ອົງການອາຫານ ແລະ ການກະເສດແຫ່ງສະຫະປະຊາຊາດຄາດການວ່າພາຍໃນປີ 2025 ປະຊາກອນເກືອບ 2.000 ລ້ານຄົນໃນໂລກອາດຂາດນໍ້າດື່ມທີ່ພຽງພໍຕໍ່ຄວາມຕ້ອງການໃນການໃຊ້ຊີວິດປະຈຳວັນ. ໜຶ່ງໃນແນວທາງການແກ້ໄຂບັນຫານີ້ຄືການປ່ຽນນໍ້າທະເລໃຫ້ກາຍນໍ້າຈືດທີ່ສາມາດດື່ມໄດ້ ດ້ວຍຂະບວນການກຳຈັດເກືອອອກຈາກນໍ້າທະເລ (desalination) ເຊິ່ງຕ້ອງໃຊ້ພະລັງງານຫຼາຍກວ່າວິທີເກົ່າທີ່ໃຊ້ການສູບນໍ້າຈາກແມ່ນໍ້າອື່ນໆເຖິງ 10-1.000 ເທົ່າ
ທີມວິສະວະກອນຈາກພະແນກພະລັງງານໃນມະຫາວິທະຍາໄລໂພລີເທັກນິກຕູຣິນ ໃນປະເທດ ອິຕາລີ ໄດ້ຄິດຄົ້ນຕົ້ນແບບໃໝ່ຂອງການກັ່ນນໍ້າທະເລໂດຍໃຊ້ພະລັງງານແສງຕາເວັນໃຫ້ມີປະສິດທິພາບຫຼາຍຂຶ້ນ ດ້ວຍແຮງບັນດານໃຈຈາກຈະບວນການຂົນສົ່ງນໍ້າຂອງພືດທີ່ຂົນສົ່ງນໍ້າຈາກຮາກສູ່ໃບໄມ້ ແລະ ແຮງຍົກຕົວຂອງນໍ້າ ລວມເຖິງການຄາຍນໍ້າອອກມາ, ສ້າງແບບຈຳລອງຫຼາຍລະດັບເປັນອຸປະກອນລອຍຕົວທີ່ຈັດເກັບນໍ້າທະເລ ໃຊ້ວັດຖຸມີຮູຕົ້ນທຶນຕໍ່າເຮັດໃຫ້ຕັດບັນຫາຄວາມຫຍຸ້ງຍາກບ່ອນປໍ້ານໍ້າ; ອຸປະກອນນີ້ຈະຖືກເຮັດໃຫ້ຮ້ອນຂຶ້ນດ້ວຍພະລັງງານແສງຕາເວັນຈະຊ່ວຍແຍກເກືອອອກຈາກນໍ້າທະເລ ແລະ ນໍ້າຈືດທີ່ໄດ້ຈາກພະລັງງານແສງອາທິດຈະເພີ່ມປະລິມານຂຶ້ນເທົ່າຕົວ.
ທີມວິສະວະກອນເຊື່ອວ່າວິທີນີ້ຈະສ້າງຄວາມຍືນຍົງໄດ້ຫຼາຍກວ່າ ເມື່ອທຽບກັບວິທີແກ້ບັນຫາກ່ອນໜ້ານີ້ ເພາະຂຶ້ນຢູ່ກັບຂະບວນການທີ່ເກີດຂຶ້ນໂດຍທຳມະຊາດ, ອຸປະກອນກໍ່ມີລາຄາບໍ່ແພງ, ຕິດຕັ້ງ ແລະ ສ້ອມແປງໄດ້ງ່າຍ, ຄຸນລັກສະນະນີ້ອາດມີປະໂຫຍດຕໍ່ພື້ນທີ່ແຄມຝັ່ງທະເລທີ່ກຳລັງພົບກັບບັນຫາຂາດນໍ້າດື່ມ ແລະ ຍັງບໍ່ໄດ້ຮັບການບໍລິການຈາກໂຄງສ້າງພື້ນຖານ. ນອກຈາກນີ້ຍັງເໝາະສຳລັບການຈັດຫານໍ້າດື່ມທີ່ປອດໄພ ແລະ ລາຄາຕໍ່າໃນພາວະສຸກເສີນ ເຊັ່ນ: ພື້ນທີ່ປະສົບອຸທົກກະໄພ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: thairath.co.th