ເລື່ອງຂອງຊື່ບໍ່ວ່າຈະເປັນຊື່ຕົວເອງ ຊື່ບ້ານ ຊື່ເມືອງ ຊື່ແຂວງ ຫຼື ຊື່ຫຍັງກໍ່ຕາມ ຫາກຊື່ນັ້ນບໍ່ເປັນມົງຄຸນ ກໍ່ບໍ່ມີໃຜປາຖະໜາຢາກໃຊ້ຊື່ນັ້ນ ຄືກັນກັບຄົນໃນຫຼາຍໝູ່ບ້ານແຫ່ງລັດຣາຍານາ (Haryana) ແລະ ຣາຈັດສະຖານ (Rajasthan) ປະເທດອິນເດຍ ທີ່ຕ້ອງການປ່ຽນຊື່ ເພາະຟັງແລ້ວໃຫ້ຄວາມຮູ້ສຶກໄປໃນທາງທີ່ບໍ່ດີ ແລະ ເຮັດໃຫ້ລູກບ້ານຮູ້ສຶກອັບອາຍເມື່ອຖືກຖາມວ່າຢູ່ບ້ານໃດ.
ເມື່ອຄວາມຮູ້ສຶກໃນເລື່ອງນີ້ໄດ້ສະສົມເພີ່ມພູນຂຶ້ນ ຈິ່ງນຳມາສູ່ການຮຽກຮ້ອງໃຫ້ມີການປ່ຽນຊື່ບ້ານ ຢ່າງບ້ານ ກັນດາ (Ganda) ໃນລັດຣາຍານາ ເຊິ່ງພາສາຮິນດູມີຄວາມໝາຍວ່າ “ສົກກະປົກ ຫຼື ໜ້າລັງກຽດ” ມີເດັກຍິງຄົນໜຶ່ງໃນໝູ່ບ້ານໄດ້ຂຽນຈົດໝາຍຮ້ອງທຸກສົ່ງໄປເຖິງທ່ານ ນະເຣທຣາ ໂມດີ ນາຍົກລັດຖະມົນຕີອິນເດຍ ເມື່ອປີ 2016 ເພື່ອຂໍໃຫ້ມີການປ່ຽນຊື່ບ້ານໃໝ່ ເພາະເລື່ອງນີ້ເຮັດໃຫ້ນາງຖືກເຢາະເຢີ້ຍຈາກຄົນທີ່ນາງໄດ້ພົບ ແມ່ນແຕ່ຍາດຕິພີ່ນ້ອງຂອງນາງທີ່ອາໄສຢູ່ບ້ານອື່ນ.
ຈົນມາວັນໜຶ່ງຄຳຮ້ອງຂອງນາງຖືກພິຈາລະນາໂດຍທ່ານນາຍົກລັດຖະມົນຕີໄດ້ມີຄຳສັ່ງໃຫ້ເຈົ້າໜ້າທີ່ປ່ຽນຊື່ບ້ານ ກັນດາ ເປັນບ້ານ ອາຈີນ ນາກາຣ໌ ແທນ.
ຍ້ອມຄວາມຫຼັງຂອງຊື່ບ້ານ ກັນດາ ຄົນໃນພື້ນທີ່ໄດ້ເລົ່າວ່າ ຊື່ນີ້ໄດ້ມາຕັ້ງແຕ່ເກີດເຫດນໍ້າຖ້ວມໃຫຍ່ ເມື່ອຫຼາຍທົດສະວັດກ່ອນ ເມື່ອເຈົ້າໜ້າທີ່ທາງການລົງມາກວດສອບຄວາມເສຍຫາຍຈາກອຸທົກກະໄພຄັ້ງໃຫຍ່ ກໍ່ໄດ້ເຫັນຊາກຄວາມເສຍຫາຍເຕັມໄປທົ່ວພື້ນທີ່ ແລະ ສົກກະປົກຫຼາຍ ກໍ່ເລີຍເວົ້າເຖິງບ້ານນີ້ວ່າ ກັນດາ ຈົນເປັນຄຳຕິດປາກຕາມໆກັນໄປ.
ນາຍບ້ານ ກັນດາ ຍັງເລົ່າເຖິງບັນຫາຂອງຊື່ບ້ານນີ້ວ່າ ຊື່ບ້ານຍັງເປັນສາເຫດເຮັດໃຫ້ຜູ້ຊາຍໜີຫາຍກັນໄປໝົດ ເພາະບໍ່ຕ້ອງການແມ່ຍິງໃນບ້ານນີ້ເປັນເຈົ້າສາວເຫດຜົນເພາະຊື່ຂອງບ້ານນີ້ແປວ່າສົກກະປົກ ກໍລະນີບັນຫາຊື່ຂອງບ້ານກັນດາຖືເປັນກໍລະນີສະເພາະ ຈິ່ງໄດ້ຮັບຄວາມເຫັນດີໃຫ້ປ່ຽນຊື່.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: matichon