ບໍລິສັດ ເອເຊຍລົງທຶນພັດທະນາ ແລະ ກໍ່ສ້າງ ຈໍາກັດຜູ້ດຽວ ສະເໜີ 4 ບັນຫາຫຼັກ ເພື່ອໃຫ້ລັດຖະບານພິຈາລະນາແກ້ໄຂ ໂດຍເນັ້ນການຂະຫຍາຍເສດຖະກິດ ຄວນດຶງດູດການລົງທຶນຈາກຕ່າງປະເທດຄຽງຄູ່ກັບການສ້າງຄົນລາວໃຫ້ເກັ່ງ; ຫຼຸດຜ່ອນມູນຄ່າເພີ່ມຈາກ 10% ລົງມາເປັນ 5% ເພື່ອແກ້ໄຂບັນຫາຄົນລາວທີ່ຂ້າມໄປຝັ່ງໄທ ຊື້ເຄື່ອງອຸປະໂພກ-ບໍລິໂພກ, ປິ່ນປົວສຸຂະພາບ ແລະ ໄປໃຊ້ບໍລິການສະໜາມບິນ ຍ້ອນອາກອນມູນຄ່າເພີ່ມຖືກກວ່າ; ສະເໜີໃຫ້ລັດຄົ້ນຄວ້າການຈ່າຍພັນທະອາກອນມູນຄ່າເພີ່ມແບບຂັ້ນໄດ ເພື່ອເຮັດໃຫ້ນັກລົງທຶນແຈ້ງຕົວເລກຕາມມູນຄ່າຈິງ ແລະ ຍິ່ງລົງທຶນຫຼາຍກໍຍິ່ງເສຍອາກອນໜ້ອຍລົງເທົ່ານັ້ນ
ທ່ານ ພຶດສະພາ ພູມມະສັກ ປະທານ ບໍລິສັດ ເອເຊຍລົງທຶນພັດທະນາ ແລະ ກໍ່ສ້າງ ຈໍາກັດຜູ້ດຽວ ເຊິ່ງເປັນໜຶ່ງໃນທີ່ປຶກສາສະພາການຄ້າທີ່ເຮັດທຸລະກິດຫຼາຍຂະແໜງການ ໄດ້ສະເໜີທີ່ກອງປະຊຸມວ່າ: ສໍາລັບນະໂຍບາຍການລົງທຶນກ່ຽວກັບທີ່ດິນ ຂ້າພະເຈົ້າເຫັນວ່າການກະຕຸ້ນເສດຖະກິດໃຫ້ຂະຫຍາຍຕົວນັ້ນ ເຮົາບໍ່ພຽງແຕ່ອາໄສແຕ່ຄົນລາວເທົ່ານັ້ນ ເນື່ອງຈາກວ່າປະຊາກອນເຮົາມີໜ້ອຍ, ປະສົບການດ້ານທຸລະກິດຍັງບໍ່ຫຼາຍ ແລະ ການເຂົ້າຫາແຫຼ່ງທຶນດອກເບ້ຍສູງຢູ່. ສະນັ້ນ, ຈຶ່ງຈໍາເປັນຕ້ອງໄດ້ດຶງດູດການລົງທຶນຈາກຕ່າງປະເທດຄຽງຄູ່ກັບການເສີມສ້າງຄົນລາວໃຫ້ເກັ່ງ ແລະ ພັດທະນາໄປນໍາກັນ ຈຶ່ງສະເໜີໃຫ້ ລັດຖະບານ ເຮັດທົດລອງເນື້ອທີ່ດິນ 300 ເຮັກຕາ ໃນນະຄອນຫຼວງວຽງຈັນ ໂດຍເປິດປະມູນໃຫ້ບໍລິສັດທີ່ສົນໃຈເຂົ້າມາເຮັດການພັດທະນາເສລີຄ້າຍໆກັບເມືອງເສີນເຈີ້ນ ສປ ຈີນ ວ່າ ສາມາດພັດທະນາໄດ້ແທ້ ຫຼື ບໍ່?. ເຫດຜົນທີ່ຍົກຂຶ້ນມາສະເໜີກ່ອນໜູ່ ເພາະວ່າດິນກ່ຽວພັນກັບຂົງເຂດທຸລະກິດທຸກຮູບແບບ ເປັນຕົ້ນແມ່ນ: ວຽກງານອຸດສາຫະກໍາ, ທີ່ຢູ່ອາໄສ, ໂຮງແຮມ, ການຂາຍຍົກ-ຂາຍຍ່ອຍ ແລະ ວຽກງານບໍລິການທີ່ເປັນປັດໄຈທໍາອິດໃນການເລີ່ມຕົ້ນເຮັດທຸລະກິດ.
ສ່ວນບັນຫາທີ 2: ເລື່ອງການສົ່ງເສີມສິນຄ້າ ເນື່ອງຈາກໄລຍະຜ່ານມາພວກເຮົາເສຍເງິນຕາໃຫ້ກັບປະເທດເພື່ອນບ້ານ ໂດຍສະເພາະໄທ ເພາະຄົນລາວສ່ວນໃຫຍ່ຂ້າມໄປຝັ່ງໄທ ເພື່ອຊື້ເຄື່ອງອຸປະໂພກ-ບໍລິໂພກ, ປິ່ນປົວສຸຂະພາບ ແລະ ໄປໃຊ້ບໍລິການສະໜາມບິນ ເນື່ອງຈາກອາກອນມູນຄ່າເພີ່ມຖືກກວ່າ. ສະນັ້ນ, ຂ້າພະເຈົ້າເຊື່ອໝັ້ນວ່າ ບໍລິສັດຍັກໃຫຍ່ພ້ອມທີ່ຈະເຂົ້າມາລົງທຶນໃນນະຄອນຫຼວງ ຫາກລັດຖະບານເຮົາມີນະໂຍບາຍ 3 ຢ່າງຄື: 1. ຫຼຸດຜ່ອນມູນຄ່າເພີ່ມຈາກ 10% ລົງມາເປັນ 5% ຈຶ່ງເຮັດໃຫ້ຄົນລາວບໍ່ຂ້າມໄປຊື້ເຄື່ອງຢູ່ໄທ; 2. ຫາກຄົນລາວໄດ້ຈັບຈ່າຍສິ່ງຂອງໃນລາຄາຖືກກໍຈະເປັນຜົນດີໃຫ້ກັບລັດຖະບານ; 3. ການຮັກສາສະຖຽນລະພາບເລື່ອງອັດຕາແລກປ່ຽນການຊື້-ຂາຍເປັນສະກຸນເງິນຕາຕ່າງປະເທດ.
ບັນຫາທີ 3: ດ້ານການນະໂຍບາຍຂຶ້ນລະບຽນລັດວິສາຫະກິດ ເຮົາຄວນມີການຖອດຖອນບົດຮຽນນໍາປະເທດສິງກະໂປ ແລະ ປະເທດໄທ ທີ່ເຂົາເຈົ້າປະສົບຜົນສໍໍາເລັດໃນເລື່ອງດັ່ງກ່າວມາແລ້ວ, ເວົ້າສະເພາະອອກທະບຽນໃບອະນຸຍາດກໍ່ສ້າງຄວນເນັ້ນເລື່ອງານລົງທຶນເປັນຫຼັກ ວ່າມີທຶນແທ້ບໍ່? ຄວນປະໄວ້ໃນບັນຊີລາວຈັກມື້ ແລະ ທຶນຕ້ອງຢູ່ໃນທະນາຄານຈົນກວ່າຈະດໍາເນີນການກໍ່ສ້າງສໍາເລັດ.
ບັນຫາສຸດທ້າຍ: ນະໂຍບາຍດ້ານອາກອນມູນຄ່າເພີ່ມ ສະເໜີໃຫ້ລັດຄົ້ນຄວ້າເລື່ອງການຈ່າຍພັນທະອາກອນມູນຄ່າເພີ່ມແບບຂັ້ນໄດ (ບໍ່ຄວນເຮັດແບບມາດຕະຖານດຽວກັນ) ເພື່ອເຮັດໃຫ້ນັກລົງທຶນແຈ້ງຕົວເລກຕາມມູນຄ່າຈິງ ແລະ ຍິ່ງລົງທຶນຫຼາຍກໍຍິ່ງເສຍອາກອນໜ້ອຍລົງເທົ່ານັ້ນ ຍົກຕົວຢ່າງ: ການລົງທຶນມູນຄ່າຕໍ່າກວ່າ 3 ແສນໂດລາ ແມ່ນເສຍອາກອນ 7%, ລົງທຶນ 1 ລ້ານໂດລາ 6%, ຫຼາຍກວ່າ 3 ລ້ານໂດລາ 5%, ຫຼາຍກວ່າ 6 ລ້ານໂດລາ 4,5% ແລະ ລົງທຶນຫຼາຍກວ່າ 10 ລ້ານໂດລາ ເສຍອາກອນມູນຄ່າເພີ່ມ 4%.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: laoedaily.com.la
ຮູບພາບຈາກ: vietnam.vnanet.vn