ນັກວິເຄາະຂອງສະຖາບັນການເງິນພາຍໃນອາຊຽນ, ອາເມລິກາ ແລະ ເອີຣົບ ປະເມີນກົງກັນວ່າ ເສດຖະກິດໃນອາຊຽນປີ 2019 ຍັງຕ້ອງປະເຊີນກັບເສດຖະກິດຕົກຕໍ່າອີກຍາວ ເຖິງວ່າການເຈລະຈາຍົກເລີກຂໍ້ພິພາກທາງການຄ້າລະຫວ່າງຈີນ ແລະ ອາເມລິກາເປັນໄລຍະເວລາ 90 ວັນ ອາດຊ່ວຍຜ່ອນຄາຍຄວາມເຄັ່ງຕຶງທາງເສດຖະກິດໃນໄລຍະສັ້ນໄດ້ ແຕ່ຄາດວ່າໃນປີ 2019 ມີ 5 ປະເທດຢ່າງ ໄທ, ອິນໂດເນເຊຍ, ສິງກະໂປ, ມາເລເຊຍ ແລະ ຟິລິບປິນ ຍັງມີຄວາມສ່ຽງກັບພາວະເສດຖະກິດຕົກຕໍ່າ.

ການປະເມີນທ່າອ່ຽງໃນການຂະຫຍາຍຕົວທາງເສດຖະກິດຂອງ 5 ປະເທດດັ່ງກ່າວ ໃນຖານະທີ່ມີເສດຖະກິດຂະຫຍາຍໃຫຍ່ເປັນອັນດັບຕົ້ນໆຂອງອາຊຽນ ຄາດວ່າ ຈີດີພີ ຢູ່ທີ່ 4,8% ໂດຍສະເລ່ຍຫຼຸດລົງຈາກ 5% ໃນປີ 2018 ແລະ 5,1% ໃນປີ 2017 ອ້າງອີງຈາກໄຕມາດທີ 3 ໃນໄລຍະເດືອນກໍລະກົດ-ກັນຍາ 2018 ທີ່ຜ່ານມາ ພົບວ່າມີການຂະຫຍາຍຕົວຊ້າຫຼາຍ ເພາະ 5 ປະເທດຕ່າງກໍ່ເພິ່ງພາການສົ່ງອອກຈິ່ງໄດ້ຮັບຜົນການກະທົບຈາກບັນຫາປິ່ນອ້ອມຂ້ອນຂ້າງຫຼາຍ.

ຂະນະທີ່ ທ່ານ ໂມຮຳເໝັດ ຟາອິດ ນາກູທາ ນັກເສດຖະສາດຜູ້ຊ່ຽວຊານກ່າວວ່າ ອຸປະສັກສຳຄັນທີ່ນອກເໜືອຈາກຄວາມເຄັ່ງຕຶງທາງການຄ້າ ໄດ້ແກ່ພາວະເສດຖະກິດຂະຫຍາຍຕົວຊ້າໃນຈີນ ແລະ ຜົນກະທົບຈາກການປ່ຽນແປງອັດຕາແລກປ່ຽນໃນອາເມລິກາ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ເສດຖະກິດ-ການຄ້າ