ໂຄງການກໍ່ສ້າງເຈື່ອນກັນຕາຝັ່ງນໍ້າ ທີ່ມີຊາຍແດນຕິດຈອດລະຫວ່າງປະເທດ ໃນປີ 2019-2020 ມີຄວາມຕ້ອງການສ້າງຕື່ມອີກຫຼາຍກວ່າ 128,93 ກິໂລແມັດ ດ້ວຍງົບເຖິງ 2 ພັນຕື້ກີບ ເຊິ່ງເປັນອີກໂຄງການສໍາຄັນທີ່ພາກລັດ ຕ້ອງເດີນໜ້າສືບຕໍ່ກໍ່ສ້າງເປັນແຕ່ລະໄລຍະ. ດ້ານ ກະຊວງ ຍທຂ ເຊື່ອວ່າຫາກໂຄງການດັ່ງກ່າວສໍາເລັດ ຈະສາມາດປ້ອງກັນນໍ້າຖ້ວມໄດ້ດີໃນລະດັບນໍ້າສູງກວ່າ 12 ແມັດ ຄືລະດັບນໍ້າຂອງຂຶ້ນສຸດໃນປີ 2018 ຜ່ານມາ.
ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ລາຍງານໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ວ່າ: “ວຽກງານກໍ່ສ້າງເຈື່ອນຕາມແມ່ນໍ້າຊາຍແດນ ປະກອບມີ: ແມ່ນໍ້າຂອງ ແລະ ນໍ້າເຫືອງ ເມືອງ ແກ່ນທ້າວ ແຂວງໄຊຍະບູລີ ຕາມການເກັບກໍາຂໍ້ມູນຂອງ ຍທຂ ຮ່ວມກັບຄະນະກໍາມະການຊາຍແດນແຫ່ງຊາດ ເຊິ່ງມີແມ່ນໍ້າຊາຍແດນລະຫວ່າງປະເທດທັງໝົດ 1.100 ກິໂລແມັດ ໃນນັ້ນ, ແມ່ນໍ້າຂອງຍາວ 953 ກິໂລແມັດ ແລະ ນໍ້າເຫືອງຍາວ 147 ກິໂລແມັດ. ຕາມການສໍາຫຼວດຂອງ ທຍຂ ໃນແຜນການກໍ່ສ້າງຕ້ານເຈື່ອນໃນຕໍ່ໜ້າ ມີຄວາມຕ້ອງການກໍ່ສ້າງຕາຝັ່ງກັນເຈື່ອນແມ່ນໍ້າຂອງ ແລະ ແມ່ນໍ້າເຫືອງທັງໝົດ 128,93 ກິໂລແມັດ ຄິດເປັນມູນຄ່າ 2 ພັນຕື້ກວ່າກີບ ໃນນີ້, ຈັດເປັນບູລິມະສິດເພື່ອແກ້ໄຂດ່ວນ 2019-2020 3 ບູລິມະສິດ, ສ່ວນທີ່ເຫຼືອຈະເອົາເຂົ້າແຜນປີ 2021-2025 ຫາກໂຄງການດັ່ງກ່າວສໍາເລັດ ຈະສາມາດປ້ອງກັນນໍ້າຖ້ວມໄດ້ດີໃນລະດັບນໍ້າຂອງສູງກວ່າ 12 ແມັດ ຄືລະດັບນໍ້າຂອງຂຶ້ນສູງສຸດໃນປີ 2018 ຜ່ານມາ”.
ໂຄງການດັ່ງກ່າວ, ໄດ້ຈັດຕັ້ງປະຕິບັດໃນປີ 2016-2017 ຈໍານວນ 12 ໂຄງການດ້ວຍມູນຄ່າ 242,49 ຕື້ກີບ ໃນນີ້, ໂຄງການສໍາຫຼວດ ແລະ ອອກແບບມີ 4 ໂຄງການ, ໂຄງການກໍ່ສ້າງ 8 ໂຄງການ ສໍາເລັດແລ້ວ 100%; ປີ 2018 ສະພາແຫ່ງຊາດໄດ້ອະນຸມັດງົບປະມານທັງໝົດຈໍານວນ 8 ໂຄງການລວມມູນຄ່າ 182,59 ຕື້ກີບ ແຕ່ໄດ້ຮັບການຊໍາລະຕົວຈິງ 1,06 ຕື້ກີບ ໃນນີ້, ມີ 5 ໂຄງການທີ່ຈັດຕັ້ງປະຕິບັດສໍາເລັດແລ້ວ 100% ແລະ ອີກ 3 ໂຄງການຈະສືບຕໍ່ໃຫ້ສໍາເລັດໃນປີ 2019 ນີ້.
ນອກຈາກນັ້ນ, ໂຄງການທີ່ ລັດຖະບານ ໄດ້ລົງທຶນໃສ່ດ້ວຍງົບປະມານພາຍໃນ ຍັງໄດ້ຮັບການສະໜັບສະໜູນງົບປະມານຈາກປະເທດເພື່ອນມິດ ແລະ ອົງການສາກົນຕື່ມອີກ ເຊັ່ນ: ໂຄງການກໍ່ສ້າງຄູປ້ອງກັນຕາຝັ່ງເຈື່ອນ ແລະ ພັດທະນາແຄມຂອງ ນະຄອນຫຼວງວຽງຈັນ ຍາວ 12,3 ກິໂລແມັດ, ໂຄງການກໍ່ສ້າງຕ້ານເຈື່ອນແຕ່ດອນຊາວ-ບ້ານ ຄວ້ານ, ໂຄງການກໍ່ສ້າງຄູປ້ອງກັນນໍ້າຖ້ວມ ແລະ ປ້ອງກັນນໍ້າຢູ່ນະຄອນປາກເຊ ແລະ ເມືອງ ໂພນທອງ ແຂວງ ຈໍາປາສັກ, ໂຄງການຢູ່ນະຄອນໄກສອນ ພົມວິຫານ ແຂວງ ສະຫວັນນະເຂດ ແລະ ໂຄງການຢູ່ ແຂວງຄໍາມ່ວນ, ບໍລິຄໍາໄຊ ແລະ ບໍ່ແກ້ວ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ,ຮູບພາບຈາກ: laoedaily.com.la