ໃນໄລຍະຜ່ານມາ, ຍັງມີບາງສະຖາບັນການເງິນຈຸລະພາກເຄື່ອນໄຫວບໍ່ຖືກຕ້ອງ ແລະ ບໍ່ສອດຄ່ອງກັບລະບຽບກົດໝາຍທີ່ກໍານົດໄວ້ ເຮັດໃຫ້ສ່ຽງຕໍ່ຄວາມໝັ້ນຄົງຂອງລະບົບສະຖາບັນການເງິນ, ສັງຄົມມີຄວາມວຸ້ນວາຍ ຢ່າງໃດກໍຕາມບັນຫານີ້ອາດຈະໝົດໄປ ເພາະ ທຫລ ປະກາດຜ່ານສື່ມວນຊົນໃຫ້ສັງຄົມຢ່າຫຼົງເຊື່ອຄໍາໂຄສະນາຂອງພວກຄົນບໍ່ດີເປັນອັນເດັດຂາດ ຖ້າພົບເຫັນພຶດຕິກໍາບໍ່ດີຕ້ອງຮີບສົ່ງຂໍ້ມູນ ຫຼື ແຈ້ງດ່ວນມາທີ່ກົມຄຸ້ມຄອງສະຖາບັນການເງິນ ທຫລ ຕາມເບີໂທລະສັບ 021-265712 ເພື່ອດໍາເນີນມາດຕະການຕໍ່ຜູ້ລະເມີດຕໍ່ລະບຽບກົດໝາຍ.
ທ່ານ ອາລຸນ ບຸນຍັງ ຫົວໜ້າກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ (ທຫລ) ກ່າວຢືນຢັນຕໍ່ຜູ້ສື່ຂ່າວໃນວັນທີ 6 ກຸມພາ 2019 ວ່າ: ຜ່ານມາຍັງມີບາງສະຖາບັນການເງິນຈຸລະພາກທີ່ມີພຶດຕິກໍາເຄື່ອນໄຫວບໍ່ຖືກຕ້ອງ ແລະ ບໍ່ສອດຄ່ອງກັບລະບຽບກົດໝາຍທີ່ກໍານົດໄວ້ ເຊິ່ງເຮັດໃຫ້ເກີດມີຄວາມສ່ຽງຕໍ່ຄວາມໝັ້ນຄົງຂອງລະບົບສະຖາບັນການເງິນ, ສັງຄົມວຸ້ນວາຍ ແລະ ມີການຟ້ອງຮ້ອງເກີດຂຶ້ນກາຍເປັນຄະດີຄວາມ ເຊັ່ນ: ບາງສະຖາບັນການເງິນບໍ່ພັດທະນາລະບົບບັນຊີຂອງຕົນໃຫ້ໄດ້ມາດຕະຖານທີ່ ທຫລ ກໍານົດໄວ້ ຈຶ່ງບໍ່ສາມາດລາຍງານຂໍ້ມູນໃຫ້ ທຫລ ທັນຕາມເວລາ ຫຼື ຂໍ້ມູນມີການດັດແກ້ເຮັດໃຫ້ບໍ່ມີຄວາມໜ້າເຊື່ອຖື. ນອກນັ້ນ, ການບໍລິຫານຈັດການຍັງບໍ່ໄດ້ດີເທົ່າທີ່ຄວນຈຶ່ງເກີດມີສະພາບຄ່ອງ, ບໍ່ສາມາດສົ່ງຄືນເງິນຝາກ ແລະ ດອກເບ້ຍໃຫ້ລູກຄ້າຕາມກໍານົດ; ບາງສະຖາບັນມີພຶດຕິກໍາແອບແຝງເພື່ອລະດົມເງິນ ຫຼື ປ່ອຍສິນເຊື່ອເປັນເງິນຕາຕ່າງປະເທດ ເຊິ່ງຜິດກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະ ເປັນການເຄື່ອໄຫວເກີນຂອບເຂດທີ່ ທຫລ ອະນຸຍາດ.
ທ່ານຫົວໜ້າກົມ ຢໍ້າຕື່ມວ່າ: ແຕ່ນີ້ຕໍ່ໄປ ທຫລ ຈະເອົາໃຈໃສ່ຕິດຕາມຢ່າງໃກ້ຊິດ ເພື່ອແກ້ໄຂບັນຫາບົນພື້ນຖານລະບຽບຫຼັກການ ແລະ ແກ້ໄຂໃຫ້ໄດ້ໃນປີ 2019 ຫາກສະຖາບັນການເງິນໃດເຄື່ອນໄຫວນອກເໜືອຈາກຂອບເຂດທີ່ໄດ້ຮັບອະນຸຍາດຕ້ອງຖືກປະຕິບັດວິໄນຢ່າງເຂັ້ມງວດ ແລະ ເດັດຂາດ. ພ້ອມທັງຮຽກຮ້ອງຜ່ານສື່ມວນຊົນໃຫ້ສັງຄົມຮັບຊາບວ່າ: ທຫລ ຈະບໍ່ອະນຸຍາດໃຫ້ສະຖາບັນການເງິນຈຸລະພາກໃດລະດົມເງິນຝາກ ຫຼື ປ່ອຍກູ້ ເປັນເງິນຕາຕ່າງປະເທດຢ່າງເດັດຂາດ, ຂໍແຈ້ງໃຫ້ສັງຄົມຢ່າງຫຼົງເຊື່ອຕໍ່ຄໍາໂຄສະນາຂອງພວກຄົນບໍ່ດີເປັນອັນເດັດຂາດ ຖ້າພົບເຫັນພຶດຕິກໍາດັ່ງກ່າວໃຫ້ສົ່ງຂໍ້ມູນ ຫຼື ແຈ້ງໂດຍດ່ວນມາຍັງກົມຄຸ້ມຄອງສະຖາບັນການເງິນ ທຫລ ທີ່ເບີໂທລະສັບ 021-265712 ເພື່ອດໍາເນີນມາດຕະການຕໍ່ຜູ້ລະເມີດຕໍ່ລະບຽບກົດໝາຍໄດ້ຢ່າງທັນການ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບຄົນຈາກ: laoedaily.com.la