ເຫດການແຜ່ນດິນໄຫວ ແລະ ເກີດຄື້ນສິນາມິທີ່ບໍລິເວນຫາດປາລູ ແຂວງ ສຸລາເວສີກາງ ປະເທດອິນໂດຍເນເຊຍ ເມື່ອວັນທີ 28 ກັນຍາ 2018ທີ່ຜ່ານມາ ຫຼ້າສຸດມີຍອດຜູ້ເສຍຊີວິດ 1,571 ຄົນ ແລະ ຍັງມີຜູ້ສູນຫາຍອີກຫຼາຍກວ່າພັນຄົນ ແລະ ປະຊາຊົນ ຈຳນວນ 70.000 ກວ່າຄົນ ບໍ່ມີທີ່ພັກອາໄສ. ທາງສະຫະປະຊາຊາດ ຫຼື UN ຢູ່ລະຫວ່າງການຮວບຮວມເງິນບໍລິຈາກ ຈາກປະຊາຄົມໂລກ ປະມານ 50.5 ລ້ານໂດລາ ເພື່ອນຳມາຊ່ວຍເຫຼືອລັດຖະບານອິນໂດເນເຊຍ ຫຼັງຄາດຄະເນວ່າມີຜູ້ຕ້ອງການຄວາມຊ່ວຍເຫຼືອກວ່າ 2 ແສນຄົນ.
ລັດຖະບານ ແຫ່ງ ສປປ ລາວ ໄດ້ປະກາດໃຫ້ການຊ່ວຍເຫລືອ ອິນໂດເນເຊຍໃນມູນຄ່າ 100.000 ໂດລາສະຫະລັດ ເພື່ອປະກອບສ່ວນເຂົ້າໃນການແກ້ໄຂຜົນກະທົບ ຈາກໄພພິບັດແຜ່ນດິນໄຫວ ແລະ ຄື້ນສິນາມິ ທີ່ເກີດຂຶ້ນໃນວັນທີ 28 ກັນຍາ 2018 ຢູ່ ແຂວງ ສຸລາເວສີກາງ ປະເທດອິນໂດເນເຊຍ ອັນໄດ້ສ້າງຄວາມເສຍຫາຍຢ່າງຫຼວງຫຼາຍໃຫ້ແກ່ຊີວິດ ແລະ ຊັບສິນຂອງປະຊາຊົນ ອິນໂດເນເຊຍ ຢູ່ເຂດດັ່ງກ່າວ.
ການປະກອບສ່ວນຊ່ວຍເຫຼືອແກ້ໄຂຜົນກະທົບຂອງໄພພິບັດດັ່ງກ່າວທີ່ເກີດຂຶ້ນ ຢູ່ ອິນໂດເນເຊຍ ຂອງລັດຖະບານແຫ່ງ ສປປ ລາວ ໃນຄັ້ງນີ້ ແມ່ນສະແດງເຖິງນໍ້າໃຈ ແລະ ຄວາມສາມັກຄີ ຂອງລັດຖະບານ ກໍຄືປະຊາຊົນລາວ ທີ່ມີຕໍ່ລັດຖະບານ ແລະ ປະຊາຊົນອິນໂດເນເຊຍເພື່ອນມິດ.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂ່າວ: ຂ່າວສານປະເທດລາວ, www.khaosod.co.th
ຮູບປະກອບຂ່າວ: www.khaosod.co.th