spot_img
Homeຂ່າວທ້ອງຖິ່ນຄົນຕ່າງປະເທດ ສາມາດຖືຄອງກໍາມະສິດອະສັງຫາລິມະຊັບ ໄດ້ພຽງແຕ່ເຂດເສດຖະກິດພິເສດເທົ່ານັ້ນ

ຄົນຕ່າງປະເທດ ສາມາດຖືຄອງກໍາມະສິດອະສັງຫາລິມະຊັບ ໄດ້ພຽງແຕ່ເຂດເສດຖະກິດພິເສດເທົ່ານັ້ນ

Published on

ລັດຖະບານ ໄດ້ອະນຸມັດນະໂຍບາຍໃຫ້ຄົນຕ່າງປະເທດສາມາດ ເປັນເຈົ້າຂອງກໍາມະສິດອະສັງຫາລິມະຊັບ (ສິ່ງປຸກສ້າງທີ່ຢູ່ອາໄສພາຍໃນເຂດ) ໄດ້ແຕ່ພຽງເຂດເສດຖະກິດພິເສດເທົ່ານັ້ນ. ປັດຈຸບັນ, ກົດໝາຍທີ່ດິນຂອງ ສປປ ລາວ ມີແຕ່ອະນຸຍາດໃຫ້ຄົນທີ່ຖືສັນຊາດລາວໄດ້ມີກໍາມະສິດທີ່ດິນເທົ່ານັ້ນ.

ທ່ານ ນາງ ລັດຕະນາ ອິນທະພົນ ຮອງຫົວໜ້າກົມ/ຮອງຫົວໜ້າຫ້ອງການບໍລິຫານການລົງທຶນ ໄດ້ຕອບຄໍາຖາມຂອງນັກຂ່າວທີ່ຖາມວ່າ “ຄົນຕ່າງປະເທດສາມາດຊື້ດິນ ເຮືອນໄດ້ບໍ່?” ທີ່ງານຖະແຫຼງຂ່າວງານມະຫາກໍາອະສັງຫາລິມາຊັບ 2019 ໃນວັນທີ 15 ມັງກອນ 2019 ວ່າ: “ຖືເປັນບັນຫາທີ່ໄດ້ຮັບຄວາມສົນໃຈຫຼາຍໃນສັງຄົມ. ປັດຈຸບັນນີ້, ໃນການໃຫ້ກໍາມະສິດທີ່ດິນ ແລະ ເຮືອນສໍາລັບຄົນຕ່າງປະເທດ ໂດຍທົ່ວໄປຍັງບໍ່ມີການກໍານົດ, ແຕ່ພວກເຮົາຈະມີກໍານົດຢູ່ໃນເຂດເສດຖະກິດພິເສດ (ຂສພ) ບຶງທາດຫຼວງ ທີ່ເພິ່ນພັດທະນາເປັນອະສັງຫາລິມະຊັບ ເຊິ່ງໄດ້ມີດໍາລັດຂອງ ລັດຖະບານ ອອກມາວ່າ ສໍາລັບອາພາດເມັ້ນຖ້າຊື້ແລ້ວຈະເປັນກໍາມະສິດຂອງຜູ້ຊື້ໂດຍກົງເລີຍ ພາຍໃຕ້ອາຍຸຂອງການສໍາປະທານທີ່ດິນທີ່ຍັງເຫຼືອໃນຕອນຊື້ນັ້ນ, ສ່ວນກໍາມະສິດທີ່ດິນ ລັດຖະບານ ຍັງບໍ່ມີນະໂຍບາຍທີ່ຈະອະນຸຍາດໃຫ້ຄົນຕ່າງປະເທດ (ບໍ່ແມ່ນສັນຊາດລາວ) ມີກໍາມະສິດ. ປັດຈຸບັນ, ກົດໝາຍທີ່ດິນມີແຕ່ອະນາຍາດໃຫ້ຄົນທີ່ຖືສັນຊາດລາວໄດ້ມີກໍາມະສິດທີ່ດິນ”.

ໂດຍອີງຕາມ ດໍາລັດຂອງລັດຖະບານແຫ່ງ ສປປ ລາວ ສະບັບເລກທີ 188/ລບ, ລົງວັນທີ 7 ມິຖຸນາ 2018; ວ່າດ້ວຍເຂດເສດຖະກິດພິເສດ, ໝວດທີ 7 ນະໂຍບາຍສົ່ງເສີມຜູ້ລົງທຶນ, ມາດຕາທີ 44 ນະໂຍບາຍສົ່ງເສີມດ້ານການນໍາໃຊ້ທີ່ດິນ ແລະ ອະສັງຫາລິມະຊັບຄື: ຜູ້ລົງທຶນມີສິດນໍາໃຊ້ທີ່ດິນທີ່ຕົນເຊົ່າ ໂດຍສາມາດເອົາສິດດັ່ງກ່າວໃຫ້ເຊົ່າຕໍ່ ຫຼື ມອບ-ໂອນ ໃຫ້ຜູ້ລົງທຶນອື່ນຕາມອາຍຸສັນຍາເຊົ່າ ແຕ່ສູງສຸດບໍ່ໃຫ້ເກີນອາຍຸສັນຍາພັດທະນາທີ່ຍັງເຫຼືອ ໂດຍມີການຢັ້ງຢືນຂອງຄະນະຄຸ້ມຄອງເຂດ. ຜູ້ທີ່ໄດ້ກໍາມະສິດໃນອະສັງຫາລິມະຊັບເຂດເສດຖະກິດພິເສດ ສາມາດເປັນເຈົ້າຂອງກໍາມະສິດໄປຕະຫຼອດຈົນໝົດອາຍຸຂອງການໃຊ້ອະສັງຫາລິມະຊັບນັ້ນ ສາມາດຂາຍ, ມອບ-ໂອນ ຫຼື ສືບທອດຕໍ່ໄດ້, ສ່ວນທີ່ດິນບ່ອນທີ່ອະສັງຫາລິມະຊັບນັ້ນ ພາຍຫຼັງໝົດອາຍຸສັນຍາພັດທະນາແລ້ວ ຈະກັບມາເປັນຊັບສິນຂອງລັດ.

ສໍາລັບຄົນຕ່າງປະເທດ ທີ່ໄດ້ກໍາມະສິດອະສັງຫາລິມະຊັບ ໂດຍໄດ້ມີການຊໍາລະຕົວຈິງ 100.000 ໂດລາສະຫະລັດຂຶ້ນໄປ ພັນລະຍາ ຫຼື ສາມີ ແລະ ລູກ ຈະໄດ້ຮັບນະໂຍບາຍວີຊ່າເຂົ້າ-ອອກຫຼາຍເທື່ອ ຄັ້ງທໍາອິດເປັນເວລາ 1 ປີ ແລະ ສາມາດຕໍ່ໄດ້ ແລະ ຍັງຈະໄດ້ຮັບການອໍານວຍຄວາມສະດວກອື່ນໆ ຕາມການຕົກລົງຂອງລັດຖະບານໃນແຕ່ລະໄລຍະ. ນອກນັ້ນ, ຄົນຕ່າງປະເທດ ທີ່ມີສັນຍາເຊົ່າອະສັງຫາລິມະຊັບ ຈາກເຈົ້າຂອງກໍາມະສິດ ແລະ ມີກໍານົດເວລາຢູ່ ສປປ ລາວ 3 ເດືອນຂຶ້ນໄປຈະໄດ້ຮັບນະໂຍບາຍວີຊ່າເຂົ້າ-ອອກຫຼາຍເທື່ອ.

 

 

 

ຮຽບຮຽງໂດຍ: ໃບບົວ ຈັນທະລັງສີ

ຮູບພາບຈາກ: laoedaily.com.la

ບົດຄວາມຫຼ້າສຸດ

ຕື່ມແບບຟອມ Thailand Digital Arrival Card (TDAC) ກ່ອນເຂົ້າໄທ

ນັກທ່ອງທ່ຽວ ຫຼື ຄົນຕ່າງປະເທດຕ້ອງຕື່ມຟອມທາງອອນລາຍກ່ອນເຂົ້າປະເທດໄທ ເລີ່ມແຕ່ວັນທີ 1 ພຶດສະພາ 2025 ເປັນຕົ້ນໄປ, ຜູ້ທີ່ບໍ່ແມ່ນພົນລະເມືອງໄທທຸກຄົນ(ນັກທ່ອງທ່ຽວ, ຄົນຕ່າງປະເທດ) ທີ່ເດີນທາງໄປປະເທດໄທດ້ວຍທາງອາກາດ, ທາງບົກ ຫຼື ທາງທະເລ ຈະຕ້ອງໄດ້ຕື່ມແບບຟອມ...

ປະຫວັດຫຍໍ້ຂອງ ສະຫາຍ ພົນເອກ ຄຳໄຕ ສີພັນດອນ

ສະຫາຍ ພົນເອກ ຄຳໄຕ ສີພັນດອນ ເກີດເມື່ອວັນທີ 8 ກຸມພາ 1924 ທີ່ບ້ານຫົວໂຂງພະໃຫຍ່, ເມືອງໂຂງ, ແຂວງສີທັນດອນ (ແຂວງຈຳປາສັກ ໃນປັດຈຸບັນ), ເປັນບຸດ...

ອາຊີບຕ້ອງຫ້າມ! ຕຳຫຼວດໄທວາງແຜນຈັບໜຸ່ມລາວ ຂັບລົດຈັກຮັບຈ້າງ ຍາດອາຊີບຄົນໄທ

ເຈົ້າໜ້າທີ່ຕຳຫຼວດໄທ ວາງແຜນຈັບໜຸ່ມລາວ ຍາດອາຊີບຄົນໄທ ຂັບລົດຈັກຮັບຈ້າງ ບໍລິເວນເຂດຫ້ວຍຂວາງ ກຸງເທບມະຫານະຄອນ ປະເທດໄທ. ສຳນັກຂ່າວໄທລາຍງານໃນວັນທີ 1 ເມສາ 2025 ຜ່ານມາ, ເຈົ້າໜ້າທີ່ຕຳຫຼວດໄທໄດ້ຮັບແຈ້ງຈາກສາຍຂ່າວ ກ່ຽວກັບເບາະແສວ່າ: ມີຊາຍຄ້າຍຄືກັບແຮງງານຕ່າງດ້າວ...

ທຳລາຍໃຫ້ໝົດ! ພະແນກ ອຄ ແຂວງຄຳມ່ວນ ທຳລາຍສິນຄ້າລະເມີດກົົດໝາຍ ມູນຄ່າ ເກືອບ 300 ລ້ານ ກວ່າກີບ

ພະແນກອຸດສາຫະກຳ ແລະ ການຄ້າແຂວງຄຳມ່ວນ ທຳລາຍສິນຄ້າທີ່ລະເມີດກົດໝາຍ, ລະບຽບການດ້ານການຄ້າ ແລະ ສິນຄ້ານອກລະບົບທີ່ອາຍັດມາໄດ້ໃນໄລຍະປີ 2024-2025 ຜ່ານມາ. ໃນຕອນບ່າຍວັນທີ 1 ເມສາ 2025 ຢູ່ທີ່ພະແນກອຸດສາຫະກໍາ ແລະ...