ສຳນັກຂ່າວຕ່າງປະເທດລາຍງານຈາກປະເທດອິນເດຍ ເມື່ອວັນທີ 11 ກຸມພາ 2019 ທີ່ຜ່ານມາວ່າ ຊາວອິນເດຍເສຍຊີວິດຢ່າງໜ້ອຍ 105 ຄົນ ແລະ ປ່ວຍເຂົ້າຮັກສາຕົວທີ່ໂຮງໝໍອີກຫຼາຍສິບຄົນ ເນື່ອງຈາກການດື່ມເຫຼົ້າເຖື່ອນໃນ 2 ລັດທາງພາກເໜືອຄື: ລັດອຸດຕະລາຂັນ ແລະ ລັດອຸດຕະລາປະເທດ ຜູ້ທີ່ດື່ມເຫຼົ່າເຖື່ອນຈະມີອາການປວດທ້ອງ ແລະ ຫາຍໃຈລຳບາກ, ເຊິ່ງເຈົ້າໜ້າທີ່ຕຳຫຼວດໃນເມືອງ ຫຼິດວາ ລັດອຸດຕະລາຂັນ ໄດ້ຈັບຜູ້ຕ້ອງສົງໃສທີ່ຂາຍເຫຼົ້າເຖື່ອນໄປດຳເນີນຄະດີໄດ້ 4 ຄົນ.
ສື່ໜັງສືພິມອິນເດຍ ລາຍງານວ່າ ມີຈຳນວນຜູ້ເສຍຊີວິດໃນເມືອງ ຫຼິດວາ 36 ຄົນ, ປ່ວຍເຂົ້າຮັກສາຕົວທີ່ໂຮງໝໍ 18 ຄົນ ສ່ວນຜູ້ເສຍຊີວິດໃນລັດອຸດຕະລາປະເທດ ມີ 69 ຄົນ.
ການເສຍຊີວິດຈາກການດື່ມເຫຼົ້າເຖື່ອນ ເກີດຂຶ້ນເປັນປະຈຳໃນອິນເດຍ ໂດຍສະເພາະຢູ່ເຂດຊົນນະບົດ ເຊິ່ງປະຊາຊົນນັກດື່ມຈຳນວນຫຼາຍແມ່ນບໍ່ມີເງິນພຽງພໍທີ່ຈະຊື້ເຫຼົ້າຖືກກົດໝາຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews