່າຍໄຂກະດູກ ຈາກຜູ້ບໍລິຈາກ ແຊນ (ພັນທຸກຳ) ມີຊື່ເອີ້ນວ່າ CCR5 ພາຍໃຕ້ການຮ່ວມມືໃນໂຄງການທີ່ເອີ້ນວ່າ IciStem ຈາກການລາຍງານຂອງສາມກໍລະນີດັ່ງກ່າວນັ້ນ ແມ່ນມີສອງກໍລະນີທີ່ຍັງບໍ່ທັນໄດ້ຢຸດການຮັບຢາຢັບຢັ້ງໄວຣັດເທື່ອ, ທ່ານ ຊາເວຍ ປີກາໂຊ ຈາກສະຖາບັນຄົ້ນຄວ້າກ່ຽວກັບໂລກເອດ IrsiCaixa ໃນເມືອງບາເຊໂລນາ ກ່າວ.
ການປູກຖ່າຍໄຂກະດູກ ແມ່ນບໍ່ສາມາດນຳໃຊ້ໄດ້ກັບຄົນເປັນເອດທີ່ບໍ່ເປັນມະເລັງ, ເພາະວ່າການຮັກສາດ້ວຍວິທີການດັ່ງກ່າວແມ່ນມີຄວາມສ່ຽງສູງ ແລະ ຈະນຳໃຊ້ເປັນວິທີທາງສຸດທ້າຍຂອງການຮັກສາເທົ່ານັ້ນ. ແຕ່ວ່າ ຈາກຂໍ້ເທັດຈິງໃນການຄົ້ນພົບດັ່ງກ່າວອາດຈະນຳໄປສູ່ການວາງແນວທາງໃນການຮັກສາໃນອະນາຄົດໄດ້. ໂດຍສະເພາະອີກຫົນທາງໜຶ່ງທີ່ຈະເປັນໄປໄດ້ກໍຄືການນຳໃຊ້ວີທີການແກ້ໄຂແຊນ(ພັນທຸກຳ) ເພື່ອສ້າງແຊນທີ່ມີຊື່ວ່າ CCR5 ພາຍໃນຈຸລັງລະບົບພູມຕ້ານທານຂອງຜູ້ປ່ວຍເອງ.
ຮຽບຮຽງຂ່າວ: ແຟນຊິສ ສະຫວັນຄຳ
ແຫຼ່ງຂໍ້ມູນ: newscientist.com