ສຳນັກຂ່າວ AFP ລາຍງານຈາກເມືອງຫລວງປາລີ ວ່າກຸ່ມນັກວິທະຍາສາດ 84ຄົນ ໂຮມຕົວກັນສຶກສາເຖີງການປ່ຽນແປງຂອງປະລິມານນໍ້າກ້ອນໃນທະວີບແອນຕາກຕິກ ຫລື ຊັ້ນຂົ້ວໂລກໃຕ້ ເຜີຍລາຍງານໃນວາລະສານວິທະຍາສາດເນເຈີໃນວັນພຸດ ລະບຸວ່າ ຕັ້ງແຕ່ປີ 1992 ເປັນຕົ້ນມາ ພູມຖານແອນຕາກຕິກແມ່ນສູນເສຍນໍ້າກ້ອນໄປແລ້ວປະມານ 2,7 ລ້ານລ້ານລິດ ຊື່ງສົ່ງຜົນໃຫ້ລະດັບນໍ້າທະເລສູງຂື້ນປະມານ 8 ມິນລີແມັດ.
ຜົນການສຶກສາຊີ້ແຈງວ່າ ປະມານ 25 ປີທີ່ຜ່ານມາ ນໍ້າກ້ອນລະລາຍຫາຍໄປເກືອບທັງຫມົດແມ່ນມາຈາກຝັ່ງແອນຕາກຕິກຕາເວັນຕົກ ປະລິມານນໍ້າກ້ອນປະມານ 2 ໃນ 5 ລະລາຍຫາຍໄປໃນຊ່ວງ 5 ປີທີ່ຜ່ານມາ ຊື່ງເປັນອັດຕາທີ່ເພີ່ມຂື້ນສູງຜິດປົກກະຕິ 3 ເທົ່າ. ໃນການທີ່ຊັ້ນນໍ້າກ້ອນຫນາປະມານ 8 ກິໂລແມັດ ກຳລັງລະລາຍຫາຍໄປແຕ່ປີ 1992-2012 ປະລິມານນໍ້າກ້ອນທີ່ແອນຕາກຕິກສຸນເສຍໄປຕໍ່ປີຢູ່ທີ່ປະມານ 7,600 ລ້ານລິດ. ຂະນະທີ່ຊ່ວງຫລັງປີ 2012 ເປັນຕົ້ນມາ ມີອັດຕາການເລັ່ງເພີ່ມຂື້ນມາຢູ່ທີ່ປະມານ 219,000 ລ້ານລິດ/ປີ.
ເຄດທ໌ ເຮນລີ, ນັກວິໄຈຈາກມະຫາວິທະຍາໄລ ບຣິສຕອລ ໃນປະເທດອັງກິດ ກ່າວວ່າ ນໍ້າກ້ອນໃນຝັ່ງແອນຕາກຕິກຕາເວັນອອກ ຊື່ງເປັນພື້ນທີ່ສ່ວນໃຫຍ່ເລີ່ມມີຄວາມບໍ່ສະຖຽນຫລາຍຂື້ນ ແຕ່ສີ່ງທີ່ຫນ້າກັງວົນໄປກວ່ານັ້ນ ແມ່ນການສູນເສຍນໍ້າກ້ອນໃນຝັ່ງແອນຕາກຕິກຕາເວັນຕົກ ລະລາຍໄປໃນອັດຕາທີ່ໄວວາເກີນຄາດ ຫາກມີແນວໂນ້ມທີ່ເປັນຢູ່ໃນປະຈຸບັນຍັງຄົງດຳເນີນໄປເຊັ່ນນີ້ ແອນຕາກຕິກກໍຈະກາຍມາເປັນແຫລ່ງທີ່ມາຂອງປະລິມານນໍ້າມະຫາສານຫລາຍທີ່ສຸດ ທີ່ນຳໄປສູ່ການເພີ່ມຂື້ນຂອງລະດັບນໍ້າທະເລ.
ອັດຕາການເພີ່ມຂື້ນຂອງລະດັບນໍ້າທະເລປະຈຸບັນແມ່ນຢູ່ທີ່ 3,4 ມິນລີແມັດຕໍ່ປິ ໂດຍຕັ້ງແຕ່ປີ 1992ເປັນຕົ້ນມາ ລະດັບນໍ້າທະເລເພີ່ມສູງຂື້ນ 84,8 ມິນລີແມັດ ມີຄວາມເປັນໄປໄດ້ວ່າ ພາຍໃນທ້າຍສະຕະວັດນີ້ ລະດັບນໍ້າອາດເພີ່ມສູງຫລາຍສິບຊັງຕີແມັດ ຫລື ແມັດກວ່າ ເມື່ອປຽບທຽບກັບຊ່ວງຍຸກອຸດສາຫະກຳ ຂື້ນຢູ່ກັບສັກກາຍະພາບໃນການຈັດການຄວບຄຸມການປ່ອຍກ໊າສຄວາມຮ້ອນເຮືອນກະຈົກ ຊື່ງເປັນຕົວເລັ່ງປະຕິກິລິຍາສຳຄັນຕໍ່ການເພີ່ມຂື້ນຂອງອຸນຫະພູມໂລກ.
ແຫລ່ງຂ່າວຕ່າງປະເທດ: TDN