ນະຄອນຫລວງວຽງຈັນ ຍັງຕິດການຊໍາລະໜີ້ ກັບລັດວິສາຫະກິດໄຟຟ້າລາວ (ຟຟລ) ຄ່າໄຟຟ້າເຍືອງທາງປະມານ 40 ຕື້ກີບ. ປັດຈຸບັນ, ຍັງບໍ່ທັນຮູ້ວ່າພາກສ່ວນໃດຈະເຂົ້າມາຮັບຜິດຊອບຄ່າໃຊ້ຈ່າຍການຊຳລະໜີ້ດັ່ງກ່າວ, ໃນຂະນະທີ່ ຟຟລ ສະເໜີໃຫ້ທຸກພາກສ່ວນກ່ຽວຂ້ອງ ຈົ່ງຮ່ວມກັນປຶກສາຫາລືເພື່ອຫາວິທີແກ້ໄຂໂດຍໄວ.
ທ່ານ ຈັນສົມ ພິລາລົມ, ຮອງຫົວໜ້າຝ່າຍປະຕິບັດການໄຟຟ້ານະຄອນຫລວງວຽງຈັນ ໃຫ້ສຳພາດຕໍ່ສື່ມວນຊົນ ວ່າ: “ໃນໄລຍະ 7 ປີມາຜ່ານມາ, ນັບແຕ່ປີ 2002 ຫາ ເດືອນພຶດສະພາ 2018, ລະບົບໄຟຟ້າເຍືອງທາງຢູ່ເສັ້ນທາງໃຫຍ່ທີ່ ຟຟລ ຄຸ້ມຄອງມີ 45 ເສັ້ນທາງ ແລະ ທາງຮ່ອມ 41 ເສັ້ນທາງ ແຕ່ຍັງມີອີກ 13 ເສັ້ນທາງທີ່ຂະຫຍາຍໃໝ່ທີ່ ຟຟລ ບໍ່ໄດ້ຮັບເຂົ້າໃນການຄຸ້ມຄອງ ຍ້ອນມີການພົວພັນເຖີງບັນຫາງົບປະມານໃຊ້ຈ່າຍໃນການບຳລຸງຮັກສາ. ເນື່ອງຈາກໄຟຟ້າດັ່ງກ່າວ ບໍ່ໄດ້ຂຶ້ນກັບ ຟຟລ ໂດຍກົງ ຈຶ່ງເຮັດໃຫ້ການເບິ່ງແຍງໄຟຟ້າເຍືອງທາງໃນສະຖານທີ່ດັ່ງກ່າວ ບໍ່ໄດ້ເສຍຄ່າໄຟ ເຊິ່ງມີພຽງການສ້ອມແປງ ແລະ ບໍາລຸງຮັກສາແບບສຸກເສີນເທົ່ານັ້ນ ເພາະຄ່າໄຟຟ້າເຍືອງທາງທີ່ຕ້ອງຈ່າຍໃນແຕ່ລະເດືອນ ສະເລ່ຍແລ້ວ 500-600 ລ້ານກີບ. ດ້ວຍເຫດນີ້, ແຕ່ປີ 2012 ເປັນຕົ້ນມາ ຈຶ່ງບໍ່ມີພາກສ່ວນໃດເຂົ້າມາຮັບຜິດຊອບຄ່າໃຊ້ຈ່າຍໃນການຊຳລະຄ່າໄຟຟ້າເຍືອງທາງໃນແຕ່ລະເດືອນ. ແນວໃດກໍຕາມ, ເພື່ອໃຫ້ໜີ້ຄ່າໄຟຟ້າເຍືອງທາງຈຳນວນດັ່ງກ່າວໄດ້ຮັບການແກ້ໄຂ, ຟຟລ ຈະໄດ້ຈັດກອງປະຊຸມຮ່ວມກັບອົງການປົກຄອງນະຄອນຫລວງວຽງຈັນ, ກະຊວງພະລັງງານ ແລະ ບໍ່ແຮ່, ກະຊວງການເງິນ ແລະ ທຸກພາກສ່ວນກ່ຽວຂ້ອງເພື່ອຊອກຫາທາງອອກຮ່ວມກັນຢ່າງເໝາະສົມໃຫ້ໄດ້ໂດຍໄວ ເພື່ອຮັບປະກັນໃຫ້ໄຟຟ້າເຍືອງທາງ ໄດ້ຮັບການຄຸ້ມຄອງຢ່າງມີປະສິດທິຜົນກ່ວາເກົ່າ”.
ເວລາດຽວກັນທ່ານໄດ້ກ່າວຢໍ້າຕື່ມວ່າ: “ເນື່ອງຈາກໄຟຟ້າເຍືອງທາງ ເປັນໄຟຟ້າສາທາລະນະ, ດັ່ງນັ້ນ ຖ້າຫາກຈະອາໄສແຕ່ ຟຟລ ສ້ອມແປງ ແລະ ບໍາລຸງຮັກສາພຽງຝ່າຍດຽວຄົງເປັນໄປໄດ້ຍາກ ເພາະມັນພົວພັນໂດຍກົງເຖີງການໃຊ້ຈ່າຍງົບປະມານຈຳນວນ ຫລາຍໃນແຕ່ລະເດືອນ. ດັ່ງນັ້ນ, ວິທີທາງທີ່ດີທີ່ສຸດຄື ບັນດາພາກສ່ວນທີ່ກ່ຽວຂ້ອງ ຕ້ອງເຂົ້າມາມີສ່ວນຮ່ວມນຳກັນ. ໃນໄລຍະຜ່ານມາ, ຟຟລ ໄດ້ຄົ້ນຄ້ວາປຶກສາຫາລືຊອກຫາວິທີແກ້ໄຂ ເພື່ອຮັບປະກັນບໍ່ໃຫ້ມີບັນຫາໜີ້ສິນຄ່າໄຟຟ້າດັ່ງກ່າວເກີດຂຶ້ນອີກໃນຕໍ່ໜ້າ ອາດຈະໃຊ້ວິທີການໃຫ້ປະຊາຊົນກໍຄື ຜູ້ຊົມໃຊ້ໄຟຟ້າໃນ ນະຄອນຫລວງວຽງຈັນ ເຂົ້າມາມີສ່ວນຮ່ວມດ້ວຍການຊ່ວຍຈ່າຍ ເງິນ 2.000-3.000 ກີບຕໍ່ບິນຕໍ່ລູກຄ້າ ເພື່ອຊຳລະຄ່າໄຟຟ້າເຍືອງທາງຮ່ວມກັນ.
ຢ່າງໃດກໍຕາມ, ບັນຫານີ້ຕ້ອງໄດ້ປຶກສາຫາລືຮ່ວມກັບອີກຫຼາຍຝ່າຍທີ່ກ່ຽວຂ້ອງຢ່າງລະອຽດຕື່ມອີກ; ສິ່ງສຳຄັນຕ້ອງໄດ້ຮັບການເຫັນດີອະນຸມັດຈາກລັດຖະບານ ແລະ ຜ່ານການຮັບຮອງຈາກສະພາແຫ່ງຊາດສາກ່ອນ ຈິ່ງສາມາດນຳໄປຈັດຕັ້ງປະຕິບັດໄດ້ ທັງນີ້ເພື່ອຫຼີກລ້ຽງບໍ່ໃຫ້ມີຫາງສຽງຈົ່ມວ່າ ຫຼື ຫາງສຽງວິພາກວິຈານຈາກສັງຄົມກໍຄື ຈາກຜູ້ຊົມໃຊ້ກະແສໄຟຟ້າທຸກຄົນໃນນະຄອນຫລວງວຽງຈັນ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຂ່າວຈາກ: Lao National Radio