spot_img
Homeນານາສາລະບັນຫາ​ພະນັກງານ​ເກົ່າແກ່ ​​ກັບ​ພະນັກງານ​ໃໝ່​ໄຟແຮງ

ບັນຫາ​ພະນັກງານ​ເກົ່າແກ່ ​​ກັບ​ພະນັກງານ​ໃໝ່​ໄຟແຮງ

Published on


ປັດຈຸບັນຢູ່ຕາມ​ອົງ​ກອນ​ຕ່າງໆກໍຄື​ບັນດາ​ສຳນັກງານ, ອົງການທັງ​ພາກ​ລັດ ​ແລະ ​ເອກະ​ຊົນລ້ວນ​ແຕ່​ປະກອບ​ດ້ວຍບຸກຄະລາ​ກອນ (​ພະນັກງານ) ທ່ີ​ປະຕິບັດ​ໜ້າ​ທ່ີ​ວຽກ​ງານ ​ເຊິ່ງມີ​ຫຼາຍ​ໄວ​ຮຸ່ນ​ໜຸ່ມ​ນ້ອຍ, ຮຸ່ນ​ກາງ ​ແລະຮຸ່ນ​ເຖົ້າ​ແກ່, ມີ​ທັງ​ຜູ້​ເກົ່າ ​ແລະຜູ້​ໃໝ່​ປະ​ປົນ​ກັນ​ໄປ. ດັ່ງ​ນັ້ນ, ທຸກໆ​ອົງ​ກອນ​ຕ້ອງ​ປະສານ​ສົມທົບ​ຢ່າງ​ຄ່ອງ​ແຄ້ວ​ລະຫວ່າງ​ພະນັກງານທັງ​ສາມ​ຮຸ່ນ​ ທັງ​ເກົ່າ ​ແລະ ​ໃໝ່ ​ເຊິ່ງ​ເຂົາ​ເຈົ້າລ້ວນ​ແຕ່​ເປັນ​ທຶນຮອນ​ອັນ​ປະ​ເສີດ​ຂອງ​ອົງ​ກອນ, ພະນັກງານ​ທຸກໆ​ຮຸ່ນ​ມີ​ທັງ​ດ້ານ​ດີ ​ແລະດ້ານ​ອ່ອນສະ​ເພາະ​ຂອງ​ໃຜລາວ ​ເຊິ່ງຕິດ​ພັນ​ກັບ​ຈຸດ​ພິ​ເສດ​ຂອງຮຸ່ນ​ຄົນ​ທ່ີຕົນ​ເປັນ​ຕົວ​ແທນ​ໃຫ້​ເຂົາ​ເຈົ້າ. ການ​ປະສານ​ສົມທົບ​ລະຫວ່າງ​ພະນັກງານ​ທ່ີ​ກ່າວ​ມາ​ນັ້ນຈະ​ເປັນ​ການ​ຊ່ວຍ​ໃຫ້​ເຂົາ​ເຈົ້າ​ເສີມ​ຂະຫຍາຍ​ຈຸດ​ດີ ​ແລະກຳຈັດ​ຈຸດ​ອ່ອນ ​ເຊິ່ງນັ້ນ​ແມ່ນ​ທັດສະນະ ​ແລະສິລະ​ປະ​ໃນ​ການ​ນຳ​ໃຊ້​ພະນັກງານ.

ຕາມກົດ​ເກນ​ທຳ​ມະ​ຊາດ ເມື່ອ​ເຖົ້າ​ແກ່​ແລ້ວກໍຕ້ອງ​ອ່ອນ​ເພຍອ່ອນ​ເພຍ​ແລ້ວ​ກໍ່ຕ້ອງຕາ​ຍ,ຖ້າ​ບໍ່​ມີ​ພະນັກງານ​ໃໝ່​ປ່ຽນ​ແທນ​ແລ້ວ​ແມ່ນ​ໃຜ​ຈະ​ເປັນ​ຜູ້ແບກ​ຫາບ​ວຽກ​ງານ​ຂອງ​ອົງ​ກອນ. ດັ່ງ​ນັ້ນ, ພະນັກງານ​ເຖົ້າ​ແກ່​ຈຶ່ງແມ່ນ​ທຶນຮອນ​ອັນ​ປະ​ເສີດ​ຂອງ​ອົງ​ກອນ, ​ເຂົາ​ເຈົ້າ​ມີ​ບົດຮຽນ​ທາງ​ດ້ານ​ການ​ນຳພາ, ​ໄດ້​ຮັບ​ການ​ຫຼໍ່​ຫຼອມ ​ແລະທົດ​ສອບ​ຫຼາຍ​ໃນ​ພຶດຕິ​ກຳຕົວ​ຈິງ​ແຫ່ງ​ຂະ​ບວນການ​ເຄື່ອນ​ໄຫວ​ຈັດ​ຕັ້ງ​ປະຕິບັດ​ວຽກ​ງານ​ຕົວ​ຈິງ​ມາ​ເປັນ​ເວລາ​ດົນ​ນານ​ແລ້ວ.ບັນດາ​ພະນັກງານ​ເກົ່າ​ທ່ີ​ເຖົ້າ​ແກ່​ແມ່ນ​ປະ​ເສີດ​ທ່ີ​ສຸດ, ​ເປັນ​ແບບຢ່າງ​ໃນ​ການ​​ເຄື່ອນ​ໄຫວ​ວຽກ​ງານ​ຢ່າງ​ທົນ​ທານ​ໜຽວ​ແໜ້ນ, ຊັກ​ຈູງ, ຖະນຸບຳລຸງ ​ແລະກໍ່ສ້າງ​ບັນດາ​ພະນັກງານ​ໃໝ່​ທ່ີ​ໜຸ່ມ​ນ້ອຍ​ຕື່ມ​ອີກ.ສ່ວນ​ພະນັກງານ​ໃໝ່​ທ່ີ​ໜຸ່ມ​ນ້ອຍ ​ເຖິງ​ວ່າ​ຍັງ​ບໍ່​ທັນ​ມີ​ດ້ານ​ດີ​ຫຼາຍ​ຄື​ກັນ​ກັບ​ພະນັກງານ​ເກົ່າ​ທ່ີ​ເຖົ້າ​ແກ່​ກໍ່ຕາມ, ​ແຕ່​ເຂົາ​ເຈົ້າ​ເປັນ​ຜູ້ຂະຫຍັນ​ຫ້າວຫັນ, ຮັບ​ເອົາ​ອັນ​ໃໝ່​ໄດ້​ໄວ, ມີ​ຄວາມ​ພາກພຽນ​ໃນ​ການ​ສຶກສາ​ຮ່ຳຮຽນ, ດັ່ງ​ນັ້ນ​ເຂົາ​ເຈົ້າຈຶ່ງ​ມີ​ຄວາມ​ກ້າວໜ້າ​ໄວ. ອົງ​ກອນ​ຕ່າງໆ​ລ້ວນ​ແຕ່​ຮັກ​ແພງ​ ​ແລະນັບຖືທ່ີ​ສຸດຕໍ່​ພະນັກງານ​​ເກົ່າເຖົ້າ​ແກ່, ​ແຕ່​​ກໍ​ຕ້ອງການ​ທ່ີ​ສຸດ​ສຳລັບ​ພະນັກງານ​​ໃໝ່​ທ່ີໜຸ່ມ​ນ້ອຍ ​ເພື່ອ​ສືບ​ທອດ​ປ່ຽນ​ແທນເຮັດ​ວຽກ​ງານ​ຕ່າງໆທ່ີພະນັກງານ​ເກົ່າ​ເຖົ້າ​ແກ່​ບໍ່​ສາມາດເຮັດ​ໄດ້.

ການ​ຂະຫຍາຍຕົວ​ຂອງ​ສັງຄົມ​ໃນ​ໄລຍະ​ໃໝ່ ​ເຊິ່ງ​ເປັນ​ໄລຍະ​ວິທະຍາສາດ-​ເຕັກນິກຕ້ອງ​ຮີບ​ຮ້ອນ​ກໍ່ສ້າງ ​ແລະທະນຸ​ບຳລຸງ​ພະນັກງານ​ຮຸ່ນ​ໃໝ່​ທ່ີໜຸ່ມ​ນ້ອຍ ​ເພື່ອ​ປ່ຽນ​ແທນ​ຮຸ່ນ​ເກົ່າທ່ີ​ເຖົ້າ​ແກ່​ໃຫ້​ທັນ​ເວລາ ​ເຊິ່ງພວກ​ເພິ່ນ​ໄດ້​ເຮັດ​ຫຼ້ອນ​ໜ້າ​ທ່ີ​ແລ້ວ. ພາລະກິດ​ປະ​ຕິ​ວັດ​ໃນ​ໄລຍະ​ໃໝ່​ຍິ່ງ​ໜັກໜ່ວງ​ເທົ່າ​ໃດກໍ​ຍິ່ງນັບ​ມື້​ຮຽກຮ້ອງ​ຕ້ອງການ​ຫົວຄິດ​ປະດິດ​ສ້າງ​ຂອງພະນັກງານໃໝ່ໆ​ຕ້ອງ​ມີ​ການ​ຍົກ​ລະດັບ​ຂຶ້ນ​ເລື້ອຍໆ. ​ໃນຂອບ​ເຂດ​ທົ່ວ​ໂລກ, ​ກະ​ແສ​ຟອງວິທະຍາສາດ ​ແລະ ​ເຕັກນິກພວມ​ເຊື່ອມ​ຊຶມ​ຢ່າງ​ແຂງ​ແຮງ​ເຂົ້າ​ໃນ​ທຸກຂົງ​ເຂດ​ຂອງ​ຊີ​ວິດ, ກໍ່​ໃຫ້​ເກີດ​ມີ​ການ​ປ່ຽນ​ແປງ​ທ່ີ​ມີ​ລັກສະນະ​ແຮງ​ງານ​ຢູ່​ໃນ​ຫຼາຍ​ຂະ​ແໜງ​ການ, ຫຼາຍ​ວິຊາ​ຊີບ​ຂອງ​ກຳມະກອນ​ທ່ີ​ທຳ​ການ​ຜະລິດ, ຂອງ​ພະນັກງານ​ວິທະຍາສາດ, ຂອງ​ຜູ້​ຄຸ້ມ​ຄອງ​ເສດຖະກິດ​-ສັງຄົມ ​ແລະອື່ນໆ. ດັ່ງ​ນັ້ນ​, ການ​ກໍ່ສ້າງ ​ແລະທະນຸ​ບຳລຸງ​ພະນັກງານ​ສືບ​ແທນ, ຊ່ວຍ​ໃຫ້​ພະນັກງານ​ຮຸ່ນ​ໜຸ່ມ​ນ້ອຍ​ເຕີບ​ໃຫຍ່​ຂະຫຍາຍຕົວ​ຢ່າງ​ວ່ອງ​ໄວ ​ແລະຮອບດ້ານ, ສົມ​ກັບ​ວ່າ​ເປັນ​ຜູ້ສືບ​ທອດ​ພາລະກິດ​ຂອງ​ອົງ​ກອນ. ​ແຕ່​ປັດຈຸບັນ, ​ໃນ​ພຶດຕິ​ກຳ​ຕົວ​ຈິງ​ຂອງ​ວຽກ​ງານນັບ​ທັງ​ໃນ​ຖັນ​ແຖວ​ຂອງ​ພະນັກງານ​ຫຼັກ​ແຫຼ່ງຢູ່​ຫຼາຍ​ບ່ອນ, ລັກສະນະ​ສືບ​ທອດ​ກັນ​ລະຫວ່າງ​ຮຸ່ນ​ນັ້ນຍັງ​ບໍ່​ທັນ​ປະກົດ​ເປັນ​ຮູບ​ເປັນ​ຮ່າງ​ຈະ​ແຈ້ງ​ເທື່ອ ​ເພື່ອ​ຮັບປະກັນ​ຢ່າງ​ໜັກ​ແໜ້ນ​ໃນ​ການ​ສືບ​ທອດ​ດັ່ງກ່າວ. ​ໂຄງ​ປະກອບ​ຖັນ​ແຖວ​ພະນັກງານ​ຫຼັກ​ແຫຼ່ງຢູ່​ຫຼາຍ​ບ່ອນ​ທ່ີ​ຂາດ​ການ​ສົມສ່ວນ, ດັ່ງ​ນັ້ນມັນ​ຈຶ່ງ​ສະ​ແດງ​ໃຫ້​ເຫັນ​ເຖິງ​ຄວາມ​ຊັກ​ຊ້າ, ຮັກ​ສາ​ເດີມ​ໃນ​ການຈັດ​ຕັ້ງ​ປະຕິບັດທິດທາງ​ຂອງອົງກອນ​ຕໍ່​ພະນັກງານ. ມີ​ຫຼາຍ​ສາ​ເຫດ​ທ່ີ​ເປັນ​ອຸປະສັກ​ຂັດຂວາງ​ໃນ​ການ​ປະຕິບັດ​ວຽກ​ງານ​ດັ່ງກ່າວ​ຄື​ມາ​ຈາກ​ແນວ​ຄິດ​ຄັບ​ແຄບ, ​ແນວ​ຄິດ​ມັກງ່າຍ ​ແລະອື່ນໆ, ​ແຕ່​ສິ່ງ​ຕົ້ນຕໍ​ແມ່ນ​ຂຶ້ນ​ກັບ​ທັດສະນະ​ໃນ​ການ​ເບິ່ງບັນຫາ​,ການ​ຕີ​ລາຄາ​ພະນັກງານ​ໜຸ່ມ​ນ້ອຍ​ຂອງ​ຄະນະ​ນໍາໃນອົງກອນແຕ່ລະ​ບ່ອນ​ຈຳນວນ​ໜຶ່ງ​ບໍ່​ຖືກຕ້ອງ. ດັ່ງ​ທ່ີປະທານ ​ໂຮ່ຈິ​ມິນ​ເຄີຍ​ກ່າວ​ໄວ້​ວ່າ: “ຮຸ່ນ​ເຖົ້າ​ແກ່​ຍອມ​ເສຍສະຫຼະ​ໃຫ້​ຮຸ່ນ​ໜຸ່ມ​ນ້ອຍ​ຈຶ່ງ​ຄ່ອຍ​ດີ,ລູກ​ລື່ນ​ພໍ່ຄອບຄົວ​ຈຶ່ງ​ມີ​ຄວາມສຸກ” (ຄັດຈາກປຶ້ມໂຮ່ຈິມິນ: ວ່າດ້ວຍບັນຫາພະນັກງານ, ປຶ້ມໄດ້ແນະນຳແລ້ວ, ໜ້າ 120). ດັ່ງນັ້ນ,ຕ້ອງ​ເອົາ​ໃຈ​ໃສ່ກໍ່ສ້າງ​ພະນັກງານ​ໃໝ່​ທ່ີ​ໜຸ່ມນ້ອຍ ​ເພື່ອ​ໃຫ້​ເຂົາ​ເຈົ້າ​ມີ​ຄວາມ​ສາມາດ​ເຮັດ​ວຽກ​ລື່ນ​ຕົນ, ບໍ່​ອິດສາ… ຕ້ອງຜ່າ​ມ້າງ​ຈິນຕະນາການ​ເກົ່າ​ນັ້ນ, ກ່ຽວ​ກັບ​ພາລະ​ບົດບາດ ​ແລະທ່ີ​ຕັ້ງ​ຂອງ​ໄວໜຸ່ມ​ຕໍ່​ກັບ​ການ​ກໍ່ສ້າງ, ທະນຸ​ບຳລຸງ, ກ້າ​ເລື່ອນ​ຊັ້ນ​ໃຫ້​ພະນັກງານ​ໜຸ່ມ​ນ້ອຍ, ກ່ຽວ​ກັບ​ການ​ປະສົມ​ປະສານ​ຢ່າງ​ຄ່ອງ​ແຄ້ວ​ລະຫວ່າງ​ພະນັກງານ​ເຖົ້າ​ແກ່​ກັບ​ພະນັກງານ​ໜຸ່ມ​ນ້ອຍ, ລະຫວ່າງ​ພະນັກງານ​ເກົ່າ​ກັບ​ພະນັກງານ​ໃໝ່​ໄດ້​ເປັນ​ການ​ປະ​ກອບ​ສ່ວນຢ່າງ​ມີ​ປະສິດທິ​ຜົນ​ເຂົ້າ​ໃນ​ວຽກ​ງານ​ພະນັກງານ​ຂອງ​ອົງ​ກອນ, ປະກອບສ່ວນ​ເຂົ້າ​ໃນ​ການ​ເຮັດ​ໃຫ້​ຖັນ​ແຖວ​ພະນັກງານ ​ແລະກົນ​ໄກ​ຄຸ້ມ​ຄອງ​ເສດຖະກິດ-ສັງຄົມ​ໃນ​ປັດຈຸບັນ​ມີ​ການ​ປ່ຽນ​ແປງ​ໃໝ່.ພະນັກງານ​​ເກົ່າ​ທ່ີເຖົ້າ​ແກ່​ຕ້ອງ​ຈິງໃຈຊົມ​​ເຊີ​ຍ, ສິດສອນ, ຊັກ​ຈູງ​ແລະຮັກ​ແພງ​ພະນັກງານ​ໃໝ່​ທ່ີໜຸ່ມ​ນ້ອຍ. ຍ້ອນ​ວ່າ​ລະຫວ່າງ​ພະນັກງານ​ເຖົ້າ​ແກ່​ກັບ​ພະນັກງານ​ໜຸ່ມ​ນ້ອຍກໍຄື​ລະຫວ່າງ​ພະນັກງານ​ເກົ່າ​ກັບ​ພະນັກງານ​ໃໝ່​ມີ​ຄວາມ​ແຕກ​ຕ່າງ​ກັນ​ທາງ​ດ້ານ​ຮຸ່ນ-ໄວດັ່ງ​ນັ້ນ, ຈຶ່ງ​ມັກ​ມີ​ການຈຳ​ແນ​ກ​ແລະ​ອື່ນໆ.

ແຕ່​ວ່າ, ກໍຍັງມີ​ພະນັກງານ​ເກົ່າ​ທ່ີ​ເຖົ້າ​ແກ່​ຈຳນວນ​ໜຶ່ງ​ເມື່ອ​ຮອດ​ໄລຍະ​ໃດ​ໜຶ່ງ​ຊ້ຳພັດ​ພັກ​ເຊົາ​ບໍ່​ກ້າວ​ເດີນ​ໄປ​ໄດ້, ມັກ​ຈະ​ກ້ຽວ​ກູ້​ກ້ຽວ​ກອດ​ກັບ​ອັນ​ເກົ່າ, ບໍ່​ກະຕືລື​ລົ້ນ​ຕໍ່​ອັນ​ໃໝ່. ສ່ວນ​ພະນັກງານ​​ໃໝ່​ທ່ີໜຸ່ມ​ນ້ອຍ, ຍ້ອນ​ວ່າ​ເຮັດ​ວຽກ​ບໍ່​ທັນ​ເຫິງ, ບົດຮຽນ​ມີ​ໜ້ອຍຍັງ​ມີ​ຈຸດ​ອ່ອນ​ຫຼາຍ, ​ແຕ່​ເຂົາ​ເຈົ້າ​ຊ້ຳພັດ​ມີ​ຈຸດ​ດີ​ລື່ນ​ພະນັກງານ​ເກົ່າ​ຢູ່​ບ່ອນ​ວ່າ​ເຂົາ​ຍັງ​ໜຸ່ມ, ວ່ອງ​ໄວ ​ແລະມີ​ຫົວຄິດ​ປະດິດ​ສ້າງ​ຫຼາຍ​ກວ່າ. ພະ​ນັກ​ງານ​​ເກົ່າ​ທ່ີເຖົ້າ​ແກ່, ຍ້ອນ​ວ່າ​ໄດ້​ເສຍສະຫຼະ​ຫຼາຍ​ເຂົ້າ​ໃນບົດຮຽນ​ຂອງ​ຕົນ​ຜ່ານ​ມາ, ດັ່ງ​ນັ້ນຈຶ່ງ​ມັກ​ນຳ​ເອົາ​ບົດຮຽນ, ຄວາມ​ຮັບ​ຮູ້ ​ແລະການ​ຕີ​ລາຄາ​ຂອງ​ຕົນ​ໃນ​ອະດີດ​ມາ​ນຳ​ໃຊ້​ເຂົ້າ​ໃນ​ສະພາບ​ການ​ຂອງ​ໄວ​ໜຸ່ມ ​ແລະພະນັກງານ​​ໃໝ່​ທ່ີໜຸ່ມ​ນ້ອຍ​ໃນ​ສະ​ໄໝ​ປັດຈຸບັນ. ກົງກັນຂ້າມ​, ຮຸ່ນ​ໄວ​ໜຸ່ມ​ເວລາ​ນີ້ຍ້ອນ​ໄດ້​ຊົມ​ໃຊ້​ຜົນສຳ​ເລັດ​ຂອງ​ວັດທະນະທຳ​ໄລຍະ​ໃໝ່, ມີ​ລະດັບ​ການ​ສຶກສາ​ສູງ, ຮູ້​ກວ້າງ​ເຫັນ​ໄກ, ​ໄດ້​ເຫັນ ​ແລະຮັບ​ຟັງ​ຫຼາຍ​ກະ​ແສ​ຂ່າວ, ​ແນວ​ຄິດກໍ​ປອດ​ໂປ່​ງສົດ​ຊື່ນ​ແຈ່ມ​ໃສ​ກວ່າ. ສະ​ນັ້ນ, ມັນ​ຈະ​ພາ​ໄປ​ເຖິງ​ການ​ຖືກ​ເບື່ອ​ເມົາ, ຖື​ວ່າຄວາມ​ຮູ້​-ຄວາມ​ເຂົ້າ​ໃຈ ​ແລະບົດ​ຮຽນ​ຂອງ​ພະນັກງານ​ເຖົ້າ​ແກ່​ເປັນ​ສິ່ງ​ຫຼ້າ​ຫຼັງ, ​ເກົ່າ​ແກ່ ​ແລະຮັກສາ​ເດີມ ​ເຊິ່ງ​ເຂົ້າ​ເຈົາມັກ​ອີງ​ໃສ່​ຄວາມ​ຮູ້​ທ່ີ​ຮຽນ​ຈາກ​ປຶ້ມ, ຖື​ເບົາຫຼື​ມີ​ບາງ​ຄັ້ງກໍ່ຕີ​ຕົວ​ຫ່າງ​ອອກຈາກ​ບົດຮຽນ​ໃນ​ພຶດຕິ​ກຳ. ນ້ຳ​ໃຈ​ຟົດ​ຟື້ນ​ຂອງ​ໄວໜຸ່ມກໍ​ຍັງ​ມີ​ດ້ານ​ກົງກັນຂ້າມ​ຂອງ​ມັນນັ້ນ​ແມ່ນ​ຄວາມ​ຮ້ອນຮົນ, ຕິດພະຍາດ​ປຶ້ມ​ສໍ, ຄຳ​ພີຕາ​ຍຕົວ, ມັກ​ຈະ​ຕົກ​ຖືກ​ເບິ່ງ​ດ້ານ​ດຽວ… ນີ້​ເປັນ​ຈຸດ​ອ່ອນ​ທ່ີ​ມີ​ຈິງ ​ເຊິ່ງພະນັກງານ​ເກົ່າ​ທ່ີ​ເຖົ້າ​ແກ່​ຖື​ເອົາ​ເປັນ​ບ່ອນ​ອີງ​ທ່ີ​ພາ​ໃຫ້​ເກີດ​ຄວາມ​ລະ​ແວງ​ສົງ​ໄສ​ເນື້ອ​ແທ້​ຂອງ​ພະນັກງານ​ໃໝ່​ທ່ີ​ໜຸ່ມ​ນ້ອຍ.

ຄວາ​ມຂັດ​ແຍ່ງ​ ແລະຄວາມ​ແຕກ​ຕ່າງທາງ​ດ້ານ​ຮຸ່ນ-​ໄວ​ເປັນ​ສິ່ງ​ທ່ີ​ຫຼີກ​ລ່ຽງບໍ່​ໄດ້ ​ແລະກໍຍ້ອນ​ແນວ​ນັ້ນຈຶ່ງ​ຕັ້ງ​ບັນຫາ​ການ​ສືບ​ຕໍ່ ​ແລະສືບ​ທອດ​ປ່ຽນ​ແທນ​ຂຶ້ນ. ​ໃນ​ການ​ແກ້​ໄຂ​ຄວາມ​ຂັດ​ແຍ່ງ​ນັ້ນ, ພະນັກງານ​ເກົ່າ​ທ່ີ​ເຖົ້າ​ແກ່​ຕ້ອງ​ຮັກສາ​ພາລະ​ບົດບາດ​ເປັນ​ເຈົ້າການ ​ເຊິ່ງປະທານ ​ໂຮ່ຈິ​ມິນ​ກ່າວ​ວ່າ: “ຕາມ​ທຳ​ມະ​ດາ​ພະນັກງານ​ເກົ່າ​ຍັງ​ຮັກສາ​ຖານະ​ການ​ນຳພາ. ​ເພາະສະ​ນັ້ນ, ນັບ​ແຕ່​ນີ້​ຕໍ່​ໄປ​ຖ້າ​ຫາກ​ພົວພັນ​ລະຫວ່າງ​ຖັນ​ແຖວ​ພະນັກງານ​ທັງ​ສອງ​ປະ​ເພດ​ດັ່ງກ່າວ​ບໍ່​ກົມກຽວ​ກັນ​​ແລ້ວ, ພະນັກງານ​ເກົ່າ​ຕ້ອງ​ຮັບຜິດຊອບ​ຫຼາຍ​ກວ່າ”(ຄັດຈາກປຶ້ມດັດແປງແກ້ໄຂວິທີເຮັດວຽກ, ໜ້າ 15) ເພິ່ນ​ຕຳ​ນິຕື່ມ​ວ່າ: “ພະນັກງານ​ເຖົ້າ​ແກ່​ຈຳນວນ​ໜຶ່ງ​ຕິດພະຍາດ​ເປັນ​ເຈົ້າ​ໃຫຍ່ນາຍ​ໂຕ, ຖື​ວ່າ​ຕົນ​ເປັນ​ຜູ້ມີ​ຜົນງານ​ຫຼາຍ, ພະນັກງານ​ຜູ້ໜຸ່ມ​ນ້ອຍ​ເວົ້າ​ຫຍັງກໍ່​ປັດ​ປ່າຍ​ໄປ, ຖື​ວ່າ​​ເຂົາເຈົ້າ​ເກີດ​ໃໝ່​ໃຫຍ່​ບໍ່​ຮູ້​ຫຍັງ​ດອກ, ​ໃຊ້​ວາຈາ​ຫຍາບ​ຊ້າ. ພະນັກງານ​ເກົ່າ​ທ່ີ​ເຖົ້າ​ແກ່​ຕ້ອງ​ຊ່ວຍ​ເຫຼືອ​ພະນັກງານ​ໃໝ່​ທ່ີໜຸ່ມ​ນ້ອຍ​ໃຫ້​ມີ​ຄວາມ​ກ້າວໜ້າ, ​ເມື່ອ​ເປັນ​ແນວ​ນັ້ນ​ ມັນຮຽກຮ້ອງ​ໃຫ້​ພະນັກງານ​ເຖົ້າ​ແກ່​ມີ​ທ່າ​ທີ​ອະນຸ​ໂລມ, ຊັກ​ຈູງ​ພະນັກງານ​ໜຸ່ມ​ນ້ອຍ” (ຄັດຈາກປຶ້ມໂຮ່ຈິມິນ: ວ່າດ້ວຍບັນຫາພະນັກງານ, ໜ້າ 115).

ໂດຍ: ຈານຈ່ອຍ

ບົດຄວາມຫຼ້າສຸດ

ສົ່ງເສີມການທ່ອງທ່ຽວທາງທຳມະຊາດໃນລາວ ໂອກາດການທ່ອງທ່ຽວໃນເຂດປ່າໄມ້ຂອງລາວແບບເປີດກວ້າງ ພ້ອມກັບສ້າງວຽກເຮັດງານທຳໃຫ້ກັບແມ່ຍິງເຖິງ 75,000 ຄົນ

ກະຊວງ ກະສິກໍາ ແລະ ສິ່ງແວດລ້ອມ ໄດ້ອອກຂໍ້ຕົກລົງ ສະບັບ ເລກທີ 1926/ກປ,ລົງວັນທີ 03 ມິຖຸນາ 2025. ຊຶ່ງຂໍ້ຕົກສະບັບດັ່ງກ່າວນີ້ໄດ້ເປັນປັດໃຈພື້ນຖານໃນການຊຸກຍູ້ ແລະ ສົ່ງເສີມການທ່ອງທ່ຽວທຳມະຊາດ...

ສະຫາຍນາງ ວຽງທອງ ສີພັນດອນ ໄດ້ຮັບເລືອກເປັນເລຂາຄະນະບໍລິຫານງານພັກ ສປສສ

ຂໍສະແດງຄວາມຊົມເຊີຍ ສະຫາຍນາງ ວຽງທອງ ສີພັນດອນ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກສານປະຊາຊົນສູງສຸດ (ສປສສ) ກອງປະຊຸມໃຫຍ່ສະມາຊິກພັກ ຄັ້ງທີ V ອົງຄະນະພັກສານປະຊາຊົນສູງສຸດ ປິດລົງດ້ວຍຜົນສຳ ເລັດຢ່າງຈົບງາມໃນວັນທີ 11 ກັນຍານີ້ ທີ່ນະຄອນຫຼວງວຽງຈັນ...

ຖືກກັກໂຕແລ້ວ ຈາກກໍລະນີແພດທຳຮ້າຍຮ່າງກາຍຄົນເຈັບ ຢູ່ຫວຽດນາມ ພົບເຄື່ອງມືບໍ່ໄດ້ມາດຕະຖານ ແລະ ບໍ່ມີໃບອະນຸຍາດ

ໃນວັນທີ 11 ກັນຍາ 2025 ທີ່ຜ່ານມາ, ເຈົ້າໜ້າທີ່ຕຳຫຼວດນະຄອນໂຮຈິມິນ ປະເທດຫວຽດນາມ ໄດ້ຈັບກຸມ ນາງ ຫວຽນ ຖິ ຕ່ວນ ຈິງ (Nguyen...

ຮູ້ຈັກກັບ Nepo Kids ກະແສຈາກລູກຫຼານນັກການເມືອງເນປານ ໃຊ້ຊີວິດອວດລວຍທ່າມກາງຄວາມລຳບາກຂອງປະຊາຊົນ

ເມື່ອບໍ່ດົນມານີ້ໄດ້ມີເຫດການປະທ້ວງລັດທະບານໃນປະເທດເນປານ ໃນວັນທີ 09/09/2025, ເຊິ່ງສາເຫດແມ່ນເກີດຈາກການອອກມາດຕະການຫ້າມປະຊາຊົນນໍາໃຊ້ສື່ສັງຄົມອອນລາຍ ແລະ ອີກໜຶ່ງສາເຫດຄືລັດຖະບານ ມີການສໍ້ລາດບັງຫຼວງ ເຮັດໃຫ້ຄົນນລຸ້ນໃໝ່ເກີດຄວາມບໍ່ພໍໃຈ. Nepo Kids ຫຼື ລູກເຈົ້າຫຼານເພິ່ນ ເຊິ່ງປະຊາຊົນວິພາກວິຈານລູກຫຼານນັກງານເມືອງ ເພາະພວກເຂົານັ້ນໄດ້ໃຊ້ຊີວິດຫຼູຫຼາ ແລະ...