ພູເຂົາໄຟກຣາກາຕົວເຊິ່ງມີການເຄື່ອນໄຫວມາຕະຫຼອດຫຼາຍເດືອນ ໄດ້ລະເບີດຂຶ້ນຫຼາຍຄັ້ງໃນຄືນວັນສຸກທີ 21 ທັນວາ 2018 ທີ່ຜ່ານມາ ເຮັດໃຫ້ລາວາໄຫຼອອກມາຈາກປ່ອງພູເຂົາຟູໄຫຼລົງສູ່ທະເລ ແລະ ເຮັດໃຫ້ເກີດດິນຖະລົ່ມໃຕ້ທະເລ ເຊິ່ງຄາດວ່າເປັນສາເຫດເຮັດໃຫ້ເກີດຄື້ນສືນາມິຊັດເຂົ້າສູ່ແຄມຝັ່ງຂອງເມືອງຕ່າງໆ ທີ່ເກາະສຸມາຕຣາ ແລະ ເກາະຊວາ.
ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕາ ປະເທດອິນໂດເນເຊຍ ເມື່ອວັນທີ 24 ທັນວາ 2018 ວ່າ ສຳນັກ ງານບໍລິຫານຈັດການໄພພິບັດແຫ່ງຊາດ (BNPB) ອອກຖະແຫຼງການວ່າ ປະຊາຊົນຄວນງົດການຈັດກິດຈະກຳບໍລິເວນຫາດຊາຍທີ່ຮວມເຖິງການລົງຫຼິ້ນນໍ້າທະເລ ແລະ ການເຂົ້າໃກ້ບໍລິເວນແຄມຝັ່ງທີ່ເຊື່ອມຕໍ່ກັບຊ່ອງແຄບຊຸນດາ “ເປັນໄລຍະຍາວ” ຈົນຮອດວັນທີ 25 ທັນວາ 2018ນີ້ “ເປັນຢ່າງໜ້ອຍ” ເນື່ອງຈາກຍັງມີແນວໂນ້ມສູງທີ່ຈະເກີດສືນາມິຄັ້ງໃໝ່ ຈາກການທີ່ພູເຂົາໄຟກຣາກາຕົວລະເບີດຮຸນແຮງຂຶ້ນອີກຄັ້ງ.
ເຖິງແມ່ນວ່າລາຍງານຂອງ BNPB ຍັງຄົງແຈ້ງຈຳນວນຜູ້ເສຍຊີວິດຢ່າງເປັນທາງການໄວ້ທີ່ຢ່າງໜ້ອຍ 222 ຄົນ ໄດ້ຮັບບາດເຈັບ 843 ຄົນ ແລະ ຍັງສູນຫາຍອີກ 28 ຄົນ ແຕ່ມີການຄາດການວ່າຕົວເລກທັງໝົດຈະເພີ່ມຂຶ້ນ.
ຂະນະທີ່ສະຫະປະຊາຊາດ (UN), ລັດຖະບານສະຫະລັດ ແລະ ອົດສະຕາລີ ຢືນຢັນພ້ອມມອບຄວາມຊ່ວຍເຫຼືອທັນທີທີ່ໄດ້ຮັບການຕິດຕໍ່ຈາກອິນໂດເນເຊຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: sanook, dailynews.co.th