ທະນາຄານແຫ່ງ ສປປ ລາວ (ທຫລ) ໄດ້ອອກແຈ້ງການວ່າດ້ວຍການເກັບຄ່າທຳນຽມມອບເງິນສົດ ເງິນຕາຕ່າງປະເທດປະເພດໃບນ້ອຍ ແລະ ເງິນເສື່ອມຄຸນນະພາບ ຢູ່ທະນາຄານແຫ່ງ ສປປ ລາວ ອອກ 2 ສະບັບ, ເຊິ່ງສະບັບທຳອິດແມ່ນສະບັບເລກທີ 450/ທຫລ, ລົງວັນທີ 05 ຕຸລາ 2018 ແລະ ສະບັບທີສອງແມ່ນສະບັບເລກທີ 381/ຫກ, ລົງວັນທີ 30 ຕຸລາ 2018.
ແຈ້ງການສອງສະບັບນີ້, ໄດ້ກຳນົດມາດຕະຖານກ່ຽວກັບການເກັບຄ່າທຳນຽມຮັບເງິນສົດປະເພດໃບນ້ອຍ ແລະ ເງິນເສື່ອມຄຸນນະພາບຂອງສະກຸນເງິນຕາຕ່າງປະເທດຢູ່ທະນາຄານແຫ່ງ ສປປລາວ ເພື່ອເປັນບ່ອນອີງໃນການຈັດຕັ້ງປະຕິບັດໃຫ້ເປັນເອກະພາບໃນທົ່ວລະບົບທະນາຄານ.
ມາດຖານປະເພດເງິນໃບນ້ອຍ ແລະ ເສື່ອມຄຸນນະພາບ ຂອງສະກຸນເງິນຕາຕ່າງປະເທດມີດັ່ງນີ້: ມາດຖານປະເພດເງິນໃບນ້ອຍ ສະກຸນເງິນໂດລານັບແຕ່ປະເພດໃບ 1-20 ໂດລາ, ສະກຸນເງິນບາດ ນັບແຕ່ປະເພດໃບ 20-100 ບາດ.
ເງິນສົດທີ່ນຳມາມອບຕ້ອງເປັນຕັບ (ຄົບ 100 ໃບ), ເປັນໂຄ້ນ (ຄົບ 1000 ໃບ) ຕ້ອງເປັນເງິນປະເພດດຽວກັນ ແລະ ແຍກເງິນເສື່ອມຄຸນນະພາບຕາມມາດຖານທີ່ກຳນົດໄວ້ ເພື່ອສະດວກໃນການກວດນັບ.
ມາດຖານເງິນເສື່ອມຄຸນນະພາບຈະແຍກອອກເປັນ 2 ມາດຖານຄື: ເງິນເສື່ອມຄຸນນະພາບທີ່ສາມາດປ່ຽນໄດ້ ແລະ ເງິນເສື່ອມຄຸນນະພາບທີ່ບໍ່ສາມາດປ່ຽນໄດ້
ລະດັບເງິນເສື່ອມຄຸນນະພາບທີ່ສາມາດຮັບໄດ້ຈະແບ່ງອອກເປັນ 3 ລະດັບຄື:
- ລະດັບ 20% ລົງມາ ແມ່ນທີ່ມີສະພາບເປັນເງິນເກົ່າ, ເປື້ອນ, ພັບ, ຫຍໍ່ ແລະ ຖືກສີ ພຽງເລັກໜ້ອຍ;
- ລະດັບ 40% ລົງມາ ແມ່ນເງິນທີ່ມີສະພາບເປັນເງິນເກົ່າ, ເປື້ອນ, ຂາດແວ່ງ ທີ່ມີສ່ວນໃດສ່ວນໜຶ່ງເສຍໄປ, ຕິດສະກ໋ອດ, ຖືກຈ້ຳກາ, ສີຈືດຈາງ ທີ່ຖືກຈາກການຊັກຟອກ ຫຼື ຖືກສານເຄມີ;
- ລະດັບ 60% ລົງມາ ແມ່ນເງິນທີ່ມີສະພາບເກົ່າ, ເປື້ອນ ທີ່ເບິ່ງບໍ່ເຫັນຄຸນລັກສະນະຂອງເງິນຢ່າງບໍ່ຈະແຈ້ງ, ຖືກຕັດ ລື ຂາດເປັນສອງທ່ອນແນວຕັ້ງທີ່ນຳມາປະກອບເຂົ້າກັນເປັນເງິນທີ່ສົມບູນ ແລະ ຖືກສີຢາຍເປັນຈຸດທົ່ວໃບເງິນ.
ລະດັບເງິນເສື່ອມຄຸນນະພາບທີ່ບໍ່ສາມາດຮັບໄດ້ແມ່ນເງິນໃນລະດັບ 61% ຂຶ້ນໄປທີ່ມີສະພາບເປັນເງິນຖືກເຈາະຮູ ຫຼື ຂີດຂຽນ ໂດຍເຈດຕະນາ, ຖືກຕັດ ຫຼື ຂາດເປັນທ່ອນແນວນອນ, ຂາດຈາກມຸມໜຶ່ງໄປຫາອີກມຸມໜຶ່ງ, ຂາດເປັນຫຼາຍຊີ້ນສ່ວນ, ຂາດບໍ່ຮອດເຄິ່ງໜຶ່ງ ຫຼື ຂາດກາຍເຄິ່ງໜຶ່ງທີ່ມີແຕ່ສ່ວນດຽວ, ຖືກສີທົ່ວໃບເງິນ, ປວກກັດ ຫຼື ຖືກໄຟໄໝ້.
ທະນາຄານແຫ່ງ ສປປ ລາວຈະເກັບຄ່າທຳນຽມຮັບເງິນປະເພດໃບນ້ອຍ ແລະ ເງິນເສື່ອມຄຸນນະພາບດັ່ງນີ້: ເງິນສະກຸນໂດລາປະເພດໃບ 1-20 ໂດລາ ເກັບຄ່າທຳນຽມ 1% ຂອງຈຳນວນເງິນທີ່ມາມອບຕົວຈິງ, ປະເພດເງິນໃບ 1-5 ໂດລາ ເກັບຄ່າທຳນຽມ 3% ຂອງຈຳນວນເງິນທີ່ມາມອບໃຫ້ຕົວຈິງ. ສະກຸນເງິນບາດປະເພດໃບ 100 ບາດ ເກັບຄ່າທຳນຽມ 0,5% ຂອງຈຳນວນເງິນມາມອບຕົວຈິງ, ປະເພດເງິນໃບ 20-50 ບາດ ເກັບຄ່າທຳນຽມ 1% ຂອງຈຳນວນເງິນທີ່ມາມອບຕົວຈິງ.
ສຳລັບການເກັບອັດຕາຄ່່າທຳນຽມເງິນເສື່ອມຄຸນນະພາບ ຈະແຍກອອກເປັນ 3 ລະດັບດັ່ງລຸ່ມນີ້:
- ເງິນເສື່ອມຄຸນນະພາບລະດັບ 20% ລົງມາ ເກັບຄ່າທຳນຽມ 15% ຂອງເງິນທີ່ມາມອບຕົວຈິງ
- ເງິນເສື່ອມຄຸນນະພາບລະດັບ 40% ລົງມາ ເກັບຄ່າທຳນຽມ 20% ຂອງເງິນທີ່ມາມອບຕົວຈິງ
- ເງິນເສື່ອມຄຸນນະພາບລະດັບ 60% ລົງມາ ເກັບຄ່າທຳນຽມ 30% ຂອງເງິນທີ່ມາມອບຕົວຈິງ
- ສຳລັບຄ່າທຳນຽມຮັບເງິນປະເພດໃບນ້ອຍ ແລະ ເງິນເສື່ອມຄຸນນະພາບແມ່ນຈະຖືກເກັບເປັນສະກຸນເງິນກີບ ໂດຍນຳໃຊ້ອັດຕາແລກປ່ຽນຂອງກົມບໍລິການທະນາຄານທີ່ປະກາດໃຊ້ໃນແຕ່ລະມື້
ທ່ານສາມາດເຂົ້າອ່ານຂໍ້ມູນເພີ່ມເຕີມໄດ້ທີ່ເວັບໄຊສ໌: www.bol.gov.la
ຮຽບຮຽບຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: ທະນາຄານແຫ່ງ ສປປ ລາວ