ຕອນນີ້ບັນຫາເດັກນ້ອຍຕິດເກມ ຫລື ເຄື່ອງມືສື່ສານຕ່າງໆ ມີຈຳນວນເພີ່ມຂຶ້ນທຸກມື້ ບໍ່ວ່າເຮົາ ຈະຫັນໄປທາງໃດກໍມັກຈະເຫັນເດັກນ້ອຍ ກົ້ມໜ້າກົ້ມຕາແຊັດ ຫລິ້ນເກມ ຫລື ອື່ນໆ ຕະຫລອດ ເຊິ່ງຫາກປ່ອຍໄວ້ແບບນີ້ດົນໆ ບັນຫາຕ່າງໆ ບໍ່ໄດ້ເກີດກັບຕົວເດັກນ້ອຍເອງເທົ່ານັ້ນ ແຕ່ຍັງສົ່ງຜົນກະທົບຕໍ່ສັງຄົມນໍາອີກ ສະນັ້ນກ່ອນທີ່ຈະເກີດບັນຫາໃຫຍ່ ເຮົາມາຮ່ວມຊ່ວຍກັນແກ້ໄຂນິໄສລູກຕິດໜ້າຈໍກັນ 1. ຈັດແຍກພື້ນທີ່ສຳລັບອຸປະກອນເອເລັກໂຕນິກໂດຍສະເພາະ
ພໍ່ແມ່ຫລາຍໆທ່ານອາດຈະຄິດວ່າ ການຈຳກັດຊົ່ວໂມງໃນການຫລິ້ນອິນເຕີເນັດ ເກມ ໂທລະສັບມືຖື ເບິ່ງໂທລະພາບ ຫລື ອື່ນໆ ເປັນການກະທຳທີ່ຖືກຕ້ອງ ເຊິ່ງແທ້ໆ ແລ້ວກໍບໍ່ຜິດຫຍັງຫລາຍ ແຕ່ເຮົາມີວິທີທີ່ດີກວ່າມານຳສະເໜີກັນ ນັ້ນກໍຄື ພໍ່ແມ່ຄວນຈະຈັດແຍກໂຊນສຳລັບອຸປະກອນ ເຕັກໂນໂລຊີ ເຫລົ່ານີ້ເອົາໄວ້ຕ່າງຫາກ ຖ້າຫາກລູກຢາກຈະເບິ່ງໂທລະພາບ ຫລິ້ນເກມ ຫລື ຫລິ້ນຄອມພິວເຕີ ກໍໃຫ້ລູກໄປຢູ່ຫ້ອງ ຫລື ມຸມທີ່ຈັດກຽມໄວ້ເທົ່ານັ້ນ ນອກຈາກນີ້ໃນໄລຍະອື່ນໆ ເຊັ່ນ ຕອນເຮັດວຽກບ້ານ ກິນເຂົ້າ ຫລື ອອກນອກເຮືອນ ກໍຄວນຕັດຊ່ອງທາງການສື່ສານອອກໄປທັງໝົດ ໂດຍສະເພາະໄລຍະກ່ອນເຂົ້ານອນ ເພາະຄື້ນຄວາມຖີ່ຕ່າງໆ ຈາກອຸປະກອນອີເລັກໂທນິກ ຈະເຂົ້າໄປລົບກວນການນອນຂອງລູກເຈົ້າ
2. ຢູ່ກັບລູກໃຫ້ຫລາຍຂຶ້ນ
ຈາກການວິໄຈຫລາຍໆບ່ອນພົບວ່າ ເດັກນ້ອຍທີ່ສົນໃຈກັບການເບິ່ງໂທລະພາບ ຫລື ສັງຄົມອອນລາຍ ຫລາຍເກີນໄປ ມີຄວາມສ່ຽງທີ່ຈະກາຍເປັນເດັກດື້ດ້ານ ບໍ່ຟັງຄວາມ ຫລື ເບິ່ງໂລກໃນແງ່ລົບສູງກວ່າເດັກນ້ອຍທົ່ວໄປ ເຊິ່ງພຶດຕິກຳເຫລົ່ານີ້ ນີ້ເອງທີ່ເຮັດໃຫ້ພວກເຂົາປັບໂຕເຂົ້າກັບໝູ່ໆ ແລະສັງຄົມໃນຊີວິດຈິງໄດ້ຍາກ ດັ່ງນັ້ນສິ່ງທີ່ດີທີ່ສຸດກ່ອນທີ່ຈະເກີດບັນຫາແບບນີ້ກັບລູກຂອງເຈົ້າ ກໍຄື ພະຍາຍາມຫາເວລາມາຢູ່ກັບລູກຂອງເຈົ້າໃຫ້ຫລາຍໆ ຫລື ອາດຈະຫາກິດຈະກຳມ່ວນໆ ມາເຮັດຮ່ວມກັນດີກວ່າ ນອກຈາກຈະຊ່ວຍດຶງດູດຄວາມສົນໃຈຂອງລູກແລ້ວ ກໍຍັງຊ່ວຍສານສຳພັນທີ່ດີໃຫ້ກັບຄົນໃນຄອບຄົວນໍາອີກ
3. ບອກເລົ່າຂໍ້ເສຍໃຫ້ລູກຟັງ
ການບັງຄັບບໍ່ໃຫ້ລູກເຮັດເລີຍ ກໍອາດຈະເຮັດໃຫ້ຮູ້ສຶກວ່າ ກໍາລັງຖືກບັງຄັບ ແລະ ລັກຕໍ່ຕ້ານຢູ່ໃນໃຈ ສະນັ້ນພໍ່ແມ່ ກໍ່ໜ້າຈະສອນລູກທາງອ້ອມແທນ ໂດຍການເລົ່າຂ່າວ ຫລື ປະສົບການຄວາມຜິດພາດ ທີ່ກ່ຽວຂ້ອງກັບການໃຊ້ອຸປະກອນອີເລັກໂທນິກໃຫ້ລູກຟັງ ເພື່ອໃຫ້ລູກຄ່ອຍໆ ຊຶມຊັບຂໍ້ເສຍຂອງມັນໄປເທື່ອລະນ້ອຍ ເພື່ອໃຫ້ລູກະມັດລະວັງຕົນເອງໃນການໃຊ້ຫລາຍຍິ່ງຂຶ້ນ ແລະ ປ້ອງກັນພຶດຕິກຳຕ່າງໆ ທີ່ອາດສ້າງຄວາມເສຍຫາຍກັບຜູ້ອື່ນໄດ້