ສຳນັກຂ່າວສານປະເທດລາວລາຍງານເມື່ອວັນທີ 07 ມິຖຸນາ 2018ວ່າ ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ຊີ້ແຈງຂໍ້ສົນໃຈຂອງສະມາຊິກສະພາແຫ່ງຊາດ (ສສຊ) ກ່ຽວກັບການປະຕິບັດນະໂຍບາຍຕໍ່ນັກ ຮຽນໂຮງຮຽນຊົນເຜົ່າ ແລະ ການຈັດແບ່ງໂກຕາລັດຖະກອນຄູ ປີ 2018 ຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ໃນວັນທີ 7 ມິຖຸນາ 2018 ນີ້ວ່າ: ອີງຕາມສຳຫລວດລັດຖະກອນຄູ ລວມທັງຄູອາສາສະໝັກ ໃນຈຳນວນໂຮງຮຽນທັງໝົດ 12.744 ແຫ່ງ ທົ່ວປະເທດ ເຫັນວ່າຍັງມີຄວາມຕ້ອງການຄູຫລາຍກວ່າ 19.757 ຄົນ. ໃນຂະນະທີ່ໂກຕາຄູ ທີ່ລັດຖະບານຈັດແບ່ງໃຫ້ໃນສົກປີນີ້ ມີພຽງ 1.850 ຄົນ. ໃນນັ້ນ, ແຂວງທີ່ໄດ້ໂກຕາຫລາຍກວ່າໝູ່ແມ່ນ ສະຫວັນນະເຂດ 172 ຄົນ ແລະ ໄດ້ໜ້ອຍກວ່າໝູ່ແມ່ນແຂວງໄຊສົມບູນ ຈຳນວນ 68 ຄົນ.
ທ່ານນາງ ແສງເດືອນ ຫລ້າຈັນທະບູນ ໄດ້ຍົກໃຫ້ເຫັນ ເຖິງເຫດຜົນຄວາມຕ້ອງການຄູ ຈຳ ນວນດັ່ງກ່າວ ຍ້ອນການນຳໃຊ້ການສິດສອນຂອງຄູ ຢູ່ໂຮງຮຽນຫລາຍແຫ່ງ ໃນໄລຍະຜ່ານມາ ບໍ່ຖືກຕ້ອງຕາມເປົ້າໝາຍ, ບໍ່ຖືກຕາມສາຂາວິຊາ ຫລື ເອົາຄູສອນເລກໄປສອນ ພາສາລາວ, ເອົາຄູພາສາລາວ ໄປສອນພາສາອັງກິດ, ຄູບາງສາຂາວິຊາມີໜ້ອຍ ແຕ່ບາງສາຂາວິຊາມີຫລາຍ ເຊິ່ງມັນເປັນທີ່ມາຂອງຄຳວ່າ “ຄູເຫລືອບໍ່ພໍ”. ສະນັ້ນ, ມາຮອດປີ 2018 ການນຳກະຊວງສຶກສາທິການ ແລະ ກິລາ ໄດ້ປັບປຸງວຽກງານດັ່ງກ່າວ ໂດຍມອບໃຫ້ໂຮງຮຽນເປັນຜູ້ຄັດເລືອກເອົາຄູ ທີ່ໄດ້ຄຸນນະພາບ, ຄູທີ່ຜ່ານການສອບເສັງ ບັນຈຸແນໃສ່ເຮັດໃຫ້ການການຮຽນ-ການສອນ ມີປະສິດທິພາບ ແລະ ອື່ນໆ.
ສຳລັບ ການປະຕິບັດນະໂຍບາຍຕໍ່ນັກຮຽນໂຮງຮຽນຊົນເຜົ່າ ທ່ານນາງ ແສງເດືອນ ຫລ້າຈັນທະບູນ ໄດ້ຊີ້ແຈງວ່າ: ປັດຈຸບັນ ທົ່ວປະເທດ ມີໂຮງຮຽນສາມັນກິນນອນຊົນເຜົ່າ 32 ແຫ່ງ, ມີນັກຮຽນທັງໝົດ 14.216 ຄົນ ໃນນັ້ນ, ນັກຮຽນໃນແຜນເກືອບ 10 ພັນຄົນ, ຍິງ 4.335 ຄົນ ໂດຍໄດ້ມີນະໂຍບາຍຮັບເບ້ຍລ້ຽງ 2 ແສນກີບຕໍ່ເດືອນ ພ້ອມເຄື່ອງອຸດໜູນຕ່າງໆ, ສ່ວນນັກຮຽນນອກແຜນ ມີ 4.222 ຄົນ(ບໍ່ໄດ້ຮັບເບ້ຍລ້ຽງ). ພ້ອມນັ້ນ ກະຊວງສຶກສາທິການ ແລະ ກິລາ ຍັງໄດ້ອອກຂໍ້ຕົກລົງວ່າດ້ວຍການຄຸ້ມຄອງໂຮງຮຽນສາມັນກິນນອນຊົນເຜົ່າ, ຂໍ້ຕົກລົງວ່າດ້ວຍນະໂຍບາຍຄູ-ນັກຮຽນ ຊົນເຜົ່າ ແລະ ຂໍ້ຕົກລົງວ່າດ້ວຍລະບຽບຄຸ້ມຄອງຄູ ແລະ ນັກຮຽນຊົນເຜົ່າ.
ແຫລ່ງຂ່າວ: ສຳນັກຂ່າວສານປະເທດລາວ